Día a Día

O Instituto de Estudos Tudenses vén de publicar o número 7 da revista Castelum Tyde, na que recolle un total de 15 artigos de investigación ao longo de 400 páxinas. Desta publicación falamos hoxe co presidente do IET, Javier Añoveros.

A compañía Traspediante coas bailarinas Marta Alonso Tejada e Paula Quintas e a actriz Carlota Mosquera chega hoxe ao Teatro Municipal de Tui con Nina Ninetter. Un conto iniciático de danza contemporáneo para público familiar. Así nolo contaba Paula Quintas, produtora e bailarina do espectáculo.

Os hoteis de Tui reclaman ao concello unha solución inmediata para evitar en 2022 ter que volver a pagar máis de 8 mil euros pola taxa do lixo. Así o explicaba hoxe Paula Álvarez, do Hotel Cruceiro do Monte.

O Concello de Tui recibirá unha axuda de 100 mil euros do Ministerio de Transportes, Mobilidade e Axenda Urbana para a elaboración de proxectos pilotos de Plans de Accións Local da Axenda Urbana Española. Tui é un dos 4 concellos da provincia que foron seleccionados. O alcalde cualificaba esta resolución de "excelente noticia".

Hoxe coñecemos as demandas e accións que leva a cabo a Plataforma pola Defensa da Sanidade Pública de Tomiño con Conchi Millán e Nandi de Santiago.

Co tudense Moisés Rodríguez, deputado autonómico, repasamos hoxe os investimentos que a Xunta está a realizar na comarca, como o acceso ao Parque Empresarial, ao proxecto dun novo centro educativo para Pazos de Reis.

Máis de 60 días levan en folga os traballadores de IKF España da Guarda, a antiga fábrica das Cachadas. Con Xulio Vicente da CIG coñecemos os motivos deste paro dos traballadores.

O historiador tudense, Suso Vila, pecha hoxe o ciclo de conferencias sobre o 450 aniversario da Batalla de Lepanto falando de “Os corsarios turco-berberiscos nas costas galegas e o seu eco remoto no retablo de Nosa Señora do Rosario de San Domingos de Tui”. Con el falamos esta mañá na nosa sintonía.

A humanización das rúas Antero Rubín e Coengo Valiño será financiada polo programa REACPON da Deputación de Pontevedra. O alcalde, Enrique Cabaleiro, explicaba hoxe en que vai consistir a obra. Tamén daba conta das reunións coa veciñanza que comezaron onte. Hoxe está presente en Santiago en Fair Way a Feira do Camiño de Santiago.

A Banda de Música Popular de Tui celebra o seu 140 aniversario o sábado 27 de novembro, ás 20 h, no Teatro Municipal de Tui. Será un evento moi especial no que interpretarán temas de pop rock de ACDC, Mecano, Europe... como explicaba hoxe o seu director Eloy Carrera. As entradas poden reservarse en enterticket.es

Hoxe no Club de Emprego acompañounos Juana Parada, xerente de ORPAGU, con que falamos da planta que está a construír no Parque Empresarial de Areas, das datas previstas para a súa posta en marcha e das necesidades de persoal. Canda ela estiveron a concelleira de Emprego e Formación, Ana Mª Núñez, e a técnica de Orientación, Alejandra Lago.

Esta fin de semana terá lugar na Adadía do Pelouro Axeito unha sesión de danzaterapia. Laura Llauder, bailarina, coreógrafa e danzaterapeuta, explicaba en qué vai consistir esta sesión que non ten límite de idade, e non é preciso experiencia previa. Será o domingo de 18 a 20h.

Xornada importante hoxe para o San Xerome coa constitucion da Cooperativa FOGARES SANXE, S. Coop. Galega da que forma parte un grupo de 38 persoas con diversidade intelectual e as súas familias. Falabamos esta mañá con Ciano Valcárcel, do San Xerome, deste importante paso.

Dende o Mediterráneo ao Atlántico viaxe Ulises en “O Barco de Ulises” do CDG. Unha obra que fala de emigración e da morriña pola terra. En Tui comeza mañá a xira desta montaxe que percorrerá vinte localidades galegas e portuguesas. Da obra falábanos esta mañá Santiago Cortegoso, autor do texto, e director da obra xunto a Marián Bañobre.

Cubertas as 20 prazas no curso de cogomelos que organiza a Comunidade de montes de Areas este sábado. Así o explicaba Manuel Pereira, presidente da Comunidade de Montes. Trátase da 10ª edición deste curso que levan a cabo.

O Parque Natural do Monte Aloia acollerá esta fin de semana o Trail do Aloia. Será o sábado pola tarde co Aloia Kids Trail que se incorpora este ano coma novidade, e o domingo á mañá co Trail na categoría absoluta. Serafín Martínez é o organizador da proba.

Este domingo celébrase o VI Concurso Pinta Tui con tres categoría de até 11 anos, de 12 a 17 anos, e maiores de 18 anos. José Luís Diéz, organizado do evento, explicaba os obxectivos e características deste certame. Os participantes deberán selar o soporte de 9 a 10 h na Oficina de turismo e terán até ás 18 h para realizar a súa obra.

Amancio Prada ofrecerá ás 20.30 h desta tarde o penúltimo concerto da súa xira "Camiño do meu contento" no Teatro Municipal de Tui. Con el falamos esta mañá deste concerto, pero tamén da súa ampla carreira musical. As entradas están á venda en www.tui.gal.

Últimos de días de matrícula na Escola de Música Municipal de Tui para alumnado dende os 7 anos en clarinete, gaita, frauta travesa, percusión, trompeta e trombón. As persoas interesadas poden contactar en horario de tarde, de 15.30 h a 20 h co 986 60 44 04 ou co 687 22 99 57.

O pavillón do IES San Paio acolle este sábado e domingo a I Feira da Cabaza. O evento, previsto inicialmente no Paseo da Corredoira, cambiou de emprazamento debido á choiva. As concelleiras Sonsoles Vicente e Ana Mª Núñez, xunto a Juan Carlos Boo, detallaron hoxe todo o programa previsto. "A caverna do terror" terá lugar no cárcere vello.

Con "Naialma" o compositor e pianista Alberto Vilas vén de gañar o Premio Martín Codax 2021 na categoría de Música Clásica e Contemporánea. Un galardón que emocionou ao compositor para un traballo que el mesmo definía hoxe na nosa sintonía coma "moi especial".

Este domingo terá lugar a derradeira visita a pozos e regadíos que se celebran ao longo do mes con motivo da I Feira da Cabaza. José Martínez Tato, do club AndaTui, avanzaba qué se poderá ver neste percorrido que sairá ás 10 h do pavillón San Paio

Co alcalde de Tui, Enrique Cabaleiro, completamos hoxe a rolda de conversas para valorar os dous anos transcorridos do actual mandato municipal.

76 fotografías dunha colección de máis de 500 expóñense estes días na Sala Municipal de Exposicións en Tui. Proceden dos fondos do Balneario de Caldelas, e retratan as xentes, as tradicións, as rúas de Caldelas e Tui de hai máis de 100 anos. Ana Rodríguez, xerente do Balneario, contounos a historia desta arquivo fotográfico.

José Ángel Fernández, voceiro do Partido Popular, estivo hoxe na rolda de conversas que estamos a manter cos voceiros dos grupos políticos presentes na corporación para valorar os dous anos transcorridos xa do actual mandato municipal.