Todos os podcast | A crónica deportiva

Este luns arrancou a Semana de Cine Euroárabe Amal 2023 co foco no conflito entre Israel e Hamás. Desenvolverase no Teatro Principal de Compostela. Charlamos das súas claves co seu director, Ghaleb Jaber.

A previa do Braga - Real Madrid, ao que asisten afeccionados galegos. Falamos co presidente do Turégano do partido de Copa contra o Celta e cun xogador do Covadonga antes da eliminatoria co Deportivo. Tamén conversamos co Julio Delgado, o adestrador do Burela, elixido mellor técnico de fútbol sala feminino

Con Estíbaliz Espinosa miramos cara ás Oriónidas (se as nubes nos deixan) e escoitamos o poema de Ada Limón que a sonda Europa da NASA levará a unha das lúas de Xúpiter.

Slams, micros abertos, impro... Santiago acolle o festival de poesía nova 'Luz Póetica', do que falamos con Yamini Prabhu Barretto e con Lúa Mosquetera.

Emilio Españadero fálanos da visita de Yoko Takano a Vigo e preséntanos 'Bolboreta', novo tema do grupo As Lembranzas; e 'Sorrisos no ceo', último traballo discográfico de Airiños da Peneda.

Mentres La Liga celebra asemblea, o Celta láiase pola expulsión de Iván Villar. No Racing, un erro de Fran Manzanara facilitou o empate do Eldense. E o repaso, tamén, á xornada na 1ª RFEF

'O home e o can' chega a 22 salas de cine galegas. As actrices Paula Chaves e Estíbaliz Veiga preséntannos a película de Ángel de la Cruz, que comparten con Manuel Manquiña. Soidade, coidados, vellez nun filme para poñerse nos zapatos dos outros...

Afonso Becerra preséntanos unha exposición sobre os dez anos do grupo de teatro EU.EXPERIMENTO do Camoes de Vigo.

Caamaño&Ameixeiras veñen ó noso estudo para presentar o seu último disco: "Quitar o Aire". Unha visita de verdadeiro luxo.

Rafa Benítez confirma tres baixas para o Celta-Atlético de Madrid; escoitamos a Héber Pena no Racing e unha completa ollada á xornada da 1ª RFEF coas voces do Dépor, Lugo, Arenteiro e Celta Fortuna. Ademais, Cilene fala do 'clásico' Burela-Futsi e as previas da fin de semana do baloncesto e do balonmán

Tito Lesende fálanos dos novos discos de Caamaño & Ameixeiras, Lily Kershaw e Rolling Stones; e da celebración dos 20 anos de Dios Ke Te Crew.

O VIII Seminario de Onomástica da Real Academia Galega aborda este sábado en Pontevedra a presenza dos nomes propios na nosa literatura popular. Conversamos coa lingüista Luz Méndez e coa antropóloga Elena Freire Paz.

En outubro chega a librarías a versión estendida de "Ultraluz", de Ledicia Costas, Premio Afundación de poesía con Xerais. O 20 de outubro chega tamén aos escenarios na Cidade da Cultura, coa música de Amaro Ferreiro e Sergio M. Puga.

Escoitamos a Josep Señé no Racing de Ferrol e, na 1ª RFEF, ao galego Hugo Rama no Dépor e a Antoñín no CD Lugo. Ademais, repaso á vitoria do Breogán na Liga de Campións e as palabras da viguesa Marta Domínguez tras saber que o squash será olímpico en 2028

Zeltia Irevire preséntannos o seu primeiro álbum, 'Vacaloura', un disco sintonizado coa natureza no que falan o vento e o espírito do bosque.

O documental 'O médico dos pobres' ten prevista a súa estrea para o 15 de outubro na cidade de Lugo e despois por toda a provincia da Coruña e Lugo no mes de novembro e decembro. Recolle a historia de Manuel Díaz, falecido en setembro do 1936 a man de falanxistas. Falamos co seu director, Federico Rioboo.

A última hora do CB Breogán horas antes de que o equipo de Lugo volva xogar competición europea, 38 anos despois. No fútbol escoitamos a Manu Sánchez no Celta e a José Ángel no Deportivo. Ademais falamos dos Mundiais de ximnasia acrobática nos que competirá a viguesa Melania Rodríguez

Arte e física no retorno expositivo a Galicia de Rubén Ramos. Mónica Maneiro fálanos de 'La objeción de Ernst Mach a la línea del horizonte (de sucesos)', na galería Nordés.

Nove concertos e unha miríada de residencias artísticas, actividades e conferencias espalladas por Vigo, Pontevedra e Santiago de Compostela. Un outono cargado de músicas de vangarda. Comeza o Vertixe 11!

No apartado literario, Dolores Vilavedra tráenos unha obra galardonada co Premio Fiz Vergara Vilariño. Trátase de 'Diarios/1 [Azul Monforte]', escrita por Antón Lopo e editada por Espiral Maior.

Comeza na Coruña o VI Festival Internacional de Cine Intersección, con proxección, mostras e outras actividades que poderán visitarse do 17 ao 22 de outubro. Para entender as súas claves charlamos co seu director, Gonzalo Veloso.

Tralas emocións polo sorteo da primeira rolda da Copa do Rei de fútbol chegan as valoracións das eliminatorias con presenza galega: Boiro-Mallorca, Arosa-Granada, Turégano-Celta, Marbella-Racing, Covadonga-Deportivo, Avilés–Arenteiro, Antoniano-Lugo e Compostela-Tenerife

O noso experto Mario César Vila fálanos dos descubrimentos da UVigo e da recuperación dos cadáveres das persoas represaliadas durante o franquismo.

Os Premios da Cultura Galega concédeos a Xunta anualmente. Son galardóns sen dotación económica que distinguen a excelencia creativa. Falamos con Belén Brandido, produtora e distribuidora de Pistacatro (galardonada nas Artes Escénicas); e con Alfonso Blanco, director da produtora Portocabo (premio na categoría de Audiovisual).

A última hora do Racing de Ferrol antes de xogar en Valencia. Na 1ª RFEF, o Dépor volve perder e volve queixarse das decisións arbitrais e, na Primeira, alarma no Celta pola lesión de Aidoo con Ghana