Spektrum

Die Netbal Wêreldbekertoernooi begin in Kaapstad - 'n eerste vir Afrika. Kaapstad kan koue, nat weer en oorstromings die naweek verwag. Belanghebbendes en die regering vergader oor die motorbande wat steeds smeul op Biesiesvlei in Noordwes.

Daar was 'n beduidende daling in die produsenteprysindeks vir Junie. Ons doen 'n profielontleding van die agt kandidate vir die pos van die nuwe Openbare Beskermer. Een persoon sterf in nóg 'n Russiese aanval op Odesa.

Die ANC en DA kry stry oor die bestuur van die Tshwane Metro. Ons vind uit watter geheime Johannesburg se ondergrondse pype wegsteek. Die agenda vir die BRICS-vergadering wat tans in Johannesburg plaasvind, kom onder bespreking.

Vyf dae ná die Breestraat-ontploffing in Johannesburg is plaaslike dienste nog nie herstel nie. Noord-Kaapse boere is ongelukkig oor die plasing van radioteleskope in die gebied. Uitbrekings van varkpes is in drie munisipaliteite in die Oos-Kaap bevestig.

Agt lede van adjunkpresident Paul Mashatile se lyfwagte verskyn in die hof vir die aanranding van vier soldate. Nuwe vrae word oor die Russiese skip, Lady R, gevra. Banyana se spel teen Swede word geprys, ten spyte van 'n nederlaag.

Die vonke spat tussen politici ná die ontploffing in Johannesburg se middestad. 'n Bergingsterrein vir bande brand buite beheer. Sowat 40 lande wil deel wees van 'n uitgebreide BRICS - 'n kenner vertel waarom dit so gesog is.

Die oorsaak van 'n ontploffing in die Johannesburgse middestad word steeds ondersoek. Videogrepe van 'n man wat sy huishulp mishandel, het Suid-Afrikaners warm onder die kraag. Suid-Afrika het min tyd oor om oor te skakel na groenkrag.

Die Hooggeregshof sê die regering moet in die openbaar verklaar hoe hy 'n arrestasiebevel vir die Russiese president, Wladimir Poetin, sal uitvoer. Die Kaapse Forum ondersteun die vrylating van die sogenaamde stasiemoordenaar op parool. Verbuikersprysinflasie daal in Junie.

Graanpryse wêreldwyd skiet die hoogte in. Ons vind uit wat deur 'n ma se kop gaan, wanneer sy besluit om haar kinders te vermoor. Suid-Afrikaners vier Mandeladag.

Die ANC swaai om in sy kritiek teen Thuli Madonsela. Hoe sal vandeesweek se koue fronte beurtkrag beïnvloed? Die Swartsee graanooreenkoms verval vandag.

Sal oudpresident Jacob Zuma moet tronk toe wanneer hy van mediese behandeling in Rusland terugkeer? Inwoners in Kaapstad is die josie in nadat die metro 'n elektrisiteitstariefverhoging van 17,6% ingestel het. Hoe skerp is die Internasionale Strafhof se tande om in gryp in Soedan?

Die verbetering van Johannesburg se waterinfrastruktuur vorder goe, maar die herstel van die watertoevoer na inwoners kan dae duur. Inwoners van Kaapstad kla oor buitensporige elektritietsrekenings. Verskeie indringervissoorte word in die Kruger Wildtuin geïdentifiseer.

Die Minister van Polisie, Bheki Cele, spreek die media toe oor die polisie se reaksie op vragmotorvandalisme. NAVO-lande bespreek die langtermyn-veiligheid van Oekraëne. Die Mededingingskommissie gaan SASOL vervolg omdat hy te veel vir gas gevra het.

Johannesburg se inwoners is ontstoke en wanhopig oor die metro se beplande 58 uur lange waterbeperking. Suid-Afrika lewer 'n voormalige Mosambiekse minister uit aan Amerika. Caster Semenya wen haar saak teen die internasionale atletiekfederasie.

Vyf vragmotors word op die N4 naby Waterval Boven aan die brand gesteek, glo uit protes teen buitelandse bestuurders. Sneeu val oor groot dele van die land, soos die Wes- en Oos-Kaap, die suidelike en noordelike Drakensberge en ook Gauteng. 'n Bielie van 'n Bonsmarabul breek 'n prysrekord.

Die wêreld wonder waar die berugte Wagner-groep se baas hom bevind. In aanloop tot die BRICS-beraad in Augustus sal die ANC eers as gasheer optree vir die Politieke Partye-forum vir BRICS-lande, sonder dat ander politieke partye genooi word. En, 137 woonbuurte in Johannesburg is aanstaande week dae lank sonder water.

COSATU wys vandag sy misnoë teen die talle kwessies wat die samelewing benadeel. Ons vra waarom ministers so baie beskermingspersoneel nodig het. Suid-Afrikaners se ongediagnoseerde geestesgesondheidstoestande kos die ekonomie miljoene.

Die regering moet pa staan vir die analoog-fiasko. Die Weermag staan die slagoffers van 'n blouligaanval by. Ons vind uit presies hoe die Nasionale Gesondheidheidversekering jou privaat mediese fonds kan raak.

Woede kring uit oor die aanranding van 'n motoris deur die polisie. Die Karoo Hoogland-munisipaliteit wil spoedig met herstelwerk aan infrastruktuur begin nadat oorstromings verwoesting gesaai het. Die Bokke kry moontlik vandag 'n nuwe kaptein.

Ons kry die jongste nuus oor die oorstromings in die Nama Khoi-gebied. Die Universiteit Stellenbosch is tevrede met die bevindinge teen die rektor, prof Wim de Villiers. Nuwe inligting wys dat jy meer belasting sal betaal om die Nasionale Gesonheidsversekerheidskema te befonds. Moenie bangmaakpraatjies oor sonpanele glo nie.

Die parlement hou vol dat hy die aanbevelings van die Zondo-kommissie implementeer. Die Amerikaanse hooggeregshof beslis dat rasbeleid nie meer as maatstaf vir universiteitstoelating gebruik mag word nie. Ons vind uit wat 'n gemeenskapspolisiëringsforum in Mbombela doen om misdaadsindikate onder bedwang te hou.

Die DA doen stappe teen adjunkpresident Paul Mashatile se beweerde geheime luukse lewe en deelname aan staatskaping. OUTA versoek die Johannesburg Metro om vir eers nie die verhoging in eiendomsbelasting in werking te stel nie. By Innibos hier in Mbombela praat ons onder meer oor roofdierbestuur, en veteraanaktrise Sandra Prinsloo sluit by ons aan.

Sneeu en gure weer word vir dele van die Oos-Kaap voorspel. Ons hoor meer oor aanpassings aan egskeidingswetgewing van 2023 wat in die parlement goedgekeur is. Ons span by die Innibos Kunstefees in Mbombela gee ons 'n voorsmakie van hulle program vir die volgende drie dae.

Blind SA betoog vir beter toegang tot boeke vir blindes. Jongmense in die Vrystaat kwalifiseer as landboukundiges en veeartse. Amerika beklemtoon dat hulle geensins betrokke was by die Wagner-opstand in Rusland nie.

Misdadigers teiken munisipale werkers op die gedoemde Macassarweg in die Wes-Kaap. Die kragkrisis is onder die loep. Die minister van arbeid sê kritiek teen die nuwe wet op gelyke indiensneming is kwaadwillig.