Słuchatko - stawizny, reportaže, informacije ze Serbow (MDR Serbja)

Betina Wenderothowa předstaji serbsku lěkarku na wuměnku dr. Jěwu Bulankowu z Budyšina. 91-lětna bě lětdźesatki dołho ze swojim mandźelskim Benom praksu nawjedowała.

Krosnowarjo njezapołoža runje w zymje přestawku, ale zwučuja husto w halach, zo bychu potom fit byli, hdyž wjedro to zaso dowoli. Satkularjo mějachu młodostneju we wusyłanju, kiž rozprawještaj wo swojich dožiwjenjach.

Queerness, pride, LGBTQ+ tute hesła so přeco zaso w zwisku z zarjadowanjemi kaž CSD mjenuja. Što wone woznamjenjeja a kak zhladuja Serbja, kiž so sami jako queerni identifikuja, na tute temy, zhoniće wot Clemensa Šmita.

SERVI - to je někotrymžkuli zapřijeće na serbskim hudźbnym polu. Pak jako elektroniska hudźbna skupina, pak jako wudawaćel CDjow. Dźěłowa mnohotnosć wučinja serbskich hudźbnikow wokoło Jana Bělka.

Alena Bětnarjec je wukubłana wučerka, kiž zapołoži runje wjacore měsacy přestawku, a je so njedawno na puć podała na dlěšu jězbu po wjacorych krajach. Wo tym je Beno Šołta so z njej rozmołwjał.

Hdyž słyšimy něšto wo Iraku, mamy drje potom zwjetša jako prěnje wójny a terorizm islamskeho stata IS před wočemi. Chiba Mezopotamisku? Rěce Eufrat a Tigris? Abo bibliske stawizny kaž wulku lijeńcu abo Babylonsku wěžu?

Prěni wulki róžk rěka prěni dźeń noweho lěta. Što drje lěto 2026 Serbam přinjese? Monika Gerdesowa drje žanu škleńčanu kulu nima – a tola je móhła tróšku do přichoda hladać - dokelž je sej protyčku do ruki wzała...

Što woznamjenjeja hody poprawom za dźěći, kotrež njemóža pola swojeje swójby žiwe być? Runje wo tym smy z Juliju Cyžowej porěčeli, kiž dźěła w dźěsćowni.

Měrćin Wjenk wěnuje so we WWW-specialu składnostnje 300. wudaća „Wědy, wědomosće a wunamakankow“ zwěrjećemu wědomju.

Wuknjacy programa DOMOJ su swoje certifikaty přijimowali. Syć za serbsku rěč a identitu ZARI zeznał je při tym tež wobdźělnik Marco Di Sarno, kiž docpě schodźenk B2, z 90 procentowymi dypkami.

Lětsa je tomu 125 lět, zo bu Koło serbskich spisowaćelow załožene. Po wjacorych přestawkach a znowawožiwjenjach drje Koło z lěta 2017 wjace njeeksistuje – tola mnozy serbscy spisowaćeljo so dale angažuja.

Hłós je lětuši instrument lěta a smy sej wot logopedowki Wandy Wokoweje, kantora Bosćija Čórlicha a dźiwadźelnicy Boženy Bjaršec powědać dali, što jim hłós woznamjenja a kak móžemy so wo njón starać.

Lětuše adwentne woknješko jedna wo zakuzłanym dźěćetku. Wone je něme a chodźi w adwenće po wsy a ludźi, kiž je zetkaja, žohnuje. Pójće bliže a poskajće, što so tu stawa a čehodla je dźěćetko po wšěm zdaću zakuzłane.

Njedźelniše wusyłanje 16.11.2025: Monika Gerdesowa je so w zwisku ze žarowanjom prašała, kak su so naše kěrchowy změnili a hišće měnjeja, ale tež wašnja chowanja a pohrjebow.

Swětnišćo wobradźa wědomostnikam njeličomne hódančka. W Hornjej Łužicy maja so přichodnje hoberske mnóstwa datow z uniwersuma zběrać, zo by so to a tamne rozjasniło. A stać ma so to přez “Astrocentrum Łužica” abo DZA.

Clemens Šmit předstaji wěriweho muža pochadźaceho z Lipska, kiž je sej serbsku rěč přiswojił, a kiž so mjeztym tež aktiwnje za to sobu zasadźuje, zo su serbske nabožne wobsahi w syći bóle prezentne.

Monika Gerdesowa je čas “złoteje nazymy” za putnisku šćežku wužiwała. A ta wjedźeše ju w Pólskej po “Pomorskej droze swjateho Jakuba”, horjeka w sewjeru, přeco blisko Baltiskemu morju.

Załožba za serbski lud je sobotu w cyrkwi kubłanišća swjateho Bena w Smochćicach Myto Ćišinskeho spožčiła. Lawreat hłowneho myta je Měrćin Weclich. Spěchowanske myto Ćišinskeho dósta Julijan Nyča.

Měrćin Weclich je dóstał sposćene myto Ćišinskeho. Wón wšak je na serbskim kulturnym polu hižo lětdźesatki aktiwny a jeho mjeno najskerje kóždemu zapřijeće. My smy jeho na rozmołwu do studija přeprosyli.

Nazyma je čas žnjow, a wězo tež kermušow a domchowankow. Najwjetšu tajku w sewjernej Němskej, mjenujcy w Hamburgu, je sej Janek Wowčer wobhladał. A što ma domchowanka w Hamburgu nětko ze Serbami činić?

W Lipsku so štwórtk, 9.oktobra, zahaji nowy semester na Instituće za sorabistiku. Studenća Instituta pak su hižo dlěje ze strukturu a kwalitu wukubłanja njespokojom. Monika Gerdesowa aktualny staw zjima.

Ukrainska holčka Olja, kotraž je ze swojej maćerju wójny dla domiznu wopušćić dyrbjała, njenamaka w serbskej swójbje jenož pomoc a hospodu, ale tež přećelku Leńku a k tomu hišće rěčaceho barika...

Srjedu su so swjedźenske jubilejne dny w Delanach zahajili. Tamniša šula swjeći mjenujcy swoje 50-lětne wobstaće. Diana Fryčec-Grimmigowa je zwjazała jubilejny wěnčk, kiž kładźe wam nětko na blido.

Přeco online, stajnje docpějomne – tola što čini social media poprawom z nami? Dźěći, młodostni a tež starši – wšitcy su potrjecheni.

Zašły tydźeń powědach wo swojich dožiwjenjach w Andach w měsće Arequipa. A wzach Was do Amaconasa sobu, do indigeneho sydlišća. Tónraz podamy so mjez druhim tam, hdźež so złoto ze zemje wudobyła.