Driesestig

Mel Botes gesels oor sy musiekloopbaan en sy Dans in die weerlig-produksie by die Toyota US Woordfees.

Hanlé Hill vertel van die Dylan Lewis-beeldetuin, waar sy toere tussen die bronsbeelde begelei.

Jak de Priester gesels oor sy projekte en die Koppieteefontein-produksie saam met Antoinette Pienaar by vanjaar se Toyota US Woordfees. Antoinette Pienaar gesels land en sand oor Koppieteefontein en die wysheid van Theefontein.

Ingrid Howard vertel vir Martelize Brink en Johan Rademan van haar wedervaringe as eienaar van die Drostdyteater, wat byna 10 jaar oud is.

Anrich Herbst en Xtine vertel hoe hulle hul talente saamgooi op die verhoog en by ander projekte. By die Woordfees is beide te sien in 8 Misses Croon Sing, en Anrich is te sien in Roem: ‘n Musiekverhaal.

Anina Lundie, Kobus Burger en Junior Khumalo praat oor die Proscenium-dramakompetisie en jeugteater waar leerders in aksie gesien kan word.

Miché van Wyk en René Cloete vertel van hulle produksie Suurdeeg. Miché vertel ook hoe sy met Danneline Ramsden werk in Skatkis Vol Stories en die kinderteater, Pampoenpit se groen gevoel.

Lize Beekman gesels oor haar pad met musiek. Sy vertel hoe sy haar eerstens as liedjieskrywer sien, en hoe sy die geleentheid gekry het om haar in ander vorme van kuns uit te druk.

Adri Smit vertel stories van die Vergete Grootpad, en die Bossie Goud-skattejag.

Barbara Joubert praat oor kook met vinkel.

Die negentigs se Tamagotchi-gier is weer hier. Anders as die ou weergawe van die elektroniese troeteldier, hoef die nuwes darem nie te sterf as dit ‘n halfdag sonder aandag is nie.

Haidee Muller-Isaacs het Mina Conradie op Heidelberg raakgeloop. Mina is al jare lank 'n groot RSG-aanhanger. Dis nou sewe jaar na haar kankerstryd, en met Mina gaan dit baie goed. Op Heidelberg is sy bekend vir haar heerlike gebak. Sy vertel vir Haidee van haar dankbaarheid.

Op Oesterbaai, ‘n kusdorpie in die Oos-Kaap, praat die mense van hulle eie Masterchef, Bokkie Lombard, wat, só sê hulle, beter as die bestes kan kook. Mariska Spoormaker het gaan inloer by sy Oester Kaya-gastehuis om self te proe.

Bernice Venter praat oor die rol van DNS-ontleding in siektevoorkoming en -behandeling.

Om pandas aan te hou, is net te duur. Finland stuur ‘n pandapaar agt jaar vroeër terug China toe. Teen een-en-‘n-half-miljoen Euro per jaar, kos dit meer om die twee pandas te onderhou as al die ander diere in die dieretuin saam.

Veteraanomroeper Henk Bierman vier sy 90ste verjaardag op 25 September in Stilbaai. Hy het saam met paar groot uitsaaigeeste gewerk, soos Leon Schuster, Ferdinand Deist, Nic Swanepoel en Fanus Rautenbach. Sy bynaam was “Die Pous”, want hy het baie godsdiensprogramme geskryf en aangebied. Johan Rademan het met hom gesels.

Mo April, Jade Davids en Luciano Goulfarris vertel vir Martelize Brink van die rol wat Ambassadors for the Community speel in die lewe van die jeug van Delft.

Twee New Yorkse tieners is in die knyp nadat hulle ‘n trein gesteel het. Hulle kon net 15 meter ver met dit ry, maar daar is skade waar hulle in iets vasgery het.

Helené van Tonder gesels oor die lewe in Delhi, Indië. Die aanslag tot hofmaak is veral heelwat anders as wat op tuisbodem gebeur.

Haidee Muller-Isaacs gesels met oom Alfred Rademan oor die plaas Dasjesdrift, tussen Heidelberg en Witsand.

Die Strong Nasionale Museum van Speel in New York het ‘n heldesaal vir speelgoed. Vanjaar se 12 finaliste wat vir die heldesaal genomineer is, sluit My Litte Pony in, maar ook stokperde en ballonne.

Kadys Prins gesels oor krokodilboerdery, en waarvoor die verskillende spesies se velle gebruik word.

Jy loop letterlik die beste stories raak, het Mariska Spoormaker agtergekom toe sy op die Chokka Voetslaanroete vir Henry Maarman by die Dune Ridge Country House ontmoet, en hy haar op ‘n padda-safari geneem het.

Prof. Francois Engelbrecht praat oor die impak van osoonverdunning op die weerprosesse.

Jane Malyon van Essex se kersboom staan heel jaar reg, ingeval haar 35 jarige en 40 jarige seuns by die huis opdaag. Daar is altyd ‘n kalkoen in die yskas, en die kerskouse is vol. Sy sê sy besef dis ‘n bietjie eksentriek.