Hemmi frændi

Guðmundur „Mundi“ Hauksson virðir neysluhyggjuna að vettugi. Hann gaf allar eigur sínar og ferðaðist erlendis til að finna sjálfan sig. Við fáum að heyra sögu Munda og spjöllum um hugleiðslu, jóga og sjökrur.

Þorgerður María Þorbjarnardóttir hefur engan tíma til að gera neitt því hún eyðir honum öllum í að gera eitthvað annað. Hún gaf Hemmunum þó fórnfúslega hluta af degi sínum til að segja þeim frá umhverfismálum nútímans og einhverju fleira skemmtilegu. Í þessum þætti er einhver leikur í gangi þar sem þú þarft að giska á hljóðið. Allt voða spennandi.

Arnar leikaravinur Hauksson kíkir í orkudrykkjasmökkun til Hemmanna. Það er ekkert sérstakt til umræðu í þættinum eins og venjulega en hlustendur ættu að vera búnir að komast að því núna hvað þetta eru allt samhengis- og stefnulausir þættir. Njótið.

Ásrún Mjöll er gestur okkar í allra besta þætti Hemma frænda hingað til. Hún hefur áhuga á klifri, ferðalögum og sjálfbærum lífstíl. Ásrún hefur ferðast einsömul á mótorhjóli þvert yfir Evrópu, sótt tantra námskeið í Noregi og safnar frímerkjum. Áhugaverðari manneskju er vart hægt að finna norðan Alpafjalla.

Þegar heimspekingurinn Gústav Adolf Bergmann Sigurbjörnsson kemur í heimsókn til Hemma frænda veit maður að hlaðvarpið er komið á hærra stig. Gústi ræðir við Hemmana um hvernig skal tækla öll þau vandamál sem plaga íslensku þjóðina sem og önnur mikilvæg málefni.

Double dragon, pabbabrandarar, kampavín opnað með stæl, saumakennsla, Búdapest, björgunarsveitarferð og margt annað æðisgengið er rætt í þættinum. Beðist er velvirðingar á geispi sem kann að heyrast í Hemmunum.

Gestur þáttarins er lífskúnstnerinn Ævar Már Ágústsson sem er búinn að halda titilnum þriðji fyndnasti maður Íslands síðan 2012. Ævar gekkst undir hnífinn í apríl á þessu ári í hjáveituaðgerð í Lettlandi. Síðan þá hefur hann misst um þriðjung af líkamsþyngd sinni en ekki örðu af kímnigáfunni. Ævar segir okkur frá lífi sínu og ferðalögum sem eru mun skemmtilegri en ykkar hlustenda.

Nýju hljóðnemarnir eru loksins tengdir og til að prófa nýju uppsetninguna er rætt björgunarsveitina, vinnuvélablæti, B-12 skort, Costco verslunarferð, ljónapíkur og margt fleira. Leynigestur með sexy rödd hringir óvænt í Hemmana. Þátturinn hljómar eins og silki.

Einar er kominn aftur til landsins með hversdagslegar sögur frá Bandaríkjunum. Bjarni er búinn að kaupa ný föt sem hann gleymdi alfarið að ræða í þættinum. TSA, Jókerinn, Sturgill Simpson, þorsti, þvaglosun í sturtu og Ellen verða rædd í þættinum. Beðist er velvirðingar á seinkomu þáttarins sem er alfarið Einari að kenna.

Á meðan Einar er í Bandaríkjunum hefur Arnar „leikaravinur“ Hauksson leyst hann af hólmi. Arnar fær lítið að koma orðum að í þættinum vegna munnræpu úr Bjarna en þeir ná þó að ræða draumaspuna, Rambo, tyrkneska sjónvarpsþætti, Stewart Lee og heimspekilegar tilvistarpælingar. Restin af þættinum fer í leikina „Arnar giskar“ og „Bjarni! Hvort myndirðu frekar?“ sem voru nánast fundnir upp á staðnum.

Sjúkrahústrúðurinn Bergdís Júlía Jóhannsdóttir er gestur Hemma frænda að þessu sinni. Hún er menntuð í leiklist úr Rose Bruford í Bretlandi og einnig sem leiklistakennari úr Háskóla Íslands. Nýjir hljóðnemar eru á leiðinni og Einar hyggst halda ræðu í Bandaríkjunum. Fjörið endar ekki.

Að þessu sinni fær Hemmi frændi Kristján "Heimsfara" Kristjánsson í heimsókn þar sem meðal annars er rætt ferðalag hans til Norður-Kóreu fyrr á þessu ári. Kristján hefur áhuga á að ferðast til vafasamra landa og kynnast þar menningu og staðháttum og lætur það hljóma eins og það sé minnsta mál. Áhugasamir geta lesið bloggfærslur og séð myndbönd frá ferðalögum Kristjáns í gegnum tíðina á  www.intere...

Í þessum þætti er mikið um taut. Kommentakerfi fjölmiðlanna eru tekin fyrir og er það í raun eina sem er boðið upp á í þessum tuttugasta þætti Hemma frænda. Gæti það verið betra? Já alveg pottþétt.

Eftir gott spjall um daginn, veginn og mannann kemur heljarmennið Aron Friðrik Georgsson í heimsókn til Hemma frænda. Í þessum nær tveggja tíma langa þætti er rætt um lyftingar, mataræði, bifreiðar, bíómyndir og allt þar á milli.

Arnar Hauksson leikaravinur Hemma frænda kemur í heimsókn í seinni hluta hlaðvarpsins og ræðir listir, leik og lífið. Í fyrri hlutanum má heyra opið bréf Hemma frænda til Neytendastofu og ýmislegt annað tuðlegt.

Lykilorð þessa þáttar eru hinsegin dagar, frolf, Tarantino og gönguskór. Einar ropar í þættinum.

Það styttist í jólin greinilega. Einar segir okkur frá ferðalagi sínu efst vinstra megin á landinu og filsan er rædd sem viðskiptahugmynd. Allur seinni helmingur þáttarins fer í að gera grín af athugasemdum fólks í athugasemdakerfum íslenskra fréttamiðla.

Einar sagði að Hemmarnir yrðu að vera aðeins hressari í þættinum, þannig þeir ræddu Chihuahua niðurgang, týndan tónlistarmann frá Danmörku, útihátiðir, Ginnzfest og fylleríssögur. Það gerist ekki hressara en það.

Erfitt er að njörva niður nákvæmlega hvað rætt er í þættinum án þess að telja upp svona 300 mismunandi umræðuefni en fyrir utan tuð og taut kynnir Hemmi nýjan dagskrárlið sem fjallar um að borða mat og spjalla á sama tíma. Að þessu sinni snæddu Hemmarnir KFC máltíð. Varað er við smjatthljóðum í þættinum.

Þrettándi þátturinn byrjar á röfli að venju með smá spúkí ívafi. Gestur þáttarins er Elfar Þór grínisti, hlaðvarpari og kvikmyndaböff. Elfar segir okkur frá lífi sínu í leik og starfi sem hann reynir eftir fremsta megni að lifa með kærleik gagnvart náunganum. Þið getið fundið hlaðvarp Elfars: Endalaus óviska á iTunes, Spotify og Stitcher eða séð það í myndbandsformi á Facebook: www.facebook.com/En...

Hefðbundið smjatt í þessum þætti að viðbættum nýja dagskrárliðnum: falsfréttir. Árni Jóhannsson skjalavörður kíkir í heimsókn og ræðir meðal annars ævintýrin sem gerast á þjóðskjalasafni Íslands. Fjórðungur, hlaðvarp Árna um íslenskan körfubolta, má finna á: https://www.buzzsprout.com/226644/  og twitter nafnið hans er: @arnijo. Í lok þáttarins syngur Einar fyrir okkur With arms wide open með Cree...

Í þessum þætti er hefðbundið vikuspjall og nýji dagskrárliðurinn „Sönn íslensk ástarmál“ er kynntur til leiks. Þá gera Hemmarnir tilraun til að kryfja íslenska ástarlagatexta til að finna út hvað ást er í raun og veru. Í bláendann flytur Bjarni "blint karaoke" á Robbie Williams laginu Angels.

Elías Örn Friðfinnsson kokkur og sprelligosi kemur í heimsókn til Hemma frænda. Hann er að fara af stað með matvagninn Taco Bless í Reykjanesbæ sem er að verða klár í slaginn von bráðar fyrir svanga taco-unnendur.

Bólstruð herðatré, samsæriskenning um einn ástsælasta söngvara þjóðarinnar og þriðji hluti útvarpsleikritsins vinsæla eru á dagskrá Hemma frænda að þessu sinni. Í blálokin fá hlustendur að heyra dubstep útgáfu af Eventyr eftir raftónlistarmanninn Tæknijens ft. SkífuÞeytir SkransX.

Í þjóðhátíðarþætti Hemma frænda er rædd áhugaverð púttferð, þrítugsafmælisgjöf Búffa Pulsu og hvers vegna Íslendingar halda upp á 17. júní. Spurningunni um af hverju nef á hundum eru alltaf blaut er loksins svarað og þátturinn endar með fallegu Karaoke í tilefni dagsins.