RSG Kuns

Ingrid: ‘n Vlam in die sneeu, handel oor die briewewisseling tussen Ingrid Jonker en André P. Brink. Die regisseur, Nadia Beukes, vertel wat die produksie so besonders maak.

Wie hou nie van 'n boeiende speurverhaal nie? Gehore in Kaapstad, en later in Johannesburg, kan hulle verlustig in die ontknoping van 'n egte Agatha Christie-verhaal. Terrance April gesels met Alan Comittie oor BLACK COFFEE.

Kurator Nina Kruger gesels oor La Motte Ateljee se uitstalling, Landmarks, en vertel van die werkswinkels wat daar aangebied word.

The Life & Times of Michael K is tans te sien by die Markteater in Johannesburg. Dit is ‘n verwerking van die gevierde skrywer, JM Coetzee, se boek. Lara Foot het dit vir die verhoog verwerk. Dis vir die eerste keer in 2021 opgevoer by die Baxter in Kaapstad. Destyds het Johan van Lill met Sandra Prinsloo en Andrew Buckland oor die stuk gesels.

Die bestuurshoof van die Suidoosterfees, Jana Hattingh, vertel wat feesgangers vanjaar kan verwag.

Nataniël sluit die KKNK af met die produksie, Duif. Hy vertel vir Christelle Webb-Joubert waaroor dit gaan, en wat gehore kan verwag. Die produksie is ook te sien by die Suidoosterfees.

Die skrywer, vertaler en regisseur Hennie van Greunen vertel vir Sue Pyler-Slabbert van die toneelstuk, Annie+Helen.

Daar is weer ‘n plekspesifieke toneelstuk by vanjaar se KKNK. Skrywer en aktrise Stephanie Hough vertel vir Terrance April van die stuk, Wag!

Liza Grobler, die KKNK 2025 se kurator vir visuele kuns, oor vanjaar se uitstallings onder die tema, Diepe Grond.

Die akteur, skrywer en regisseur, Wessel Pretorius, is by vier produksies by die KKNK betrokke. Hy vertel van Die een wat bly, Kuns en Ont- en Smieg.

Die aktrise, regisseur en vervaardiger, Annie Basson, sterf op Sondag 16 Maart 2025. Regisseur Henry Mylne bring hulde aan haar.

Joburg Ballet debuteer op 28 Maart 2025 met 'n aantal kort werke onder die titel, DREAMSCAPES. Terrance April het met Dane Hurst, bekroonde danser en choreograaf, en Alice le Roux, 'n danser van die geselskap, oor die produksie gesels.

Bekendes in die bedryf bring hulde aan die aktrise en skrywer, Crystal-Donna Roberts, wat op 6 Maart 2025 oorlede is.

Beethoven se Triple Concerto is een van die werke wat 'n tjellis graag sal wil uitvoer. Terrance April gesels met Anmari van der Westhuizen oor 'n uitvoering van dié werk as deel van die JFO se konsert op 20 Maart 2025.

As huldeblyk kan jy luister na ‘n dokumentêr uit 2008, saamgestel deur Margot Luyt.

Die gevierde dramaturg, Athol Fugard, sterf op 8 Maart 2025.

KKNK-feeskunstenaar Henk Serfontein vertel van die drie uitstallings waarby hy betrokke is.

The Incredible Journey of Tinkerbell van Tonder is deur Amanda Strydom geskryf vir die heel eerste KKNK jare gelede. Amanda keer vanjaar terug na die fees met hierdie vertoning.

Kaapstad kry sy eerste houtblaasfees, bestaande uit ‘n kompetisie, meestersklasse en konserte.

Terrance April praat met Tinarie van Wyk-Loots oor die komedie, Moedswil en Muitery, wat te sien is by die KKNK. Die stuk is geskryf deur Ingrid Winterbach.

Dirigent Johann van der Sandt gesels oor die koorprojek, Ja vir die lewe!

Terrance April het onlangs 'n konsert bygewoon waar die tjellis, Bertine van Schoor, en die pianis, Megan-Geoffrey Prins, die gehoor getrakteer het op musiek uit die Ooste. Dit is 'n uitsonderlike program van minder bekende werk, wat 'n visuale prentjie skets oor 'n roete langs die antieke Syroete. Die titel is MUSIC ALONG THE SILK ROUTE.

Petru Wessels is vanjaar te sien by die KKNK in die vertaalde toneelstuk, Die vrou met 27 kinders, wat sy laas in 1996 by die fees gedoen het.

Daar is ‘n nuwe Liewe Heksie-produksie te sien by die KKNK. Margit Meyer-Rödenbeck gesels oor, Liewe Heksie en die Wals.

Bariton William Berger gesels oor sy naam, sy studies en sy loopbaan oorsee. Hy vertel ook van die SHORTS-fees wat aangebied word deur Kaapstad Opera.