Eih Elli Beye7sal Dah - إيه اللي بيحصل ده؟

بنقصد إيه بالأمن الغذائي؟ وإزاي سياسات الدعم بتأثر عليه؟ وإزاي تطورت سياسات الدعم الحكومي في ملف الغذاء في مصر من عصر مبارك وحتى عصرنا الحالي؟ كل ده وأكتر بنناقشه مع ضيفنا الشاطر والملهم، د. أحمد حرارة، وبنختم بيها موسمنا الثاني.

ايه اللي بيقولهولنا تاريخ المعادي عنها وعن الطرق اللي بتقام بيها أحياء بعينها؟ إزاي نشأة الحي مرتبطة بالفكر الاستعماري؟ ليه بتتم محاربة وجود التكاتك (نوع من وسائل المواصلات الصغيرة في الحجم وضمن الأرخص سعراً) هناك وده بيعكس إيه؟ كل ده وأكتر بنناقشه مع دعاء قداح في الحلقة قبل الأخيرة من الموسم التاني.

سمعت حلقتنا مع خضر ونس وكان لسه عندك أسئلة؟ في اللايف ده بنرد على أسئلة المستمعين على الحلقة الرابعة من الموسم الثاني عن الاقتصاد السلوكي مع خضر ونس، مع كثير من الأمثلة والمفارقات الممتعة.

الضرايب واجب مفروض على كل الشعوب في غالبية الأنظمة الاقتصادية من زمان جداً. غالباً ما بنناقش الضرايب من خلال أسئلة زي "بقت نسبتها قد إيه ؟ إيه شكل النظام ؟"الضريبي؟ الناس بتتهرب منها ليه؟ وإيه عقوبات التهرب أو التزوير في الحلقة دي، بنطرح سؤال "إيه اللي ممكن يحفز الناس إنها تدفع ضرايبها؟" واللي بيجاوب لنا عليه خضر ونس، من خلال بحثه اللي بيركز على الاقتصاد السلوكي وارتباطه بدوافع الأشخاص للقيام بفعل...

.مريم ماجد مشغولة بجدوى العمل التنموي وخاصة المتعلق بالإقصاء المجتمعي اللي بيحصل لفئات بعينها ولأسباب مختلفة. في رحلتها البحثية، قررت مريم إن رسالة الماجستير بتاعتها تغطي دور مؤسسات المجتمع المدني في مصر في الحد من الإقصاء الاجتماعي اللي بيتعرض له الأطفال في ظروف الشارع. .طب يعني أصلاً أطفال في ظروف الشارع؟ وإيه الإقصاء ده؟ و مريم توصلت لإيه؟ بنناقش ده وأكتر في حلقتنا!

حديثنا النهاردة مع صامولي شيلكة صامولي شيلكه عالم الأنثروبولوجيا الاجتماعية والثقافية، اتولد في هلسنكي في فنلندا وعاش في هولندا ومصر وألمانيا. حصل على الدكتوراه من جامعة أمستردام في هولندا سنة 2006، ومن 2009 بيشتغل في مركز الشرق المعاصر ZMO في برلين في ألمانيا. اتنشرت له كتب ومقالات بالإنجليزية والعربية عن احتفالات الموالد في مصر، والطموح والإحباط عند الشباب المصري، والكتابة الأدبية في الإسكندرية،...

هل وصلنا لتعريف موحَّد للفن الإسلامي؟ تفتكروا شهيرة هتقسّم متحف إزاي؟ إزاي نعرف لو الشعوب متصلة بالفنون والعمارة الإسلامية وبتتفاعل معاها ولا شايفاها حاجة جامدة فولكلورية عفى عليها الزمن؟ ناقشنا أسئلتكم دي وغيرها مع شهيرة يتيم، ضيفة حلقتنا الأولى من الموسم التاني، ومستنيين تعليقاتكم!

في حلقة النهاردة هانتكلم على حاجات مختلفة كلها ليها علاقة بالفن الإسلامي. بنفهم اكتر اهمية السياق التاريخي والاجتماعي في الكلام عن الفن الإسلاميز بنفهم علاقة علاء الدين واستجرامية المساجد المبهرجة و بنغوض غوص سريع في تاريخ الفن الإسلامي. تعالوا معانا نكتشف هذا العالم في اول حلقات الموسم التاني من إيه اللي بيحصل ده!

في الحلقة دي إيه اللي بيحصل ده بنتكلم على ازاي الجواز والطلاق بيأثر على سوق العقارات.بنتطرق لموضوعات تانية زي الاعلام ودوره التنويري في تبسيط قانون الشقة من حق الزوج بالإضافة لتساؤلات عديدة ليها علاقة بعالم التخطيط العمراني. ضيفتنا في حلقة اليوم هي د. منة الله هنداوي الأستاذ المساعد في قسم التخطيط العمراني بجامعة عين شمس

ليه هانتكلم على إقليم كاتالوني واحنا في العالم العربي، يعني يفرقلنا ايه ياترى يا هل ترى؟حلقة الاسبوع ده هاتتكلم بالأساس على الكورة والسياسة وبالأخص على الحركات الإنفصالية في اسبانيا ودور النوادي الرياضية. حلقة اليوم جيالكم برعاية أكاونتel.rewaya_ على انستاجرام و إيمان دمرداش

لطالما تغنى الشعراء بالسمار والبياض وعملوا معسكرين مختلفين في تقييم جمالهم طبقًا للون البشرة. اترجم ده لبعض ممارسات الاستبعاد الاجتماعي و التنمر. انهاردة قررنا نتعمق اكتر في هذا الحوار مع إسلام صبري عشان نفهم اللونية ازاي أثرت على تصرفات المجتمع وتقييمه للأفراد بناءًا على لون البشرة.

ولسة مكملين معاكم ومع حبيبة الزيني و قصة التراب المصري وعلاقتها بالذكورية. في الحلقة دي بنتكلم على السمات اللي حبيبة قدرت تلاقيها مشتركة ما بين أغاني ويجز ومروان بابلو بالأخص. في نهاية الحلقة حبيبة بتشارك معانا النتايج البحثية بتاعتها وهل ساحة التراب بتبين ذكورية هشة ولا ذكورية مهيمنة.

في ساحة التراب المصري, مغنيين متنوعين اتضح انهم بيلفوا ويدوروا حولين مواضيع واحدة. حلقة انهاردة بنستضيف فيها حبيبة الزيني اللي هاتكلمنا على رسالة الماجيستير بتاعتها الخاصة بساحة التراب المصري وخاصة الفنانين ويجز ومروان بابلو والذكورية الهشة والمهيمنة

ما بين التحولات الديمقراطية المختلفة بعد الربيع العربي, أكتر بلد كانت العين عليها هي تونس لما كان فيها تحول ديمقراطي تقدمي في البلاد. طيب ايه اللي حصل فجأة؟ في الحلقة دي بتكلمنا بسنت عامر عن رسالة الماجيستير بتاعتها لسنة 2022 و فيها كتبت عن التحول الديمقراطي في تونس وما حدث بعد تولي قيس سعيد. تعالوا نشوف سوا التحول الديمقراطي في تونس وايه اللي بيحصل ده.

أهلا وسهلا والف مرحب بكل مستمع ومستمعة قادتهم الظروف والأقدار انهم يعدوا على هذا البودكاست الجديد. بما انكم هنا، ماتيجوا نحكي لكم حكايتنا ؟ احنا ٣ صحاب اتعرفنا واحنا بندرس علوم سياسية في جامعة القاهرة وبعدين كل واحدة فينا الحياة خدتها لسكة غير التانية، بس فضل جوانا اهتمام بالعلوم الاجتماعية ورغبة في فهم العالم حوالينا بشكل متعمق شوية. بعد سنين من التخرج قلنا ليه منرجعش نتكلم في المواضيع اللي بتشدن...