Driesestig

Die NG Kerk op De Hoop was eens op 'n tyd die middelpunt van die landbougemeenskap sowat 14 km wes van Oudtshoorn. Omdat die gemeenskap mettertyd gekwyn het, en daarmee saam die gemeente, is dit later by die gemeente Oudtshoorn-Park ingelyf. Haidee Muller-Isaacs het daar gaan inloer.

Piet Coetzer en prof. Doreen Atkinson vertel vir Martelize Brink van die Vergete Hoofweg van 1000 km, vanaf Ceres en Tulbagh tot by Kuruman. Piet is besig om oor twee weke ‘n deel van die roete met sy perdekar af te lê.

Ilse du Toit gesels met Martelize Brink oor die potketel, en hoe brandewyn gemaak word.

Die Lubbe-broers van Carnavon kon sweis voor hulle vas kon skryf, vertel hulle vir Haidee Muller-Isaacs. Die broers het eers elkeen 'n draai oorsee gaan maak, en toe kom nesskop op Oudtshoorn, waar hulle hulle oupa Roy se liefde vir ysters laat voortleef. Haidee het het by hulle gaan inloer.

Elizma Oosthuizen vertel vir Martelize Brink van die Bobbies Veerpyltjieklub op Potchefstroom, en die gestremde span van die Amelia Nasorgsentrum se kampioenskappe.

Dianne du Toit Albertze vertel vir Johan Rademan en Martelize Brink van Gayle, ‘n gaykodetaal of sosiolek.

Elrie de Beer van First Care Wildfire Support verduidelik hoe hulle in gemeenskappe hand bysit, selfs wanneer daar nie 'n brand is nie.

Colleen Brocker praat oor die uitwerking wat naskoolse programme op die jeug se geestesgesondheid het.

Esther van Niekerk vertel vir Johan Rademan en Martelize Brink oor haar betrokkenheid by bemarking toe Radio Suid-Afrika herposisioneer is tot Afrikaans Stereo, en die oorgang na Radio Sonder Grense - nou RSG.

Namakwaland is die tuiste van die wêreld se kleinste skilpad, die Namakwa-spikkelpadloper. Daar is ook ‘n verskeidenheid van besondesre reptiele. Die omgewing is ‘n navorser se droom, en van die spesies is nog nie beskryf nie. ‘n Navorser wat langer as 40 jaar tussen die berge en klipkoppe van Namakwaland beweeg, is besig om ‘n navorsingsentrum daar te vestig.

Pieter Coetzer vertel vir Johan Rademan en Martelize Brink van die opleiding van bemanning in die kommersiële seevaartbedryf.

Johannes Haarhof vertel vir Johan Rademan en Martelize Brink van die spoorlyn tussen Gauteng en Maputo, wat as die Oosterlyn tussen Pretoria en Lourenco Marques gebou is.

Devan Kruger het al die Epic en Trans-Alpe per fiets aangepak. Hy en sy gesin woon buite Charlotte in die VSA, en hy vertel aan Johan Rademan in Beiere, hoe hy letterlik deur 'n dobbelspel daar beland het.

Celri Olley vertel vir Johan Rademan en Martelize Brink van ekofobie onder jong kinders.

Veearts dr. Ingrid de Wet gesels met Martelize Brink oor mediese versekering vir troeteldiere.

Die Shamwari-wildreservaat buite Gqeberha is 30 jaar oud. Die man aan die stuur van sake is Joe Cloete. Hy het 30 jaar gelede op hierdie wildsplaas begin werk as toergids. Hy vertel vir Haidee Muller-Isaacs van sy drome vir die behoeftige gemeenskap rondom die reservaat, en hoe hy wil help met werkskepping.

Wiskundewonderkind Stiaan Scheepers vertel vir Martelize Brink van die soort wiskunde wat hy doen, waarin hy brons gewen het by die Junior Wêreld Hoofrekenekampioenskap in Duitsland.

Prof. Karin Jacobs vertel vir Johan Rademan en Martelize Brink van mikrobe, die grondmikrobioom en die rol van regeneratiewe landbou.

Die Bottomless Coffee Band gesels met Johan Rademan en Martelize Brink oor hulle musiekreis en kondig hul naamsverandering na RAAF toe aan.

Elise Bishop gesels met Johan Rademan en Martelize Brink oor haar ervaring as een van die eerste Suid-Afrikaners wat ‘n seksuele hertoewysingsoperasie ondergaan het. Sy vertel die verhaal in haar boek, Twee Lewens.

Mathys Roets gesels met Johan Rademan en Martelize Brink oor die raakpunte wat hy met Theuns Jordaan se musiek het. Hy is deel van Die Theuns Jordaan Liedjieboek-vertoning by die Toyota US Woordfees.

Joani Groenewald en Maryke van Velden gesels met Johan Rademan en Martelize Brink oor die Stadige Intimiteit-uitstalling in drie lokale by die Toyota US Woordfees.

Carolina van der Westhuizen, Michelle Robertson en Drikus du Toit vertel vir Johan Rademan hoe hulle hulle redenaarsvermoë gebruik vir outismebewusmaking. Michelle en Drikus is leerders aan Hoërskool Merensky in Tzaneen. Carolina is die eienaar van Podiumpret, ‘n opleidingskompetisie.

By die Born Free-bewaringsorganisasie op die Shamwari-wildreservaat in die Oos-Kaap, hoor Haidee Muller-Isaacs meer van gewese sirkusleeus se nuwe tuiste. Een van die medestigters van Born Free is die Britse aktrise, Virginia McKenna, wat in die gelyknamige fliek verskyn het.

Bennie Howard gesels oor sy dae agter die mikrofoon, as deel van RSG se 85 jaar van Afrikaanse radio-vieringe. Hy was onder andere daar toe Monitor begin het.