Middagvervolgverhaal

Sybrand is in só 'n goeie luim toe Annie en Hennie op Boskloof aankom, dat sy begin glo die ontstellende gerugte oor Sybrand se flirtasie met Maggie Langeveld is waar. Hennie droom groot drome oor 'n sorgvrye toekoms.

Nonnie verduidelik aan Sybrand waarom die plaaswerkers Boskloof verlaat en waarom trekarbeiders nie belangstel om by Sybrand te werk nie. Annie hoor skinderstories oor Sybrand wat haar geweldig ontstel.

Sybrand openbaar 'n sagte sy wat Jannewarie nog nooit voorheen opgemerk het nie. Maggie skrik vir 'n verskynsel wat die hele Boskloof op hol het.

Die begrafnisgangers het heelwat negatiewe dinge te sê oor Sybrand en Henning se afwesigheid op sy ma se begrafnis. Annie maak 'n voorstel aan Sybrand, wat hy summier van die hand wys.

Sybrand stel voor hy en Betta gaan kuier by Annie en Hennie om 'n bietjie weg te kom van al die gebeure die afgelope tyd, maar Betta stel nie belang nie. Sybrand en almal op die plaas se lewens word ingrypend en permanent geraak.

'n Ernstige botsing tussen Henning en Sybrand het verreikende gevolge vir almal op Boskloof. Op die koop toe haal Henning hom Maggie se gramskap op die hals.

Henning se toekomsdrome stort in duie. Maggie probeer Henning verlei.

Jaap bewys aan dominee Verster dat hy net so hardkoppig soos sy aartsvyand, Sybrand van Vuuren is. 'n Nuwe, onsekere toekoms begin vir Gert en Maria.

Johanna besef sy sal nooit met Henning kan trou terwyl sy nog onder haar ouers se dak woon nie. Jaap en Mieta het verpletterende nuus vir Johanna. Jaap ontvang onverwags besoek van dominee Verster.

Maria erken teenoor Gert dat sy haar broer nie meer herken nie. Jaap is boos omdat die polisie die ondersoek na sy dam wat byna leeggeloop het, wil laat vaar. Betta laat Sybrand groot skrik.

Gert en Maria is beïndruk met Buks se deeglike handewerk, maar Maria let op dat Maggie afsydig is en nie kom kennismaak nie. Maria maak 'n voorstel aan Sybrand om hulle uit hulle finansiële nood te help.

Buks loop deur onder Maggie se skerp tong. Maria bied aan om namens Gert met Sybrand te gaan praat oor hulle finansiële verknorsing.

Johanna moet haar woorde tel om Mieta in die duister te hou oor haar ontmoeting met Henning. Jannewarie moet bontstaan om Henning se vrae oor die skielike water in Sybrand se waterkuile te ontduik. Johanna wil by Henning weet hoekom Betta so ongelukkig is.

Jaap se gesprek met Mieta oor die goeie hoedanighede van Jannie Kriek word kortgeknip toe hy die water in Sybrand se waterkuile sien blink. Henning en Johanna ontmoet skelm op die plek waar hulle afgespreek het.

Sybrand voer 'n gevaarlike plan in die mou. Jaap en Mieta probeer Johanna se belangstelling in 'n ander kêrel wakker maak.

Henning se gesprek met Betta ontstel hom, en sy negatiewe gevoelens jeens Sybrand word versterk. 'n Besoek aan die dorp lewer vir Henning veel meer op as wat hy verwag het.

Sybrand ontvang 'n brief van Annie wat hom ontstel. Jaap se beheer oor die water op Boskloof dryf Sybrand tot raserny en laat Jannewarie bekommerd.

Sybrand vererg hom bloedig oor vier osse van Jaap wat in sy hawerland wei, en laat hulle skut toe jaag. 'n Besoek van 'n jong man aan Boskloof blyk deel van Sybrand se strategie te wees om sy planne ten uitvoer te bring.

Sybrand maak die wêreld warm vir Andries Nel, die ouderling. Henning se gesprek met Betta laat hom erg onrustig oor haar gesondheid voel.

Sybrand kry besoek van onwelkome gaste. Betta se raad aan Henning oor sy verhouding met Johanna stuit hom teen die bors. Nonnie lewer 'n brief van Johanna af wat Henning geweldig ontstel.

Annie moedig Henning aan om sy verhouding met Johanna voort te sit. Nonnie lewer 'n brief aan Henning af wat hom baie moedeloos laat voel.

Sybrand is onthuts oor die geld-trommeltjie onder Willa se bed wat gesteel is. Die prokureur het sy hande vol met die verdeling van Willa se besittings.

Willa word begrawe, en Sybrand ontmoet die nuwe predikant teësinnig. Annie maak 'n onheilspellende voorspelling.

Nonnie word oorweldig deur Willa se woorde. Jaap en Mieta sit met hulle hande in die hare oor Johanna se gedrag.

Jaap en Mieta kry Johanna voor stok omdat sy besoek aan Boskloof gebring het. Nonnie besef dat Willa baie siek is.