Kompas

Voor ons nuwejaarsvoornemens maak, kyk ons terug op 2024 en Kompas se hoogtepunte.

Barrie Ferreira gesels met die ander Kompasaanbieders oor dankbaarheid. Hulle vertel waarvoor hulle dankbaar is in die jaar wat verby is, en van die Kerstradisies wat hulle saam met hulle families volhou.

Ons hoor by jong Suid-Afrikaners, wat oorsee woon en werk, hoe hulle Oukersaand in die vreemde vier.

Chloè van Rooyen gesels met twee organisasies wat help om Kersfees spesiaal te maak vir groot en klein. Voetligbediening sorg dat soveel moontlik mense 'n lekker bord kos het, en Dancing with Nature bied aan jong dansers die geleentheid om hulle talent uit te oegen deur gratis optredes in parke reg oor Kaapstad.

Barrie Ferreira praat met ‘n menslike hulpbron-spesialis oor die belangrikheid van ‘n CV en jou eerste werksonderhoud.

As lugwaardin het Dee Theart die wêreld plat gereis. Sy het ook ‘n keer of twee die buiteland alleen aangepak. Sy vertel hoe jy jou droom om oorsee te reis, kan bewaarheid.

Barrie Ferreira maak seker dat jy toegerus is om veilig te wees wanneer jy dalk ‘n slang teëkom tydens jou skoolvakansie.

Petra van der Linde, ‘n dieetkundige, deel ‘n gesonde soet-en-sout-resep om die vakansie te geniet, asook wenke om gesond te bly tydens die feesseisoen sonder om die lekker dinge in die lewe mis te loop.

Jurgen Romario McEwan deel sy oorlewingsgids vir jong akteurs met ons. Hy vertel waar sy akteursreis begin het, wat hy in die droë seisoene doen, en hoe hy passie lewend hou.

Barrie Ferreira praat oor die waarde van vakansiewerk, buiten ‘n ou sakgeldjie.

Blyde Schoeman, die wenners van die 2024 Proscenium-dramakompetisie, vertel jongmense op ‘n lekker ligte manier wat hulle van voorbehoeding moet weet.

Het jy al ooit gewonder hoe word ‘n musiekvideo gemaak? Barrie Ferreira kuier agter die skerms by die verfilming van Francois van Coke se jongste musiekvideo om uit te vind hoe dié proses lyk.

Johan du Toit, die medestigter van Die Bye Boer, vertel hoekom bye so belangrik is, en hoe 'n byeboerdery werk.

'n Jong man met 'n passie vir houtwerk gee raad oor selfdoenprojekte, en leer ons die moets en moenies van houtwerk.

Barrie Ferreira praat met Albert van Wyk van Maak My ‘n Miljoenêr oor entrepreneurskap, en hoe jongmense al op skool ‘n besigheid kan begin.

Die trots Suid-Afrikaanse internasionale model, Elizma Esterhuyse, gee raad aan jongmense wat ‘n beroep in die modelwêreld oorweeg.

Barrie Ferreira praat met ‘n onderwyseres om te hoor hoe leerders kan terugkyk op akademiese jaar wat verby is.

Prof. Thys Human en Teneal Apollis vertel van die 2025 POORT-skryfkompetisie vir Graad 10 tot 12 leerders.

Ons hou kunsklas. 'n Kunsonderwyser leer jou ons om te hekel, papierblommetjies te maak, hoe om 'n juwelebakkie van lugdroog-klei te maak.

Barrie Ferreira praat oor die belangrikheid van boeklees, geletterdheid en storievertelling in die wêreld van jongmense. Hy gesels ook met ‘n universiteitstudent wat ‘n boek geïllustreer en geskryf het, gemik op kleurblinde kinders.

Hazel Janse van Rensburg het jongmense gevra waaroor hulle wonder. Sy het kenners in elke veld ingespan om hierdie innoverende vrae te beantwoord.

Barrie Ferreira praat met Mike Bolhuis om te hoor wat dit verg om ‘n privaat-ondersoeker te wees.

Louise Coetzee van die Durbanville Kinderhuis gesels oor minder tradisionele kersvakansies, om jongmense wat dalk hierdie feesseisoen alleen voel, hoop te gee.

Chloè van Rooyen gesels met 'n sielkundige oor liefdestaal, en hoe dit jou kan help om die beste kersgeskenke vir iemand kan gee. Sy hoor ook watter geskenke ons van herwinbare materiaal kan maak.

Barrie Ferreira gesels oor matriekfeeste, en hoe jy op ‘n matriekvakansie kan gaan en dit geniet, op ‘n veilige en verantwoordelike manier.