Driesestig

Marika Opperman vertel vir Martelize Brink wat dit verg om ‘n model te wees anderkant 45, groter modelle op die loopplanke, en die modes wat by SA Modeweek te sien was.

Dieetkundige Valpré Huisamen praat oor pasta wat van verskeie soorte meel gemaak word.

‘n Vrou in Amerika het ses maande tronkstraf gekry nadat sy ‘n vriend wou bystaan. Sy is ’n byeboer, en het ‘n vrag byekorwe geneem om die balju te verhoed om op sy huis beslag te lê.

Zuanda Badenhorst vertel vir Martelize Brink van Jeffreysbaai se spekboom-labirint, en vanjaar se viering van Wêreld Labirintdag wat tydens die dorp se Kunskoors plaasvind.

Haidee Muller-Isaacs gesels met die menseregte-aktivis, Derrick Grootboom, wat ná meer as 24 jaar in die Nasionale Vervolgingsgesag uittree uit sy amp as staatsaanklaer. Nou keer hy terug na sy ander passie om stories te vertel op Robbeneiland. Sy pad het hele paar kronkels geloop voordat hy hier uitgekom het, sê hy.

‘n Plaaslike politikus in Indië was ongelukkig omdat hy nie genooi is na die eindstryd van ‘n krieketkompetisie nie. Toe saboteer hy die geleentheid deur met ‘n trekker op die veld te ry en die kolfblad om te ploeg.

Rikus Grobler vertel vir Martelize Brink van die Ubuntu-bergfietsryroete wat hy in Payson, Arizona, VSA, aangelê het.

Sy bynaam is Johan Beton, en vir Johan Coetzee, ‘n gekwalifiseerde ingenieur, is ‘n droom bewaarheid toe hy met herwinde plastiekbottels, afvallap en oorskiet T-hemde sy koolstofvoetspoor dramaties kon laat daal. Sy Zerocrete het by die Wes-Kaap se Ekonomiese Nywerheidstoekennings die Innovasie-toekenning losgeslaan. Johan Rademan het met die deur in die huis geval toe hy hom besoek het.

‘n Lamborghini van $250 000 is in ‘n parkeerterrein platter gery deur ‘n ekstra groot bakkie. Moontlik was dit die hoogte verskil, maar die bakkiebestuurder was onbewus van die sportmotor waarop die bakkie tot stilstand gekom het.

Veearts dr. Ingrid de Wet beantwoord luisteraars vrae oor honde en katte. Van honde wat met klippe speel tot ‘n kat wat die bure se huis verkies bo dié van die kat se eienaar.

In hierdie week se landbounuus kyk ons na die jongste oor bek-en-klouseer, en Tongaat Hulett se hofgeding, wintergewasaanplantings in die Wes-Kaap, en Suid-Afrikaanse olyfolie wat in Spanje gewen het.

Dr. Willem Botha praat oor Griekse name in Afrikaans, soos Katharina, Sophia, Andreas, Andries en André.

In Malaga in Spanje, was die werknemers van ‘n kroeg en gereelde klante onder die indruk dat ‘n rower gewapen met ‘n machete en ‘n vuurwapen ‘n gereelde klant was wat ‘n poets bak. Hulle het hom afgelag. Almal het rustig voortgekuier en hy is toe maar fort. Eers toe hy in hegtenis geneem is, nadat hy verskeie ander kroeë beroof het, besef hulle toe hulle fout.

Dirk van Eeden vertel van Laaiplek se supergewilde kerkbasaar. Daar daag elke jaar tussen 3 000 en 5 000 mense op om dié uitbundige affêre by te woon. Ons hoor van die liplekker pannekoeke en kerrieafval en nog baie meer. Dis ook nie net 'n basaar nie, dis 'n danksegingsfees.

Kos- en kultuurhistorikus Hetta van Deventer-Terblanche praat oor museums van smaak. Daar is die lekker goed, maar ook ‘n museum van kos wat mense as walglik beskou.

Tydens ‘n konsert in Finland, het ‘n dirigent per ongeluk ‘n solis se viool getref dat dit trek. Die skrik was groot toe die 18 de eeuse Guadagnini-viool, wat tussen £1,3 miljoen en £2,6 miljoen werd is, die vloer tref.

Sylvia Kleynhans vertel vir Martelize Brink van die Wêreld Boekedag vieringe by Laerskool Generaal Nicholaas Smit in Pretoria. Die Afrikaanse Taalraad is saam met die Vriende van Afrikaans ook daar betrokke.

Dr. Barbara van der Westhuizen vertel vir Martelize Brink hoe dermatoloë lasers inspan in behandelings soos haarverwydering, pigmentverwydering en teenveroudering.

In Engeland bied die organiseerders van die Cumbria-natuurfees aan om kaartjiegeld terug te gee vir mense wat onder die indruk was dat dit ‘n fees vir naturiste is. ‘n Naturis verkies ‘n leefstyl van naaktheid.

Die lewenslustige 63-jarige ouma en juffrou, Jackie Loubser, het die avontuur van 'n leeftyd aangepak, en op die Oranjerivier gaan roei. Sy het min ingepak, maar daar was oorgenoeg aksie, adrenalien en opwinding. En nou nooi sy almal uit om volgende keer saam te gaan. Haidee Muller-Isaacs het in haar klaskamer gaan kuier.

Dr. Mandie Uys praat oor die Heilige Romeinse Ryk en Charlemagne, die eerste keiser ooit wat regeer het met die goedkeuring van die kerk.

Kadette in Finland se lugmag is in die warmwater nadat hulle tydens ‘n opleidingsessie só gevlieg het dat hulle vlugte die vorm van manlike geslagsorgane op die vlugradar aangeneem het.

Stéphan van der Watt vertel vir Martelize Brink van die lewe in Kobe, Japan, en hulle belewenis daar die afgelope 16 jaar.

Johnny Davids, ons oud-kollega by RSG, is onverwags van ons weggeneem. Johan Rademan gaan terug na die begin van die millenium toe RSG by die KKNK die ZING-wenners, Johnny en Vivian, op die verhoog verwelkom het. Hulle het per bus van Namibië deur die Noord-Kaap gery, en langs die Snyman-broers op die RSG-verhoog beland. Hulle eerste album is 20 jaar gelede opgeneem en vrygestel deur Snyman Musiek...

By die Delaware Marathon Hardloopfees is ‘n heldhaftige eindpoging op video vasgevang toe die voorloper Carson Mello te vroeg begin vier het. ’n Volspoed-eindpoging het Joshua Jackson met 0,02 van ‘n sekonde laat wen.