Spektrum

Die ontsnapping van 'n reeksverkragter laat vrae onstaan oor hoe hy weggekom het en wie hom gehelp het. Die veelpartykoalisie in Tshwane beraam planne om die Speaker uit die kussings te lig. Die ontbondeling van Eskom is steeds op die kaarte.

Die polisie in KwaZulu-Natal ontken dat hulle sukkel om taxiverwante geweld te bekamp. Uganda se jongste wetgewing teen homoseksualiteit word wêreldwyd veroordeel. Netbal Suid-Afrika is gereed om 'n onvergeetlike wêreldbekertoernooi aan te bied.

Sakeliga wil hê die Tesourie moet ingryp by die diensleweringskrisis in die Ditsobotla-munisipaliteit. Die parlement gaan nie die Phala Phala-gebeure ondersoek nie. 'n Ondersoek deur ENACT lê korrupsie by die Kruger Wildtuin bloot.

Joernaliste van regoor die land betoog by die hof waar Jacob Zuma se private vervolgingsaak teen Karen Maugham en die aanklaer Billy Downer aangehoor word. Die minister van elektrisiteit, Kgosientso Ramokgopa, sit sy besoek aan kragstasies voort - vandag kom Thuthuka in Mpumalanga aan die beurt. Die Verenigde Nasies vergader vir die eerste keer in 46 jaar oor die wêreldwye waterkrisis.

Die Verenigde Nasies se jongste verslag waarsku oor ’n vinnig kwynende geleentheid om klimaatsverandering te keer. Die Menseregtekommissie het sy hande vol op Menseregtedag. 'n Duitse brouery stel kitsbier bekend.

Die polisie het landwyd op meer as 24 000 motorbande beslag gelê in optredes teen betogers. Die aantal betogers wat in hegtenis geneem is, neem ook toe. In 'n ander optrede het die UDM en Action SA saam met ander organisasies die hof genader om beurtkrag ongrondwetlik te verklaar. 'n Amerikaans-geleide militêre mag het Irak vandag 20 jaar gelede binnegeval.

Die UDM-leier vaar uit teen president Cyril Ramaphosa se hantering van die EFF se beplande, nasionale wegbly-aksie. 'n Lid van die Afrika Moslem Agentskap vertel van 'n notaboek wat sy in die puin gevind het ná Sirië en Turkye se verwoestende aardbewings. In Frankryk vaar mense opnuut die strate in oor omstrede pensioenwetgewing.

Drie kandidate ding mee vir die toppos in die DA. Groothandelverkope het in Januarie ingekrimp. Die Konstitusionele Hof beslis dat boere waterregte mag oordra en verkoop.

Afrikaanse studente se menseregte is wel geskend weens die Stellenbosch Universiteit se taalbeleid. Die Vrystaatse premier bring jonger bloed in om provinsiale probleme te pak. Advokaat Busisiwe Mkhwebane is besig met haar getuienis voor die parlementêre artikel 194-komitee.

Die veelpartykoalisie in Tshwane wil hof toe nadat hulle stemme vir die nuwe Speaker nie getel is nie. Navorsing wys die land is ekonomies diep in die moeilikheid. Ons kry nuwe besonderhede oor die Aukus- verdedigingsooreenkoms.

Die Arbeidshof steek 'n stokkie voor Nehawu se staking. Woede oor inmenging by die aanstelling van die SAUK-raad. Die Oscars vermaak en verras.

Opposisiepartye krap kop oor die Tshwane-burgemeester se sekwestrasiedokumente. Stakende studente sê universiteite se verblyfkoste is te hoog - ons ondersoek die geldigheid van die bewerings. Die vonke spat tussen twee sustervakbonde.

'n Kredietagentskap gradeer Suid-Afrika af. Nog geen uitsluitsel oor Gauteng se e-tolstelsel nie. Die Proteas slaan vinnig toe teen die Windies.

'n Opname wys vroue oorweeg meer soorte werksgeleenthede, wat meer werk kan skep. Die minister van elektrisiteit gaan met die banksektor vergader om die aankoop van sonkragpanele meer bekostigbaar vir huishoudings te maak. Navorsing deur Vrystaat Landbou dui daarop dat beurtkrag bydra tot meer misdaad op plase.

Die Minister van Elektrisiteit beplan om direk met kragstasiebestuurders saam te werk om die kragkrisis op te los. 'n Imbizo oor misdaadvoorkoming word in Westbury, Johannesburg, gehou. Suid-Afrika se Bruto Binnelandse Produk het in die laaste kwartaal van 2022 met 1,3% gedaal.

'n Uitbreking van masels is in die Noord-Kaap aangemeld. Die vakbondfederasie SAFTU gaan strafregtelike klagte teen André de Ruyter by die polisie indien. Suid-Afrikaners sal oor 'n paar uur uitvind wie die Minister van Elektrisiteit is wat moet help om die kragkrisis op te los.

Die helfte van die wêreldbevolking kan teen 2035 oorgewig wees. Die Wes-Kaapse regering beplan om 750 megawatt se hernubare krag teen 2025 te verkry. Studentebetogings by universiteite in Johannesburg duur voort.

Polisieminister Cele besoek 'n bendegeteisterde gebied in Johannesburg. Die hooggeregshof verklaar 'n belastingbesluit vir skole as ongrondwetlik. ‘n Prokureur het met 'n strategie vorendag gekom om verbruikers van onregmatige onkoste uit tyddeel, gesamentlike eienaarskapskemas en aandeleblokskemabedrywe te bevry. Die Windies slag die Proteas.

Eskom vier vandag sy 100ste bestaansjaar. Ons kyk na die kragreus se ontstaan en ontwikkeling tot op hede. Die EFF is vanjaar tien jaar oud. Ons kyk na hulle ledegetalle en prestasies oor die afgelope vyf jaar. Amptelike syfers wys 'n afname in plaasaanvalle, hoewel dit nie altyd akkuraat is nie.

Oplossings word gesoek vir die oormaat steenkoolvragmotors op die N2 in KwaZulu-Natal. Duisende staatsdienswerkers beplan om volgende week te staak vir hoër salarisse. Miljoene mense sukkel al hoe meer om inkopies te bekostig.

President Cyril Ramaphosa sê dit is nie die plig van die nasionale regering om elektrisiteitsvoorsiening te bewerkstellig nie. Verwag 'n styging in brandstofpryse aanstaande maand. Onvolhoubare fases beurtkrag noop die land se sakesektor om voor te berei vir 'n totale ineenstorting van die nasionale kragnetwerk.

Die ANC eis dat die voormalige Eskombaas sy bewerings van korrupsie in die hof staaf. Intussen word hy versoek om bewyse van korrupsie by die polisie aan te meld. Sikloon Freddy peil op Madagaskar en dele van Suid-Afrika af.

Die begrotingsrede bring volgens een ontleder, min hoop. Te midde van negatiwiteit oor die begrotingsrede sien 'n landbouekonoom steeds 'n silwer randjie. Die Eskom-baas onthul skokkende besonderhede oor misdaad by die kragverskaffer - hoe baie daarvan kan ons glo?

Die koalisieregering benoem die DA se Cilliers Brink as die uitvoerende burgemeester van die Tshwane-metro. Suid-Afrikaners hoop dat die begrotingsrede verligting bring. 'n Rampbestuur-kenner gee begrotingsraad.

Kommer oor veediefstal op die Lesotho-grens. 'n Tweede sarsie aardbewings tref Turkye en Sirië. Ons praat met 'n ekonoom oor môre se begrotingsrede.