Middagvervolgverhaal

Hoe is dit moontlik dat Cindy Nel soos 'n gevangene in haar eie huis voel? Wat se 'evidence' krap Sweetness Botes alles uit? Wie se motor is van die pad af die veld in?

Hoekom het Cindy in die hospitaal beland? Wat het regtig gebeur? Wie ontpop skielik as speurder? Wie word aangerand?

Hoe ernstig is klein Amelia Rossouw toestand? 'n Gewigte besluit word geneem. Met watter voorstel kom Morkel Nienaber op Goedbegin aan? Met watter skok begin Seef Visagie se dag?

Hoe verloop die aand by Cindy Nel se hotel? By wie gaan soek Conrad Nienaber troos? Wie daag almal by Cindy se eie pa se paroolverhoor op?

Vriendskappe word flenters geslaan, en hope venyn kom na vore. Soms bedoel iemand om goed te doen, maar dis nie noodwendig die regte ding nie. Hoe desperaat is dr. Dawie Becker om sake met sy dogter, Cindy Nel, uit te praat?

Wie daag almal op vir die Koster-het-talent-program? Wie is die grootste verrassing van die dag? Wat is in die koevert?

Conrad Nienaber kan skielik kies en keur waar hy wil bly, maar almal is nie so ingenome oor sy wye keuse nie. Meer lig word gewerp op die inhoud van Cindy Nel se ma se testament.

Mollie Muller en Martha Sithole word betrek by die Koster-het-talent-program, en Martha ontdek self 'n nuwe talent. Eric Sithole word uit die hospitaal ontslaan. Grace maak 'n voorstel wat 'n paar asems wegslaan.

Dr. Dawie Becker bedink nog 'n blink plan, en voer dit tot op die letter uit, maar iemand breek by sy brandkluis in...

Wie beland in die hospitaal? Seef Visagie besluit dis tyd om die manne vierkantig in die oë te kyk en ernstig bors skoon te maak. Waar word die Dame van die Nag uitgestal?

Skielik, en nie heeltemal onverwags nie, is nege skilderye die fokus van alle gesprekke. Verskeie weergawes sien die lig, terwyl almal probeer om agter die kap van die byl te kom. Die kernvraag is wie het destyds nou eintlik die Dame van die Nag gekoop en hoekom?

Wat presies het gebeur die dag wat Cintaine Becker, Cindy Nel se ma, van die berghang na haar dood geval het? Die skilderye in die Duitser se gastehuis is skielik die fokus van alle belangstelling, en sorg vir groot onmin. Wie verras Mollie Muller op Goedbegin?

Morkel Nienaber het nou maar eenmaal die vermoë om die bordjies te verhang. Conrad Nienaber werk hard aan die uitdaging wat aan hom gestel is. Hoe suksesvol is hy?

'n Brand breek uit, en Seef Visagie en sy span werkers swoeg en sweet. 'n Bedrag van R100,000 is skielik druk onder bespreking. Wie maak aan Conrad Nienaber 'n aanbod, en wat is sy reaksie?

Wie beland in die Heidelberg Hospitaal? Wat het in 1992 op Dundee gebeur? Wat het Amelia Rossouw oorgekom? Wie verras vir Conrad Nienaber?

Henk Rossouw se begrafnis verloop nie soos beplan nie. Die duiwel laat twee mense 'n snaakse ding doen. Sweetness Botes beleef 'n slegte dag. Cindy Nel is hoogs ontsteld.

Dawie Becker wys hy is 'n bedrewe sakeman wat nie maklik tweede kom nie. Daardie een brokkie inligting wat Morkel Nienaber heeltyd soek, val onverwags in sy skoot. Daar is alles behalwe vrede op Vrede.

Dis skielik besiger in Seef Visagie se studeerkamer as by 'n dokter se spreekkamer. Die vonke spat behoorlik op Goedbegin. 'n Verslag in 'n rooi omslag kry voete.

Die skilderye sorg vir groot onmin, en agt van die kunswerke moet skielik 'n nuwe tuiste vind. Hoekom is Cindy Nel so geheimsinnig oor haar biologiese pa? Watter skokontdekking maak Conrad Nienaber?

Die polisie daag op Goedbegin op. Martha Sithole en Mollie Muller moet op hulle voete dink. Seef Visagie is so kwaad, hy kan slange vang.

Die storm wat Seef Visagie voel aankom het, bars opeens fel los met verskeie verrassende skerp kante, wat meer as een betrokkene sprakeloos laat.

Sweetness stap noodgedwonge 'n draai deur gister met al sy seer. Cindy Nel word verras. Seef Visagie gaan 'n vreemde ooreenkoms aan.

Die vonke spat oral. Seef Visagie hoor die een na die ander ding wat hom teen die mure uitdryf en hom kort duskant 'n hartaanval laat omdraai.

Die sewende straatvrou word vermoor. Seef Visagie se hart huil opnuut oor sy skoonseun se doen en late. Dawie Becker is bitter ongelukkig.

Mollie Muller krap waar sy nie veronderstel is om te krap nie, en maak nie vriende in die proses nie. Morkel Nienaber is op die oorlogspad, maar ook op 'n missie.