Kompas

Dr. Erna Gerryts, 'n opvoedkundige sielkundige verbonde aan Universiteit Stellenbosch, vertel wat beroepsvoorligting en psigometriese toetse is, hoe om ‘n ingeligte beroepskeuse te maak, en watter stappe om te volg om drome te verwesenlik wanneer ‘n loopbaanrigting gekies word.

Net soos ‘n sonneblom het vanaand se uitblinker die vermoë om jou dag op te helder met haar borrelende geaardheid. Ons uitblinker is niemand anders as Athina Jansen nie! Sy gesels oor haar toekomsplanne en deel van haar opwindende ervarings van die afgelope twee jaar in die musiek- en toneelbedryf.

’n Gesonde verhouding met geld is baie belangrik. Jaylee Gertse vertel hoe sy rande rek, en Neil Van der Walt van DebtSafe praat oor die belangrikheid van ‘n begroting en jou krediettelling.

Marlè Penz is besig met studies om 'n vlieënier te word. Sy vertel wat dit behels en hoe jy 'n vlieglisensie kan bekom.

Watter uitdagings staan tussen jou en jou loopbaandoelwitte? Hoe oorkom jy daardie uitdagings? Arehan Brand gesels met Clirissa Olivier, ’n werwingsagent, oor die verskillende uitdagings wat loopbaandoelwitte belemmer en uitdaag.

Matrikulante Merwe de Vries van Hoërskool Stellenberg en Cristen Koegelenberg van Bloemhof, deel hulle  wenke om moeilike uitdagings en situasies te hanteer.

Athina Jansen gesels met sportuitblinkers van New Orleans Sekondêr en Hoërskool Brackenfell. Sy praat ook met die jong akteur, Jacques de Bruin, oor sy rol in die sepie, Arendsvlei.

Jongmense op die platteland het min tot geen geriewe om hulle besig te hou. Freek Oerson, ‘n taalonderwyser van Swellendam, vertel hoe hy ‘n teater in sy gemeenskap op die been gebring het. Een van die teater se beste produkte, Ayden October, gesels oor sy suksesse.

Mart-Leen Oosthuizen gesels met Bianca van Heerden oor verhoudings op hoërskool. Sy vertel hoe jy jou verjouding op 'n gesonde voet kan begin, die gevaartekens in jong verhoudings, en hoe jy kan keer dat jong liefde jou lewe oorneem.

Arehan Brand gesels met Elizbeth Matthee van Nuhorizon, ‘n keuringsagentskap vir jong mense wat by Amerikaane karnavalle wil werk. ‘n Paar leerders van Hoërskool Brandwag in Uitenhage kuier ook saam.

Mar-li van der Merwe gesels met matriek-toppresteerders Dade Jason van Hoërskool Tygerberg en Adrienne Murray van die Pionier Skool vir Blindes oor hulle resep vir akademiese sukses.

Arehan Brand gesels met leerders van die Hoërskool Brandwag in Kariega (voorheen Uitenhage) oor hulle prestasies. Modelle, ‘n speller en meisies wat geslagstereotipes in ‘n ongewone sport breek, is in die kollig.

Nie almal beplan om ná skool te gaan studeer nie. Baie mense oorweeg dit om by die polisie of weermag aan te sluit. Edwina Maarman is 'n polisiebeampte en Andrea Constable is werksaam by die Suid-Afrikaanse Vloot. Hulle gesels oor hulle beroepe.

Ons leer jou om kreatiewe en goedkoop geskenke te maak om jou geliefdes spesiaal te laat voel, sonder dat dit ‘n arm en ‘n been kos.

Die eerste paar weke van die akademiese jaar is dikwels deurmekaar vir leerders. Atletiekoefeninge tydens skooltyd, bloedige hitte wat almal moet trotseer, en dan is hulle aandag ook nog by die vakansie... Arehan Brand gee raad oor wat om te doen in hierdie tyd om te verseker dat hulle nie onproduktief is nie, en sodoende ook van sukses verseker is aan die einde van die jaar.

Mar-li van der Merwe gesels met Dano Swart, ‘n oudleerling en kranige sportman van die Hoërskool Brandwag in Uitenhage, wat op 7 Mei 2019, tydens provinsiale rugbyproewe sy nekwerwels gebreek het en daarna sy lewe in ‘n rolstoel moes voortsit. Dano vertel van die impak wat dit op sy lewe gehad het.

Athina Jansen gesels met die Hoër Volkskool in die Oos-Kaap se matriekklas van 2022. Die uitblinkers vertel van hulle prestasies en wat hulle doelwitte vir 2023 is.

Arehan Brand gesels met Salomi Mostert en Leon Lategan van The School of Entrepreneurship oor hoe Jan Alleman ‘n entrepreneur kan word, al is dit net om ‘n basiese inkomste te kan verdien. Christiaan Joubert, ‘n derde-jaar B.Com Regte-student vertel hoe belangrik dit is om so gou moontlik werkservaring op te doen en te netwerk.

Droomsindroom bestaan uit twee broers, Kyle Schlebusch (16) en Kirsten Schlebusch (23). Hulle gesels oor hoe hulle lewe verander het, en hoe hulle werk en skool balanseer met musiek.

KRAGKAMP - Episode 19 (slot): Kobus Burger, die meesterbrein agter die KRAGKAMP-reeks, maak ‘n belangrike aankondiging, en die deelnemers vertel van hulle vaardigheidsreis en hoe hulle persoonlik gegroei het.

Matriek-toppresteerders, Suzelle Nel van Hoërskool Brandwag in Uitenhage, Utroff Rosent van Hoërskool Paul Roos in Stellenbosch en Dealan Fredericks van Malmesbury deel hulle studiewenke en woorde van wysheid.

Athina Jansen gesels met die matriekklas van 2022 se top presteerders. Leerders van die Noord- en Wes-Kaap deel hulle sukses en wenke met ons. Hulle verteenwoordig Hoërskool Martin Oosthuizen, Hoërskool Vredendal, Arcadia Sekondêr en Hoërskool Apex.

Die oorgang van skool na universiteit is nie altyd maklik nie. Met hierdie nuwe fase van jou lewe kom daar baie verantwoordelikhede en groot veranderinge. Hannelie Spies, ‘n opvoedkundige sielkundige, verduidelik hoe studente hierdie fase soomloos kan hanteer. Simone Anna Mart Louw, een van die land se toppresteerders, gesels oor haar planne vir die jaar en hoe opgewonde sy is vir die nuwe fase.

Die matriekuitslae is onlangs bekendgemaak. Ons gesels met die toppresteerders in Gauteng.

KRAGKAMP - Episode 18: Arehan Brand en Mar-li van der Merwe staan gereed om die wenner van die reeks te kroon. Dawie Roodt, die beoordeelaar van uitdaging 7 (Begrotings en beplanning), maak sy puntetoekenning bekend, en die deelnemers vertel waarom hulle dit verdien om die wenner te wees.