Driesestig

‘n Wasbeer in Virginia in die VSA is besope gevind nadat hy deur die dak by ‘n drankwinkel in is, en veral onder die whiskey ingeklim het.

Nic de Jager en Ingrid Howard gesels oor Nic se verhoogproduksie, In my eie woorde. Ingrid is die regisseur. Coenie de Villiers tree op as gespreksleier.

Janine Hansen vertel vir Martelize Brink van Action Volunteers Africa se mobiele loopbaandiens, ‘n inisiatief om werkloosheid onder jongmense aan te pak. Luke Levenberg het een van AVA se programme voltooi, en werk nou self by die organisasie.

E-sport sluit kompeterende Excel in. Dis iets wat al sowat 20 jaar bestaan. Die Microsoft Excel Wêreldkampioenskap in Las Vegas het vanjaar prysgeld van $60 000.

Jaco Minnaar vertel vir Martelize Brink van die lewe in die Tokio met sy 37 miljoen inwoners.

Haidee Muller-Isaacs gesels met die talentvolle argitek, Inge Wilkinson, oor haar passie vir haar beroep, en hoekom sy geen ander werk wil hê nie. Sy het ook ‘n boodskap vir voornemende argitekte.

Sowat 450 kg van die Franse lekkerny, escargot, is van ‘n plaas gesteel. Rakke vol vars, gevriesde en slakke in flesse is daar weggedra.

Francois Rossouw het onlangs op 76-jarige ouderdom, met meer as 2 miljoen kilometer agter die blad, 13 000 voertuie en 33 000 medereisigers, sy laaste amptelike 4x4-rit gelei. Johan Rademan het 30 jaar saam met dié RSG 4x4-aanbieder en motortydskrifskrywer die pad geloop, en ná sy laaste rit met hom gesels. Tegnologie het oplaas oor drie dekades verander, en daarom was dit moontlik vir Shane Beck...

Sjef Jacques Erasmus vertel hoe saffraan ingespan word wanneer hy kosmaak by Hemelhuijs.

Australië se weerdiens het ‘n peperduur nuwe webblad gekry, wat nie werk vir die publiek nie.

Belinda Cloete praat oor die goeie ou dae in die Paarlvallei, haar grootwordjare teen die hange van die Paarlberg, en hoe hulle desjare onder dwang verskuif is en oor moes begin in die ooste van die Paarl. Sy vertel ook hoe lief sy vir die onderwys was.

Martelize toets die ysbadgier vir jou gesig in die ateljee. Werk dit? Die antwoorde word verskaf deur dr. Ria Smit, ‘n algemene praktisyn met 'n praktyk gefokus op estetiese medisyne en vrouegesondheid.

‘n Man in China is sy werk kwyt. Sy doktersbrief het gesê rus met die seer voet. Sy werkgewer het egter uitgevind dat hy op daardie dag 16 000 tree gestap het. Tog sê die hof hy is onregverdig ontslaan.

Thys Louw praat oor Diemersdal wat aangewys is as die Platter-gids se 2026-wynprodusent van die jaar. Ses van hulle wyne het die gesogte vyfster toekennings ontvang.

Haidee Muller-Isaacs trek musieknavorser Tertius Louw nader om te gesels oor sy onlangse besoek aan Nederland. Dit was nie net musiek nie. Daar was ook ‘n pinball- en blêrkas-museum.

Tracey Steyn vertel vir Martelize Brink van haar ervaring met die swem van die Cape Triple Crown. Sy is die eerste vrou om die drie swemme te voltooi, en dit in ‘n swembroek en nie ‘n swempak nie. Renee Leeuwner vertel wat die Cape Triple Crown behels.

‘n Man in Italië is uitgevang dat hy sy oorlede ma se pensioen eis. Om haar ID te hernu, het hy hom as sy ma vermom, maar met die uitvangslag is sy ma se gemummifiseerde liggaam by haar huis ontdek.

Jonathan Genis vertel vir Martelize Brink van sy avontuur in Doha, Katar. Dis warm en bedompig daar, maar die infrastruktuur is gebou daarvoor.

‘n Bietjie meer as n jaar gelede het Irene Bezuidenhoudt ‘n gewone huis met die gebruiklike sit-, eetkamer en kombuis gehad. As jy deesdae deur die voordeur loop, loop jy jouself vas in industriële bakoonde, mengers en ’n droogoond, omdat dat Irene se aanvanklike stokperdjie om suurdeegbrood te bak, na 'n volskaalse bedryf gegroei het. Mariska Spoormaker het gaan kuier.

‘n Vrou in Thailand kon aan haar doodskis klop om gered te word. Haar broer het haar gevat om veras te word by ‘n tempel, maar siende dat hy nie ‘n doodsertifikaat gehad het nie wou die tempel dit nie doen nie. Tydens die gesprekke hoor hulle toe die klop...

Wilfred Chivell praat oor die interaksie tussen toeriste en wilde diere. Daar is grense wat nie oorskrei moet word nie.

Vyftien jaar gelede het Melloson Allen uit die Baai na ‘n gemeenskapsplaas in die Baviaanskloof getrek, om daar saam met haar man Donald onafhanklik van krag- en watervoorsieningsnetwerke te woon. Intussen is twee kinders gebore, Donald se leerprodukte het gesogte artikels geword, en Melloson het betrokke geraak by die Baviaanskloof Growth Initiative. Mariska Spoormaker het met haar gesels.

Adelé Joubert vertel vir Martelize Brink dat Werner met die deur in die huis geval het en haar sommer ‘n klapsoen op die koop toe gegee het.

‘n Regter in die VSA is vir ses maande geskors nadat sy Elvis Presley-kapperjolle aan die lig gekom het. Soms is hy werk toe met sy Elvis-pruik en sonbril. Hy het ook Elvis se musiek in die hof gespeel.

Lelia Etsebeth vertel vir Martelize Brink van KERSVERSIERINGS VAN HOOP, RSG se nuwe middagvervolgverhaal wat op Maandag 24 November begin.