Middagvervolgverhaal

Caleb, Mia en Rikus besluit om Die Poort te verlaat, en saam met Ruby die pad te vat. Misty en Storm besluit dat die drie te veel weet, en nie toegelaat kan word om te gaan nie. Hierna volg ‘n jaagtog deur die gange en grotte van Die Poort.

Mia, Rikus en Caleb beweeg deur die waterpyp om van onder uit Die Poort te kom. Buite tussen die klowe ontmoet hulle vir Ruby, en wat sy te sê het oor Misty en Storm is afgryslik. Storm en Misty hou hulle oog oor Rikus en Caleb, met die hoop dat hulle Ruby sal kan oorval.

Max en Rachel arriveer by Die Poort, en sorg dat hulle van ‘n afstand af kan dophou wat gebeur. Caleb en Rikus moet deur die waterpype gaan om vir Rachel te ontmoet. Mia is besig om vir Storm van Rikus-hulle se plan te vertel.

Max en Rachel maak gereed om Klaarstroom te verlaat. Max besluit om iets te doen wat selfs vir Rachel skok. Misty belowe vir Mia die een ding wat sy meer as enige iets anders wil hê. Al wat sy moet doen, is om haar vriendskap met Rikus en Caleb op te offer.

Misty en Storm is bekommerd oor die besending wat hulle moet aflewer. Misty besluit om vir Mia aan hulle kant te kry deur haar iets aan te bied waarvoor sy nie kan nee sê nie. Caleb en Rikus los ‘n teken vir Ruby dat hulle haar wil ontmoet.

Mia word saam met die ander jonger vrouens weggehou van die res van die gemeenskap. Rikus en Caleb wil uitvind hoekom, en verlaat hulle kamers sonder toestemming. Hulle vind vir Mia en wat sy hulle laat hulle besef dat hierdie Eden meer as net een slang en boom van goed en kwaad het.

Misty en Storm neem vir Mia, Caleb en Rikus in. Die Poort is ‘n Eden in die middel van die Karoo met vrugtebome en kamers met krag en sagte beddens. Dis te wonderlik om waar te wees, en dit gee veral vir Rikus ‘n ongemaklike gevoel op die krop van sy maag. Blykbaar is Ruby, die vrou wat Caleb-hulle soek, iewers naby die mense van Die Poort, maar sy bly self nie meer daar nie. Die groot vraag is ho...

In die Seweweekspoortpas is daar ‘n afdraaipad wat na Die Poort lei. ‘n Klein brug en groot afgrond staan tussen Mia, Caleb en Rikus en hulle bestemming. Nes hulle dink hulle het veiligheid bereik, is daar iemand met ‘n geweer wat vir hulle wag. Sal hulle bakkie deel word van die wrakstukke wat onder in die vallei lê, of sal hulle Die Poort kan binnegaan?

Rikus, Caleb en Mia is oppad na Seweweekspoort, maar eers moet hulle verby Ladismith kom waar ‘n motorfietsbende die dorp oorgeneem het. Rikus waag sy lewe om die ander twee genoeg tyd te gee om weg te kom. Max is nog warm op hulle spoor, en probeer inligting uit die mense van Klaarstroom kry.

Ons helde oorkom die bedreiging van Die Dor-mense. Dis tyd vir hulle om die pad te vat. Daar is iemand belangrik wat hulle kan help, diep in Seweweekspoort. Een van die groep besluit om agter te bly. Max en Rachel is op ons helde se spoor.

Die Dor-mense is besig om Klaarstroom te oorval. Rikus besef hulle sal die grot waar die leier is, moet opblaas. Robbie en Debbie gaan saam met hom, maar die kans dat hulle dit in die grot in sal maak. is skraal. en nog minder dat al drie lewendig uit die grot sal kom. Max en Rachel verlaat Kaapstad met een doel voor oë.

Max en Rachel maak gereed om die pad Karoo toe te vat. Robbie probeer ‘n laaste keer vir Debbie oorreed om saam met hom na Die Hel toe te gaan, maar sy wil niks weet nie. Rikus en Mia maak gereed om die Dor-mense aan te val.

Max vertel vir Rachel dat hulle self agter die terroriste moet aan. Rachel wil nie, maar Max oorreed haar wanneer hy ‘n groot geheim met haar deel. Rikus probeer die mense van Klaarstroom oorreed dat die enigste manier om hulle dorp te red, is as hulle almal saam veg teen die Dor-mense.

Rikus, Mia en Lucia probeer om ‘n ou bakkie aan die gang kry. Dit kan hulle wegkomkans uit Klaarstroom wees. Robbie en Rikus kom agter dat die Dor-mense meer as net die water wil hê. Hulle wil die dorp wil oorneem. Saam probeer hulle vir Debbie oorreed dat hulle almal moet vlug, maar sy weier.

Rikus en Robbie is vasgekeer in ‘n spelonk, wat omring is deur die Dor-mense. Lucia begin beter voel, maar vertel vir Mia dat sy nie meer die krag het om verder te gaan nie. Max maak kontak met Rikus en dreig hom om aan te hou spioneer op die mense rondom hom.

Mia probeer by Debbie uitvind hoekom sy in Klaarstroom wil aanbly, al raak die plek gevaarliker by die dag. Rikus en Robbie vind meer uit oor die Dor-mense en wat aangaan met die waterbron.

Klaarstroom bied veiligheid en rus vir ons helde, maar alles is nie pluis nie. Die waterbron lewer nie meer die water wat dit altyd het nie, en daar is ‘n groter gevaar wat die dorp van buite bedreig. Debbie en Robbie kom voor as goeie mense, maar is hierdie veilige hawe ‘n glashuis?

Rikus, Mia, Lucia en Caleb moet deur Meiringspoort kom, maar met die weermag en polisie orals, is dit ‘n moeiliker taak as wat hulle gedink het. Lucia sukkel om by te hou, en haar geswelde voete is ‘n teken van groter gesondheidsprobleme. Die dorpie, Klaarstroom, is hulle enigste hoop. Sal hulle almal dit maak?

Rikus, Mia en Lucia kruip weg ná die mislukte poging om waterbronne van Staatsveiligheid aan te val. Hulle besef hulle is nie meer veilig in Kaapstad nie. Caleb maak sy verskyning, en saam besluit hulle om te vlug. Die enigste plek waarheen hulle kan gaan, is die geen-toegang-gebied, die Karoo. Max bly warm op hulle spoor.

Die bakleiery by die stasie begin, en Rikus besef gou die weerstandsbeweging besig is om te verloor. Hy probeer vir Mia en Rachel red sodat hulle kan wegkom terwyl hulle nog kan. Maar waarheen? En wat van Caleb? Is hy saam met die ander doodgemaak?

Max en Rachel wag by die stad se beheerkamer vir die trokke met die water om by die stasie aan te kom. Caleb, Mia, Lucia en Rikus lê die besending voor. Hulle besef gou dat daar baie meer van Staatsveiligheid se spesiale magte die besending vergesel as wat hulle gedink het. Maar hulle is te diep in om nou kop uit te trek...

Mia kry die inligting wat Caleb nodig het oor die groot besending water wat op pad is na die treinstasie. Hulle vind uit dat Max Trighardt op hulle spoor is,m en dat sy nooit weer sal kan teruggaan na haar werk toe nie. Caleb en Rikus kom tot ‘n ooreenkoms. Rikus word deel van die weerstandsbeweging. Hulle almal moet regmaak om die groot waterbesending te kaap.

Mia stel vir Lucia aan Caleb voor. Lucia wil ook help met die rewolusie, maar is daar vir haar ‘n plek in die gevaarlike groep? Max sit druk op Rikus om uit te vind wat Caleb se planne is.

Mia besluit om deel te word van Caleb se ondergrondse weerstandsbeweging. Caleb het net een voorwaarde - dat sy haar werk hou. Hoekom? Max se generaal-baas wil resultate hê. Hulle moet van die terroriste begin arresteer. Max en Rachel vind uit dat daar ‘n groot watervrag vervoer gaan word. Sal die weerstandbeweging dit probeer kaap?

Rikus en Caleb ontmoet mekaar. Rikus wil deel word van Caleb se ondergrondse beweging, maar Caleb kan nie so maklik oorreed word nie, tot Rikus vir Caleb iets aanbied waarvoor hy nie kan nee sê nie. Mia en Lucia is op die strand, en soos dit later word, besef Mia dat Lucia nie net daar is om van haar man se as ontslae te raak nie.