RSG Kuns

Terrance April gesels met Kevin Kraak, die musiekregisseur van Chicago, wat tans in Johannesburg te sien is.

THE WORLD OF THE MARIMBA AND BEYOND is ’n konsert wat Magdalena de Vries aanbied. Sy gesels oor die program, asook die ander instrument waarop sy speel, die snaartrom.

Die pianis, prof. Nicol Viljoen, vertel van sy loopbaan, en ’n konsert wat hy aanbied, FROM CLASSICS TO JAZZ.

Animeerder en kunstenaar Diek Grobler bied ’n lesing aan by die Kunsvereniging van Pretoria. Hy praat oor die “pin screen” en hoe dit gebruik word om te animeer.

Terrance April gesels met Dirk Badenhorst, Mzansi Ballet se bestuurshoof, en die sanger Logan James, oor die ballet, PRIVATE PRESLEY.

Sue Dieperveen vertel vir Christelle Webb-Joubert van haar nuwe eenvrou-komedie, MS. B-HAVED, wat gaan oor uitdagings in die onderwys.

Terrance April gesels met Pieter de Vos van Foxwood House oor hulle teaterfees wat op 24 Oktober 2025 begin.

Christelle Webb-Joubert het tydens die Woordfees by vier kunstenaars se ateljees ’n draai gaan maak. Sy het gaan kuier by Mona Haumann, Izette Roos, Katie Farringer en Zonia Scheffer.

Regisseur Nico Scheepers vertel van die produksie, EK IS NIE DANIE, by die Woordfees. Dit is ‘n woordkunsproduksie soos nog nooit tevore.

DIE SIEL VAN EUGENE MARAIS is ’n Woordfees-produksie uit die pen van Amanda Bothma. Sy vertel meer van die stuk, waarvan sy ook die regie behartig.

Regisseur en beligtingsontwerper Wolf Britz vertel van die twee produksies waarby hy by die Woordfees betrokke is - HUIS VAN SAND en LIEFDE, LAFRAS.

KOFFIEKAN, is ’n produksie by die Woordfees waarin Bach se Koffiekantate gehoor kan word, asook ’n klomp Afrikaanse liedjies waarin koffie voorkom. Vervaardiger en violis Johanna Roos vertel meer.

Lynthia Julies het in 2024 die tragiese gebeure van KINDERLÊ, 'n dorpie in die Noord-Kaap, in haar roman uitgebeeld. Lee-Ann van Rooi het die boek verwerk vir die verhoog. Sy gesels met Terrance April oor die verhaal, asook die uitdagings wat sy as regisseur aangedurf het.

Terrance April gesels met Willem Vogel van Salon Musiek oor die produksie, GABRIEL’S OBOE, wat te sien is by die Woordfees.

Breyten Breytenbach se BOKLIED het jare gelede groot opspraak verwek. Dit is vanjaar weer te sien by die Woordfees. Christelle Webb-Joubert gesels met die regisseur, Marthinus Basson, wat destyds ook die regisseur was.

Christelle Webb-Joubert gesels met Herschelle Benjamin, skrywer van die toneelstuk, JOSHLIN: MEER AS ‘N NAAM, wat te sien is by die Woordfees.

Die tweede RSG Radiodrama-seisoen van 2025 begin 2 Oktober 2025. Estel de Beer, senior vervaardiger en regisseur: mandaat, drama en opvoedkunde, gesels oor die seisoen se hoogtepunte.

Je-ani Swiegelaar vertel van haar eenvrouvertoning, Vier seisoene kind, wat by Aardklop debuteer.

Christelle Webb-Joubert besoek die Pretoria Kunsmuseum. Sy stap saam met kunstenaar Minè Kleynhans deur haar solo-uitstalling. Sy is 2024 se wenner van die Sasol Nuwe Handtekeninge Kunskompetisie.

Terrance April besoek Joburg Ballet. Danè Hurst, artistieke direkteur, en die bestuurshoof, Elroy Fillis-Bell, vertel van hulle lenteseisoen van dans.

Die wenners van die tweejaarlikse Portrait Awards is op 29 Augustus aangekondig. Christelle Webb-Joubert gesels met die wenner, Malik Mani, en met dr. Dineke Orton, een van die beoordelaars.

Christelle Webb-Joubert het die toekenningsgeleentheid van die jaarlikse Sasol Nuwe Handtekeninge-kompetisie by die Pretoria Kunsmuseum bygewoon, waar sy met die onderskeie wenners gesels het.

Marie Vogts van Figure of 8 Dance Theatre vertel van al die produksies waarby hulle betrokke is by vanjaar se Aardklop-kunstefees en die Woordfees. Een van die produksies is WINGS OF LIGHT: DANCE OF AN ANGEL, met musiek gekomponeer deur Mauritz Lotz.

Christelle Webb-Joubert maak ‘n draai by Pierneefskraal in Pretoria. Mede-eienaar Chris de Beer gesels oor die plek waar Pierneef eens gewoon en werk het.

Sanger en kunstenaar Lize Beekman vertel hoe sy per ongeluk ingeskryf het vir die International Wildlife Artist of the Year-kompetisie. Sy is gekies as een van die finaliste. Sy gesels ook oor Melkbos Ateljee 2025.