Driesestig

In Colorado in die VSA is voorvalle algemeen waar mense gom in hulle oë gooi. Die gom vir naels en wimpers se verpakking lyk baie soos dié van oogdruppels.

Peter West gesels oor sy 13 de Outeniqa Chair Challenge, waar hy die 42,2 km met sy handfiets aanpak.

Die verhaal van Sister Ethel wat in 1987 uit Ierland na die Baai gekom en die Missionvale Sorgsentrum begin het, is een van volhoubare bystand aan mense in nood. Selfs vier jaar na haar afsterwe gaan die sorgsentrum van krag tot krag, en deesdae praat die mense van Missionvale se opvolg-engel, suster Annie van der Merwe. Mariska Spoormaker het haar by die sentrum gaan opsoek.

Dieetkundige Valpré Huisamen praat oor antioksidante.

In Switserland is daar deesdae doktersvoorskrifte om ‘n museum, kunsgalery of ‘n tuin te besoek.

Sy doen haar ding ewe goed op die verhoog, voor en agter die TV-kameras, en agter 'n taxi se stuurwiel! En sy is mede-eienaar van haar familie se taxibesigheid. Leatitia Solomons het 'n nuwe TV-program vervaardig, wat sy ook gaan aanbied, waar sy die inspirasiestories van ander vertel. Haidee Muller-Isaacs het haar op Somerset-Wes raakgeloop.

Dr. Francois Lategan vertel van die lewe in Brno, en die geskiedenis van die Tsjeggiese Republiek.

Tinarie van Wyk-Loots vertel vir Martelize Brink van haar deelname aan vanjaar se KKNK. Sy is regisseur vir die debuut van Ingrid Winterbach se MOEDSWIL EN MUITERY, asook ’N BEGIN met die akteurspaar Cintaine Schutte en Carel Nel. Sy is ook op die verhoog te sien in Marianne Thamm se SONDE MET DIE SPOKE.

Shirley en Nicodemus Olivier gesels oor Nicodemus se ``ligte" obsessie met museums, en hoe hy uiteindelik vir haar ook aangesteek het. Shirley en hulle seun, Nicodemus jnr, is pas deur Nicodemus snr bederf met 'n museumtrippie na Pretoria. Daar het Shirley vir die heel eerste keer die Voortrekkermonument gesien, en 'n draai gegooi by Paul Kruger se huis. Sy was erg emosioneel, en absoluut gefassin...

London se Top Secret komedieklub het ‘n verbod op botox geplaas. Komediante sukkel om die gehoor te lees as die gesigte nie emosie kan wys nie. Nou moet jy bewys jou gesig kan beweeg voordat jy toegang tot die vertonings kry.

Was dit nie dat diefstal tydens die grendelperiode gemaak het dat hy sy onderneming gesluit het nie, sou Hannes Geyer seker nooit by kaasmaak uitgekom het nie. En deesdae praat die mense sommer van Hannes Haloumi, omdat sy haloumi verby lekker is, soos Mariska Spoormaker agtergekom het toe sy gaan proe het.

Elke Brink van PSG Wealth R21 op Stellenbosch praat oor risikodekking. Hoe beskerm jy jouself en jou naastes?

‘n Kanadese brouery het ‘n presidensiële pak bier bekendgestel met 1,461 blikkies bier in. Dit is een blikkie per dag vir die res van president Donald Trump se termyn.

Margit Meyer-Rödenbeck en Kerscha Titus gesels oor kinderteater, Woordedief, en die rol van kinderteater in opvoeding.

Kos- en kultuurhistorikus Hetta van Deventer-Terblanche praat oor salie.

Gerda Engelbrecht is alombekend vir die blokraaie wat sy opstel vir 'n paar bekende tydskrifte en koerante. Haidee Muller-Isaacs het met haar gepraat oor kunsmatige intelligensie, en of daardeur bedreig voel. Gerda vertel van die dinge waarmee sy haarself besig hou, soos 'n nuwe podsending, selfs al is daar maar bitter min tyd in haar dag.

Citibank het per ongeluk $81-triljoen in ‘n rekening gedeponeer. Die fout is darem opgetel, en soos die bank dit stel: daar was geen impak op die bank of die kliënt nie.

Stefan Burger vertel hoe hulle oestersampioene kweek by die Jimmie Roos Skool op Dewetsdorp, en die lewenslesse wat die kinders daardeur leer.

Afrikaans 100 se eeufeesbekendstelling het onlangs in die Iziko Museum in die hartjie van Kaapstad plaasgevind. Haidee Muller-Isaacs het gaan hoor wat alles beplan word.

Dieetkundige Valpré Huisamen praat oor detoks, en of jou liggaam regtig hulp nodig het.

Een van Wene se bekendste orkeste se instrumente is groente! ‘n Wortel word ‘n blokfluit, en ‘n prei ‘n mandolien. Ná 27 jaar en 344 vertonings het hulle amptelik die Guiness Wêreldrekord vir die groente-orkes met die meeste vertonings.

As kind het Agusty Geel 95% brandwonde opgedoen, dit oorleef , gehoor sy sal nooit ‘n man kry nie, en dat sy te dom is om ná matriek verder te studeer. Tog het sy haarself as onderwyseres bekwaam, en 43 jaar lank onderwys gegee. Vir die leerlinge wat wou moed verloor, het sy gedeeltes van haar lewe gedeel om te wys ’n mens kan dinge oorkom. Mariska Spoormaker het met haar gesels.

Aleysha Ortiz, ‘n 19-jarige in die VSA, neem die Hartford-onderwysraad en die stad Hartford hof toe vir nalatigheid. Daar is ook ‘n saak teen haar spesiale onderwys-saakbestuurder. Sy het wel hoërskool met lof geslaag, en studeer nou met ‘n beurs aan ‘n kollege, maar sy kan nie lees of skryf nie!

Johan Bester vertel van die Golf van Mexiko/Amerika waar hy werk as helikoptervlieënier.

Durbanville is vanjaar 200 jaar oud. Kan daar iets nuuts uit Durbanville kom? Ja, ’n nuwe manier van wynmaak! Thys Louw het die eerste 200 liter wyn, wat in ‘n rondebol-glasfles gemaak is, gebotteleer. Hoekom in glas en nie in staal, hout, keramiek of sement nie? Johan Rademan het pad Diemersdal toe gevat om uit te vind.