社群咧衝啥

「台語開講會」會使生做啥物款？破豆、唱歌、酒嘛 tshāi 幾罐，輕鬆暢樂免驚現場亂，只要肯開喙自然有人佮你講一番；這个活動號做台語Party，主打予你來講了真歡喜，庭漪會講會唱閣會鬥主持，I人嘛免驚無話通好喋；靜態活動無夠氣，熟似了後閣欲行出去，peh山落海攏有人相招做伙去，同時是全程台語來開喙；實體的台語活動會當百百項，總有濟濟有心人，無計較時間佮金錢來相幫，只待眾人做伙歡喜來開講。

【按怎刁持講台語？台語實體社群專題】(一) 想欲練講外國話，都市時行招做伙，逐遍來講無仝的主題，著用彼个語言來掰會； 現今欲練講台語，也有人是真拚勢，無顧下班忝甲強欲死，猶來參加「暗時講台語」； 阿銘是活動主辦，熱心安排無驚難，主題設計多元無制限，勞心勞力到底為哪般？ 社群毋但線頂紡，實體也有濟濟人，台語實體社群鬧烘烘，敢是未來的希望？

繪本作家番麥陳(玉米辰)，畫圖講古無為難，伊畫一隻菜車虎來駛，駛入魔神山兜內；車頂閣載二个囝，一男一女照無影，原來是事故害性命，只賰魂魄綴阿爸行；為救囡仔通復活，著愛魔神珠來換，魔神恐怖欲按怎？伊著講古來盤撋；故事一沿疊一沿，包裝俗諺古人言，圖畫古錐媠閣嫣，來聽劇情怎發展。

一層私人婚姻家內事，變做網路話題通人咧關注，網友看甲心齊挐，決定請戲來共舞；民間動員力量大，幾句罔講煞袂收山，出錢出力舞一下規大攤，成做台南文藝負心運動之鍘美藝術節閣有節目單；這聲各團欲到台南來做戲，有做包公欲斬駙馬陳世美，也有林投姐活捉周阿司，閣通食桌看戲鬥支持；毋過戲欲按怎看有路來？著先對戲文佮站頭有了解，這集𤆬你認捌負心漢反僥的心態，看入戲文佮演員的真才。

社群短影音閃都閃無路，TikTok、小紅書與 Reels 上的中國詞無張無持就侵門踏戶，和出版編輯面對「支語字蟲」都定定變無步。這集節目邀請前衛出版社總編輯鄭清鴻，對網路現象來講起，深談「支語入侵」背後的文化焦慮佮社會心理。面對有意識的語言佮文化洗記持，干焦靠「掠字蟲」抑是自我懷疑，攏無才調共問題排除。節目內底阮有提起，抵抗文化侵略的上好一帖，就是予在地的文化自信佮語言有相接，本土語言顧予在，咱才有底蒂來排解...

《粽邪》系列電影導演廖士涵來矣！這回《粽邪4：坤蒂拉娜》又閣有啥款厲鬼來作祟？七月半上架對對對，咱來聽拍片時的鬼仔古，注意！毋通凊彩回頭……

阿睿是Youtube創作者，歷史傳說講袂煞，中原逐鹿三國英雄膽，東灜戰國到江戶定東京，西方故事無精差，台灣列傳閣較著認真看，影片創作是華語為大，毋過伊是台語過生活，啥款機緣予伊開始注心台語路，育囝過日行上台語途？表演的語言佮日常無仝步，這款精差到底為何故？歷史講予大人聽，故事是囡仔看世界的召鏡，期待日後各種主題，愈來愈濟台語聲。

學慧是央廣粵語主持人兼新聞主播，播香港冊店事件的因果，伊佇播出前踮網路社群寫下心情，講出目前的情形，原來目今的情景，只賰央廣粵語會當用廣東話共事件講分明。一篇短短文章掛影片，佇threads大大湠出去，引起濟濟人的注意，思考言論自由的代誌；學慧是香港正出身，煞自細佮意歌仔戲，來台灣讀冊自然就蹛落去，八年經過欲做台灣的女兒，由伊的角度看香港，八年十年有啥無仝？香港人講袂出喙的是啥貨，香港社會消失的又是佗一...

關心香港冊店事件，咱會使做啥？嶼伴書間的青樺，對冊店佮出版的角度來看，香港的困境到底是按怎，才會出冊毋敢徛本名，只因人在香港會驚惶；冊店人客嘛有對香港來，啥物環境予人客心肝頭會在？經營冊店練就看人的人才，會買冊袂買冊一看心內就知知；閣欲推薦香港創作者的作品予聽友，內底的故事佇香港的冊店已經袂當上，看香港的故事咱嘛會當家己想，咱的未來到底應該生怎樣？

香港冊店賣冊犯國安，店長店員難保全，彼條紅線看袂清，不時磕著政府的神經；台灣獨立冊店的冊架是表示，欲賣啥冊看店長的意志，言論自由對冊的選擇開始，政府袂用得干涉伊；對台灣看香港，精差佇佗位？嶼伴書間的治德講愛去感受伊的空氣，十年前到今，毋是話語變做仝一味，是你連講話都有危機，翻頭看台灣咱家己，閣會當看出咱所面對的考驗，是佗一款新的危險？

2026世足賽已經煞，強權奪冠無意外，翻頭來看咱厝邊隔壁，這回韓國的結果上走縒；輸球袂輸變戰犯，全國罵聲無中斷，總統開喙閣較亂，背後到底啥因端？比賽輸贏無定著，輸球按怎著火燒？石伯開破韓國比賽偌礙虐，才知心態、手路攏無蓋著；翻頭看咱運動部，近期也有火咧燒，李洋部長改革路，毋是平順的坦途，運動改革欲斬病根，病根牽挽費心神，千百協會是原因，按怎做才會得通翻身？這集咱對韓國的失利，來看台灣運動改革怎樣行落去...

頂回石伯(石明謹)下讖語，世足八強點四位，英格蘭佮法國隊，歐洲強權實力媠，阿根廷隊屬南美，摩洛哥隊出北非，四國點了對對對，今日四強也收隊，只賰二隊冠亞軍拚生死；現在正是好時機，翻頭來看2026世足賽的道理，巴西按怎早早來離開？法國對摩洛哥是矛佮盾的對壘？維德角逼得阿根廷贏著無媠氣，今年出名是挪威；七月二十總決賽，比賽怎看才精彩？看球看有理路來，著聽石伯講看覓。

你敢會堪得自己替序大人做「長照」？長期照護雖然一直佇濟濟家庭發生，煞是這十外年來才變做討論的話題，政策的協助、保險的安排雖然攏真要緊，毋過「照顧者」彼款人生卡牢著的烏暗感覺，猶原難以消敨，金枝演社《有佇咧無》對戲劇出發，以囝兒做為照顧者的角度出發，共這个照顧失智老爸的序細所面對的困境搬出來，佇烏暗當中，彼聲「有佇咧無」是疑問、是咒讖，敢也會是出口的光芒？

跤球比賽真激烈，人人看甲齊熱血，攑香綴拜看鬧熱，資深球迷會分別； 比賽暗話有濟濟，華語有咧講詳細，罰球徛佇十二碼，「大腳」是啥怎「解圍」？ 台語敢無通解說？欲補就愛趁機會，那學規則那學話，台語講法共抾回； 專業球評石明謹，世足主題第二期，趣味濟濟智識滇，聽煞球賽看透機。

2026年世足賽已經開始矣！節目上架的時猶咧拍「小組賽」，毋知逐家敢有心肝頭上支持的球隊咧？若是對跤球無蓋熟似，想欲攑香綴拜做一日球迷，敢看會出比賽內底的趣味？這集邀請專業的球評石明謹(左盃)，對這屆世足賽濟濟佮過去無仝的所在講起，來替像亞特這款一日球迷解說其中的鋩角，閣𤆬逐家對遮爾濟球隊內底，揣出可能無才調踢出冠軍，煞有濟濟感動人的故事的國家╱球隊，對一場世足賽，原來會使看著世界史的演變！上落尾左盃閣...

吟遊詩人是啥物？中古世紀唱歌詩，唱出萬項成真理，這聲會出啥代誌？現代劇場結合傳統戲曲，是欲相敆抑是相激？民間活戲來做西方即興劇，閣是囡仔觀眾鬥排設；團長厚寬戲劇教育正出身，做戲反變閣翻新，傳統元素耍出新精神，只是著為難演員加費心；歌仔戲演員好腹內，活戲本底gâu鋪排，紫雲煞講這款做法是挑戰，猶有演員講規氣免排練？！到底是啥物戲遮爾天，聽煞你就知影親子戲閣會使按呢變！ 【演出資訊】 臺北海鷗劇場《吟遊詩...

自細咱聽囡仔歌，定定聽無咧唱啥，毋過長久記心肝，真濟人一聽就會綴咧唱出聲，現代的囡仔歌無平凡，主題風格蓋多元，會唱會跳好耍款，功能濟濟有成範。公視台語台推出第二屆《咱的歌》囡仔歌徵選比賽，這集邀請評審王昭華來破解，毋捌音樂敢有才調投稿來？徵選重視啥題材？這馬已經是AI的時代，若有用著AI敢會使？想袂到昭華老師竟然講……你先莫予我知？！

你敢有看過家長予囡仔家己掰3C看手機？其實美國有研究，比起用看的，予囡仔聽聲音節目，對囡仔有濟濟好處！這集除了分享亞特做囡仔古節目《冊櫥仔頂的膨鼠岫》的種種設計較聽友回應，嘛欲𤆬聽友做伙來了解美國的囡仔聲音節目的相關研究；另外你敢知台灣的囡仔Podcast節目排行前10名是啥人咧？內底敢有台語的節目咧？聽落去就知囉！

「歌仔上青」全國比賽第三屆，少年組冠軍家綺真光彩，伊是宜蘭囡仔出將才，宜蘭是歌仔戲原鄉無凊彩；毋過聽講伊小學時毋但袂曉講台語，甚至毋捌啥貨是歌仔戲，糊里糊塗參加社團去，自此煞心愛著伊。 較早的人有講起，無捨無施囝做戲，爸母按怎改心意，肯予囡仔學歌仔戲？老爺飯無輕可食，想欲學戲往佗行？連紲三屆擂台拚，不負苦心得頭名，名師呵咾會觸舌，台風在在好演技，致詞也是全台語，網路社群引注意；少年囡仔好才情，戲曲...

台灣人蹛踮日本東京按怎講台語？孤身生活心肝敢袂擽絲(ngiau-si)？想欲揣人拗跤運動做瘦氣，這集來講眠床頂的代誌。年蕭月品功夫好離離，對手呵咾甲會觸舌，食喙功夫是歕是欶，佗一个動詞有道理？眠床頂全屈勢，台語動詞按怎來掰會？孟儒的台語生活按怎過？台語同伴按怎揣？佇日本敢誠實會做得台語社群來聚會？線頂通翻譯、實體開講席，台灣人佇東京的台語生活對策！

想欲佇生活中堅持對囡仔講台語，會搪著啥款困難？阿文是按怎起心動念，欲佇華語優勢的生活中，堅持對囡仔講台語？ 阿文的家庭其實是做阿爸的阿文對查某囝「阿妹」講台語，阿母對阿妹講華語，論真講，這个家庭無算是全台語家庭，毋過煞有可能是上濟人做會到的台語文化家庭，這款一跤踏入台語文化箍仔的家庭，需要揣著降低溝通成本、減少耗用傷濟心力佇搜揣台語語詞本身的「協助資源」，欲按怎予這款家庭離台語閣較倚，in 需要啥款支...

掌中戲╱布袋戲除了傳統的忠孝節義，閣會當搬出啥款現代社會的議題？嘉義五洲勝義閣掌中劇團有出名的「親子戲」，予大人囡仔看了攏歡喜，閣結合嘉義在地的傳說佮廟宇，田野調查真拚勢，閣為劇情編新戲，嘉義布袋蚶仔寮的豬母娘娘有廟拜，隔壁的武聖爺又閣按怎來？來聽團長曾嘉民講予你知！

這幾年佇網路社群平台經營台語口座的少年人愈來愈濟，隨人才調佮特色無齊齊，這回請來「阿東的哩哩叩叩」的「阿東」少年家，伊是早早就注心台語議題，2019年就經營台語面冊，伊的特色是真會掠時勢，啥物話題當衝，就會思考台語欲按怎來掰會，同時伊閣佇學校教台語𤆬子弟，做台語教師會搪著啥問題？幾若屆學生看落來，敢有啥款家己的體會？這集來聽阿東講出內底的烏佮白。

由金枝演社孤腳戲《籠子裡的白狐》而起的討論來到第二集，亞特佮小冬講起演出進前佇Podcast宣傳錄音彼日，竟然就是台北發生捷運無差別殺人事件的彼當下，正正對照著這齣戲內底對「人佮野獸之間的關係」的探討，到底人佮獸之間的界線佇佗？一旦超過彼條線，人敢誠實會變做獸？翻頭來講，人佇成長的過程當中，到底是按怎一步一步，行上「成獸之路」？這齣對小冬心中的烏暗面出發，半自傳、親像聊齋故事一般的怪奇古，到底咧暗示社會...

最近拄搬煞孤腳戲《籠子裡的白狐》的「小冬」施冬麟，佇戲中一人趕幾若个角色，有男有女，有人有妖有動物，甚至閣是這齣戲的導演佮編劇，《籠子裡的白狐》佇台北演出了後，得著濟濟的呵咾佮鼓勵，嘛表現著演員佇舞台頂深厚的功力。毋過這齣戲是一齣對「烏暗面」出發的作品，戲文佮演技予人會笑、會驚、會讚嘆，嘛會濟濟對社會現象的剾洗。 這回趁《籠子裡的白狐》準備欲到台中演出，亞特專工邀請小冬來敨心肝liú腸肚，講家己的故事...