Middagvervolgverhaal

Die lewe loop nooit regtig soos jy in jou hart hoop dit moet nie. Na dese besef Wingerdsvlei se mense dit meer as ooit. Een mens kan die verloop van sake erg beïnvloed, soos Tillie Visagie gedoen het. Die vraag is: hoe maak die stukkendes reg wat stukkend is? Is dit moontlik?

Pietman Radlof neem ‘n paar groot besluite. Net die tyd sal leer of hy in alle opsigte wys besluit het. Florence Viljoen laat geen steen onaangeroer om die polisie te oortuig dat Sonja Radlof, eerder as Buks Marais, hulle staatsgetuie moet word nie. ‘n Benoude kat maak wilde spronge, en skielik is Buks besig om benoude spronge te maak.

Angie Nagel sal baie speurders in die skadu stel met die presiesheid waarmee sy sake ondersoek. Sy verras sowel Sonja Radlof as Andries Roux met inligting wat sy bymekaar gemaak het.

Die polisieratte knars stadig in werking, en lasbriewe word uitgereik vir die deursoeking van huise en persele. Een ding is seker, Buks Marais sal sorg dat hy nie aan die polisie se verkeerde kant beland nie. Pietman Radlof is nie só gelukkig nie. Andries Roux is gesond genoeg om uit die hospitaal ontslaan te word. Wie gaan haal hom by die hospitaal?

Wat het die noodlottige oggend regtig gebeur toe Michelle op die Maraislandgoed gesterf het? Hoe betrokke was wie, by die weduwee Tillie Visagie? Die bruin koffertjie spook skielik weer by Florence Viljoen.

Buks Marais besef maar alte goed Sergio Frittelli is nie ‘n man van sy woord nie, en hy is in diep moeilikheid. Hy wend hom na Dennis September, en dis wanneer Dennis besef moeilikheid bly hom by al doen hy wat. Glennis de Bruyn kom op interessante dokumente af.

Wingerdsvlei staan opnuut geskok by sy nuwe dam in wording. Dis gou bekend wie die nuwe damsandslagoffer is. Die dorp is verslae. Wie moor so onder die dorp se inwoners? Buks Marais doen ‘n goeie ding. So goed, dat Angie Nagel uitry plaas toe om hom daarvoor te bedank, maar sy is net betyds vir die volgende skok wat Wingerdsvlei soos ‘n bom tref.

Wingerdsvlei word geskud deur ‘n aggressiewe weduwee. Tersia doen ‘n ontdekking wanneer sy die karavaan skoonmaak. Dennis September probeer steeds om Glennis de Bruyn se hart sag te maak. Die deurdringende reën maak egter niks op die dorp maklik nie. En dan volg skokkende nuus…

Dennis September word gevra om “een vir die span te vat”. Hy wik en weeg, maar hy tog “vat hy een vir die span.” Ongelukkig is “Moeilikheid” steeds Dennis se middelnaam. Hierdie keer is dit ook nie anders nie. Dis moeilikheid op groot skaal. Iemand op die dorp is op ‘n skrikwekkende missie.

Florence Viljoen is op ‘n missie. Iemand uit haar werksdae skuld haar ‘n guns, en dit help haar om belangrike inligting te bekom. Sonja en Pietman Radlof kom uiteindelik tot ‘n vergelyk, maar Sonja en Buks Marais moet ook tot die een of ander vergelyk kom. En dis nie so maklik nie.

Die arme Glennis de Bruyn is ontredderd ná die skietery. Florence Viljoen beskou die skietery as ‘n geleentheid wat die noodlot haar bied om te krap waar sy nie voorheen kon krap nie. En krap, kráp sy. Sy kom op baie interessante inligting af, wat ‘n heel nuwe perspektief na vore bring.

Dis asof Andries Roux daarop uit is om verskeie mense verkeerd op te vryf. Dit skep wrywing en gee aanleiding tot meer as een ongelukkige onderonsie. Die weduwee Tillie Visagie se naam duik op, en skep ‘n taamlike gefladder. Die dag eindig met skokkende nuus.

Die drie musketiers hou ‘n reünie. Buks Marais is in die spervuur - eers word hy gekonfronteer oor sy geheime gesprek met Sergio Frittelli. Daarna hoor hy hy huur ‘n wynkelder in Hanepootbult. Dis duidelik, meer as een inwoner van Wingerdsvlei loop soos bloedhonde op sy spoor.

Geraamtes tuimel met reëlmaat uit verskeie kaste. Pietman Radlof word weer eens met ‘n lelike waarheid gekonfronteer. Florence Viljoen voel sy is besig om haar integriteit te verloor. Andries Roux is op ‘n missie van sy eie.

Rossouw se besoek aan Wingerdsvlei vlek vele geheime oop, en sorg vir meer as een verslae gees. Niemand is méér verslae as Florence Viljoen nie. Sy weet nie waar om haar kop in te druk nie. En dis nie asof die ellende oor en verby is nie, nee, dit voel of die ellende van voor af begin. Angie Nagel besluit ferm optrede is nodig.

Dennis September doen sy werk as plaasvoorman. Die wingerd moet vir swamsiekte gespuit word, en daarvoor is plaagdoder nodig. Skielik ontketen die plaagdoder ‘n ligte storm op die Maraislandgoed. Sonja Radlof word in ‘n blik gedruk, en sy wys noodgedwonge haar hand vir Buks Marais. Dít veroorsaak ‘n groter storm as die plaagdoder. Die handskoene word uitgetrek. Dis elkeen vir homself.

Florence Viljoen word tot in haar siel geskud. Sy kan nie glo wat sy hoor nie, maar die nodige dokumentasie staaf die inligting. Sy besluit om daadwerklik op te tree. Sonja Radlof is slim en slinks. Dis soms moeilik om te onderskei of sy besig is om slim of slinks te wees.

Foto’s is goeie getuienis om op die tafel te sit. Rossouw het minstens twee goeie foto’s. En dit vertel ‘n interessante verhaal. Pietman Radlof se ergste nagmerrie word waar.

Rossouw werk deur sy lysie besoeke, en hy maak steeds vyande so ver hy gaan. Die pakkie kokaïen het ‘n lelike nadraai. Te midde van die chaos sluit twee individue van wie dit die minste verwag word, tog ‘n pakt om mekaar te help.

Rossouw is nie op Wingerdsvlei om vriende te maak nie. Hy het gekom vir “unfinished business”. Daarom is hy op die man af en vryf hy meer as een inwoner verkeerd op. In dié proses kom die waarheid oor sekere inwoners se doen en late in die verlede, aan die lig. En dis nie altyd vleiend nie.

Moenie Sonja Radlof verkeerd opvryf nie. Dis of jy die duiwel in haar wakker maak. Dis wat Buks Marais en Pietman Radlof vir die soveelste keer uitvind. Dennis September leer skielik by die beste ‘n les of twee.

Rossouw maak onverwags sy verskyning op Wingerdsvlei, haak sy karavaan en ry dam toe. Weldra vind Wingerdsvlei uit Rossouw is ‘n man met ‘n missie. Dis asof hy die stem geword het wat namens sy ma Rietie Rossouw en haar boesemvriendin, Michelle Marais, sê wat gesê moet word. Dit maak hom spoedig ‘n gehate man.

Florence Viljoen en Angie Nagel besluit om druk op Buks Marais te sit. Hulle beraam ‘n slim plan, maar soms vang slim sy baas. Florence spartel om uit die verknorsing te kom. Angie Nagel word stilweg ‘n bogemiddelde speurder, en sy geniet dit om van tyd tot tyd met verrassende inligting vorendag te kom.

Een van Sonja Radlof se geraamtes val uit die kas, juis wanneer sy dit nie eintlik kan bekostig nie. Dít dwing haar om haar skeisaak te finaliseer, maar dis of jy die duiwel in Sonja wakker maak as jy haar wil dwing om iets te doen. Glennis de Bruyn se afdanking veroorsaak steeds meer as ‘n gefladder. Wie kry slegte nuus?

Die koerant se funksie in die gemeenskapsaal bly opslae maak. Wie ook al Sergio Frittelli nie ernstig opneem nie, maak ‘n ernstige fout. Hy is baie beter op die dorp ingegrawe as wat Florence Viljoen besef. Dennis September glo die man het tot ‘n mafiabaas op die dorp ontwikkel, wat nog groot moeilikheid op Wingerdsvlei gaan veroorsaak. Kort voor lank daag die eerste moeilikheid by Kweek & Koffie...