Día a Día

Hoxe coñecemos os plans de expansión da empresa Fibralar, operador de telecomunicacións galego que naceu en 2018 no Baixo Miño. Rafael Fernández, o seu xerente, contounos o momento que vive a empresa e os plans de crecemento.

Tui rexistra hoxe 14 casos de covid diagnosticados no últimos 14 días. Da incidencia do coronavirus na cidade falabamos hoxe co coordinador do Centro de Saúde de Tui, Santiago Pose. Tamén abordamos a situación do propio centro onde faltan 5 dos 11 facultativos.

O CEIP nº2 de Tui estivo traballando ao longo dos últimos tres cursos nun proxecto Erasmus + con centros de Irlanda do Norte, Italia, Irlanda, Portugal e Alacante. Froito do mesmo veñen de editar un libro de recitas: Hábitos de vida saudables e felices.

Máis de 300 inscritos hai para a V Urban Trail Night que se vai celebrar este sábado, na Eurocidade Tui-Valença. Será 14 quilómetros que partirán da Avenida Miguel Dantas en Valença, e chegará aos Paseo da Corredoira. O obxectivo da organización é chegar até os 400 participantes coma explicaba Justi Peixoto de Sra. Emilia Agencia de Comunicación, organizadora da proba xunto a NOKO 360.

Prevención da violencia de xénero e formación en igualdade son dous dos eixos nos que xira a programación elaborada dende a concelleira de Igualdade do Concello de Tui con motivo do 25N. Así nolo contou hoxe a concelleira de Igualdade, Ana Núnez

500 persoas asistirán mañá no Teatro Municipal de Tui ao concerto de Tanxugueira, para o que xa non quedan entradas. Será un dos últimos directos da xira "Contrapunto". Olaia Maneiro forma Tanxugueiras xunto a Aida Tarrío e Sabela Maneiro . Canda elas no escenario estará tamén Isaac Palacín.

Iván Martínez, presidente e Ruth Villar, responsable de comunicación do Banco de Alimentos de Vigo, e José Quinteiro de SOS Tomiño Baixo Miño presentaron hoxe na nosa sintonía a Gran Recollida de Alimentos que mañá venres se pon en marcha.

Este sábado, 20 de novembro, ás 17h o pavillón da Carballa, en Tomiño acolle un evento solidario para axudar ao neno Martín Prazo. A entrada terá un prezo de 5€. Nuria Gómez, profesora de danza, é unha das organizadoras deste evento solidario. #juntospormartin

O Rosal é un primeiros concellos da provincia en aprobar os orzamentos para 2022. Ascenden a 4,8 millóns de euros. A alcaldesa do Rosal, Ánxela Fernández, explica hoxe as principais liñas destas contas.

A xornada de traballo en rede para dar a coñecer entre sí as empresas do sector turístico e do sector primario do Xeodestino Ría de Vigo - Baixo Miño, cumpriu as expectativas. Así nolo contou hoxe Martín Outomuro do Xeodestino.

O concelleiro de En Marea, Laureano Alonso, quixo dar o seu parecer hoxe sobre a nota de prensa publicada o pasado sábado polo goberno municipal sobre a ordenanza do lixo, e o traballo para a súa modificación.

O piloto tudense, Diego Vila, foi terceiro esta fin de semana no Rally de Ribeira, e primeiro na súa categoría. Comentábanos coma foi a competición.

O Instituto de Estudos Tudenses vén de publicar o número 7 da revista Castelum Tyde, na que recolle un total de 15 artigos de investigación ao longo de 400 páxinas. Desta publicación falamos hoxe co presidente do IET, Javier Añoveros.

A compañía Traspediante coas bailarinas Marta Alonso Tejada e Paula Quintas e a actriz Carlota Mosquera chega hoxe ao Teatro Municipal de Tui con Nina Ninetter. Un conto iniciático de danza contemporáneo para público familiar. Así nolo contaba Paula Quintas, produtora e bailarina do espectáculo.

Os hoteis de Tui reclaman ao concello unha solución inmediata para evitar en 2022 ter que volver a pagar máis de 8 mil euros pola taxa do lixo. Así o explicaba hoxe Paula Álvarez, do Hotel Cruceiro do Monte.

O Concello de Tui recibirá unha axuda de 100 mil euros do Ministerio de Transportes, Mobilidade e Axenda Urbana para a elaboración de proxectos pilotos de Plans de Accións Local da Axenda Urbana Española. Tui é un dos 4 concellos da provincia que foron seleccionados. O alcalde cualificaba esta resolución de "excelente noticia".

Hoxe coñecemos as demandas e accións que leva a cabo a Plataforma pola Defensa da Sanidade Pública de Tomiño con Conchi Millán e Nandi de Santiago.

Co tudense Moisés Rodríguez, deputado autonómico, repasamos hoxe os investimentos que a Xunta está a realizar na comarca, como o acceso ao Parque Empresarial, ao proxecto dun novo centro educativo para Pazos de Reis.

Máis de 60 días levan en folga os traballadores de IKF España da Guarda, a antiga fábrica das Cachadas. Con Xulio Vicente da CIG coñecemos os motivos deste paro dos traballadores.

O historiador tudense, Suso Vila, pecha hoxe o ciclo de conferencias sobre o 450 aniversario da Batalla de Lepanto falando de “Os corsarios turco-berberiscos nas costas galegas e o seu eco remoto no retablo de Nosa Señora do Rosario de San Domingos de Tui”. Con el falamos esta mañá na nosa sintonía.

A humanización das rúas Antero Rubín e Coengo Valiño será financiada polo programa REACPON da Deputación de Pontevedra. O alcalde, Enrique Cabaleiro, explicaba hoxe en que vai consistir a obra. Tamén daba conta das reunións coa veciñanza que comezaron onte. Hoxe está presente en Santiago en Fair Way a Feira do Camiño de Santiago.

A Banda de Música Popular de Tui celebra o seu 140 aniversario o sábado 27 de novembro, ás 20 h, no Teatro Municipal de Tui. Será un evento moi especial no que interpretarán temas de pop rock de ACDC, Mecano, Europe... como explicaba hoxe o seu director Eloy Carrera. As entradas poden reservarse en enterticket.es

Hoxe no Club de Emprego acompañounos Juana Parada, xerente de ORPAGU, con que falamos da planta que está a construír no Parque Empresarial de Areas, das datas previstas para a súa posta en marcha e das necesidades de persoal. Canda ela estiveron a concelleira de Emprego e Formación, Ana Mª Núñez, e a técnica de Orientación, Alejandra Lago.

Esta fin de semana terá lugar na Adadía do Pelouro Axeito unha sesión de danzaterapia. Laura Llauder, bailarina, coreógrafa e danzaterapeuta, explicaba en qué vai consistir esta sesión que non ten límite de idade, e non é preciso experiencia previa. Será o domingo de 18 a 20h.

Xornada importante hoxe para o San Xerome coa constitucion da Cooperativa FOGARES SANXE, S. Coop. Galega da que forma parte un grupo de 38 persoas con diversidade intelectual e as súas familias. Falabamos esta mañá con Ciano Valcárcel, do San Xerome, deste importante paso.