Le vecchie storie di nonno Fulcio

An regalo da Milàn la conta de dói fradelét che féa senpre barufa e che i se déa bòte tuti i dì, fin che so mare la à mandà ‘l pi cèn ‘n poc de tenp a Milan, da i parènt. An diàol, an gat e la Providènzia i fa canbiar tut, fintimài da far pensar a ‘n miràcol, conpànch de quei che capité ‘na òlta ai sant. L’è propio ‘na bèla storia che ghe fa tant ben ai tosàt co i lo scólta.

Le primule de Edoardo l’è ‘na storia de quele che ciapa ‘l cor, che fa piànder quei che ha la làgrema pi usada a gnér do qualche òlta de bant (ma nò ‘sto colpo), parché no i se asa ciapàr solche quei che ha l’cor co ‘l pel! An tosatèl co la so maestra: gira tut atorno ‘sti dói, un mèio de queràltra, e a ‘na aventura da paura che l’è ‘ndata a finir ben, par fortuna…

Eco ‘na storia manco pèdo ‘sta òlta! Gnént desgràzie, gnént diàoi o strighe cative o briganti e sassini, ma ‘n brào tosatèl co la testa su le spale e con bòn cor par so mare e par le bestie e con tanta coscienza, no come adèss che no l’è pì creanza e rispèto de i bòni costumi, boiacàn! Ve la conte volentieri ‘sta òlta!

Quante làgreme co se conta e se sènt ‘sta storia qua, porcaccia la miseria! Anca chi che à al cor co ‘l pél al fa i òci lustri… La storiàta la conta de la fin che ‘l à fat ‘n póre tosàt che avéa nome Mansueto, desgrazià in tute le maniere, sìnza pare, sìnza mare, incativì fòra da ogni sentimént. Me gnén da piànder, anca se son vècio e insemenì…

Al regalo pi bel la conta de tré bravi fradèi, Toni Bepi e Nani, un mèio de queràltro, e de so mare Filomena…anca de la caoréta Betina, ma, pi de tut, de la prinzipésa Aura che la stéa con so pare te ‘l castèl de Zumele. L’è ‘na storia che insegna tante robe, prima de tut de èser poc tacàdi a le robe, poc chegabràghe e aver, invéze, an cor grant con tuti, anca co le bestie.

I miràcoi de Fravìto l’è al titolo de ‘na storia che i savéa tuti tanti secoli fa, parché la era cossì balorda e fòra de ogni grazia del Signor che no era nessun che no ‘l avésse mai sentì parlar de ‘sto frate che someiéa a ‘n diàol e de ‘l so muss che avéa nome Leopoldo, an nome che se mét a ‘n cristian, no a ‘na bestia. Ròbe da méterse le man su i cavéi!

La prinzipesa cavalara: che bela storia, propio fata par le tosatéle che ha ancora la testa te le néole, beate lore! Ma la ghe piase anca ai mas’cét, quei pi delicati e dal cor dólz, che ormai i è cossì ciàri… Se vede an pare desperà e ‘na fia tant tacàda come che se ghén vede póche póche ten ‘sti tenpi mati. Tut al finis polìto anca ‘sta òlta, par fortuna.

La croda del Castelìn l’è ‘na storia che fa piànder ‘l cor anca a quei che ‘l lo ha col pel! An póre pare che ‘l patìa come an can par so fìa, bruta e malàda…e po’ dopo, co paréa tut sistemà, capita la desgràzia. Come che ‘l dis al proverbio, “chi che no se contenta del onesto al perde al mànego e po’ anca al zésto”. Ma tut al finìs polìto, par grazia del Signor.

Pùtolo, al tremendo sassìn la fa inpenìr le mudànde solche a sentirla par i primi dói minuti da quant che la fa paura! La cónta de ‘na specie de diàol che stéa do par la Piave secoli fa co i so soci, an brigante pèdo de queràltro, che i copéa do de qua e de là come pan e formai, vèci, fémene e bòce, che i rebéa e i petéa fogo dapartùt. Da méterse le man su i cavéi!

Taresina de i spin la parla de ‘na vècia che giréa qua atórno, da Longaron fintimai do par Mel e Santa Iustina. La avéa senpre su le man an bachét e ‘n maz de fior, anca de spin… La paréa ‘na desgraziàda fora co la testa, ma inveze… Assón par dopo la sorpresa, parché la è massa bèla e la fa piànder, come che ‘l ha fat nono Fulcio co ‘l o ha contàda.

I antenati de i pitori: na storia che fa an cin inpression e paura, ma che la finiss propio polito, da far bater al cor e lagremar i oci, ‘na storia che dovarìa contar le none e le ièie, no i barba o i noni, ma ‘sta òlta ghe toca a nono Fulcio. La conta da ‘ndé che le gnest fora i pitori pi bravi del mondo: proprio da Belùn! E i è pochi quei che ‘l ó sa davéro.

Al vècio rauco la parla de ‘n brigante de quei pèdo che sia mai capità da le bande de Belùn, tant al era sassìn, ladro e farabuto da far paura solche a menzionarlo. Al era picenin, brut come la mort, co la gòba e na canùbia che ghe rivea fintimai sul menton. Ghe fea drio ‘na femenàta sludra, onta e bisonta che spuzéa conpànch de na luia. I è ancora vivi, atenti!

Al diàol, al conte Anibale e Romoleto: una de le pi bèle storie cha àbia mai sentì in vita méa, ‘ndé che ‘l diàol al fa ‘na figura che nessuni i avarìa mai pensà. No se ghe riva a capìr se ‘l è an grant sant, an angelo, o an diàol pi furbo de tutti queiàltri: che sorpresa e che emozión par i tosàt che scolta ‘sta storia vècia, ma pròpio vècia, del Medioevo…

La storia de Gustìn al Zavatìn la conta de ‘n scarpèr che féa sia dàlmede che galòze, ma anca scarpét e zavàte; quele che ghe gnéa fora meio, eco parché Zavatìn. I ghe avea fat ‘n scherzo brut (Nani, Ji’io e Meno), alora lu al ghe à rendést pan par fugàza e ‘l é deventà al pi siór de tuta la Val de Belùn. Storia pi unica che rara, bèla e po’ basta!

Al trono del re l’è ‘na storia che conta cossa che l’è capità an re de la Calabria tanti secoli fa. ‘L ó à sentida contar dai veci a Barba Rino co ‘l è stat a laorar tel ’63 su l’autostada Salerno-Rèio Calabria. La morale l’é ‘sta qua: quei che comanda e che vive te i palaz, i castei, le vile, no i sa gnént de la vita, de la natura e del mondo: meio che i vae in campagna!

Al eremita de la val de Canzói. An frate de Vedana an bel dì al se à stufà de star in convento de bant e alora ‘l è ‘ndat a star su i Piani Eterni, sora la val de Canzói, a far ‘l eremita. An dì l’è ‘ndat a catarlo an on che ‘l avea avù ‘na carga de desgrazie: l’è sucess an bel miracol che anca adèss tuti i veci i se pensa…

Al re solitario la è ‘na storia anbientàda do par la Calabria, sentida da Barba Rino co ‘l era ‘ndat a far su i pilói de l’autostrada Salerno-Rèio Calabria tel 1963. La conta de ‘re che oléa veder entro te ‘l cor de la iente e che, dopo, ten ‘sta maniera, al àcapì che ‘l mondo al è conpanch de ‘l inferno e alora ‘l se à mes a far solche del ben.

La storia dele dódese verità la conta de ‘na fameiéta polito che stea su par al Cadore. Al òn al avea nome Benedeto, ma i ghe ciamén Betin, bon come al pan. Co ghe à tocà ‘ndar a catar fortuna, al à incontrà al diàol e i à fat  an afar…La è gnesta fora propio bela, parché, ala fin, al diàol ghe à tocà scanpar co la coda bassa, avilì come ‘n porzèl.

Al sass del diàol l’è na storia vera, capitada propio qua a Belun tanti secoli fa, co comandea an famoso vescovo, an bon on che fea del ben a tuti, siori e poareti, veci e doveni, maladi e sani: era propio an galantomo! Vivea qua anca an diaolàt cativo che ‘l avea su a morte con vescovo e i se dea senpre an sac de legnade… ma la è finida ben!

La fémena del diàol : propio ‘na bela storia, ‘ndé che ‘l diàol al lo à ciapàda in pieno sui dent, e senpre da ‘na femena che la è deventàda tant pi furba de lu che ‘l credèa de far tant al galét. La è sucessa méda qua atorno de Belun e mèda do par le basse, a Seravàl, prima de Vittorio Veneto (che ‘na olta al avea nome Zèneda).

La maledizion dei nanet, ‘na fazenda propio trista, che assa al saor da sacolet te la gola, anca an zerto magon. Se vede la cativeria de la iente, se capis che ‘l diàol al è senpre pronto a ciapar le anime, anca se, ogni tant, salta fora la bontà e ‘l sacrifizio, specialmente da zerte sante femene. Se capis anca come che se vivea in quei tenpi duri, de miseria.

Al sfortunà fiol del re l’è ‘na storia piena de dolceze, de sentimento, con doi tosat che se inamora, ma la è trista, la fa gner ‘l magon, parché la finis propio malamente e, co se la à sentida, toca ‘ndar tel let col grop te ‘l col. Anca ‘sta storia la insegna che la vita la è dura e che toca tirar avanti meio che se pol.

Al fabro de Borgo Pra l’è ‘na aventura bela, capitada proprio qua atorno a Belun zinque-sie zento ani fa, co comandea ancora i veneziani. A l’è senpre in mez ‘na femenata bela, ma cativa come la peste, capriziosa fin tel oss. L’è anca dei bravi e boni tosatei che, spes e volentieri, i è meio dei grandi. La storia la fenis polito.

La fontanéta de le montagne del sol la conta ‘na bela aventura tocada ai tosatei che i ‘ndea a cior su fragole (o iàsene e fonghi - no me pense pi -) entro par le val, in fondo al Mis, ‘nde che l’è le montagne del sol. Salta fora senpre ‘na fata bona che la se ció a cor ‘sti pupi desgraziadi e la ghe asa qualcossa de bel che ghe fa ben a tuta la iente.

Al piegorèr Prieto la conta in che maniera l’è nasest al nome de la montagna sora Belun, quela pi alta de tute, che adess i ghe ciama Schiara; inveze al so nome vero a l’è Prieta, par ricordar al piegorér ch ‘l avea also rosc de fede propio la atorno, anche se ‘l girea an s’ciant dapartut, do par le nostre val, anca sot al Visentin. ‘Na bela storia…