Driesestig

Eens was Roseline Shimwenje haweloos en werkloos. Toe omskep sy 'n stuk munisipale grond langs die begraafplaas in Patensie in 'n groentelushof nadat sy al die onwettig gestorte rommel daar verwyder het. Nou het die Kouga-munisipaliteit Rosaline vereer met 'n toekenning vir uitstaande gemeenskapsdiens. Mariska spoormaker het met haar gepraat.

John Knuth se kuns word deur vlieë geskep. Hy voer hulle ’n mengsel van akrielverf en suikerwater. Met dié dat vlieë hulle kos opbring en weer opslurp, word patrone op ‘n doek gemaak.

Mia Groeneveld en Karla Redelinghuys praat oor haai- en rog-bewusmaking. Hulle is die stigters van Science Saves Sharks. Hulle gesels onder meer oor die rol van genetiese toetse op haaivinne as bewyse in stropinghofsake.

Géne Morrison vertel vir Johan Rademan van sy gevaarlike stokperdjie. ‘n Netwerk van stormjagters hou die weer dop om foto’s en video’s van die vernietigende krag van die natuur te neem.

Ina Snyman vertel van ‘n busrit waar sy en Hennie besluit het om die pad vorentoe ook saam aan te vat.

‘n Franse gevangene is by die tronk uitgedra in ‘n ander gevangene wat vrygelaat is, se wasgoedsak. Die vryheid was egter van korte duur.

Landboujoernalis Johan Gunter van Bloemfontein is só versot op tamatiekonfyt dat hy besluit het om sy eie te begin maak, nadat hy tevergeefs gesukkel het om dit in die hande te kry. Nou het hy al ‘n konfytbedryffie aan die gang gekry, het hy vir Mariska Spoormaker vertel.

Vuur en Vlam Kokkedoor Nate Smith gesels oor die krag van komyn, en deel sy resep vir 'n kerriebotterskorsiesop.

Die heel eerste Hermès-Birkinhandsak is op 'n veiling vir ‘n rekordbedrag van $10,1-miljoen verkoop.

Modeontwerper en multidissiplinêre kunstenaar Arzelle van der Merwe praat oor haar werk wat gekies is om deel te wees van ‘n kunsuitstalling in Singapoer. Die kunswerkontwerpe het Barbies ingesluit. Daar was ook die langste loopplank vir Barbies met meer as 1 000 van dié poppe.

Harold James het 45 jaar lank gewerk as elektrisiën vir die spoorweë. Hy word binnekort 70, en het in 2018 uit diens getree. Hy kan egter nie stilsit nie, en help graag bejaardes. Haidee Muller-Isaacs het met hom gesels.

Dieetkundige Valpré Huisamen praat oor epigenetika en hoe die kos wat ons eet ons gene se funksionering beïnvloed.

In Noorweë was daar ‘n fout met die aankondiging van loteryprysgeld. Duisende mense het gehoor van groot bedrae wat hulle gewen het, maar met die omskakeling van Euro na Kroon is daar per ongeluk met 100 gemaal in plaas daarvan dat daar deur 100 gedeel is.

’n Plek om te besoek as jy al die kante van die Anglo-Boereoorlog wil hoor en uitgebeeld sien, is die Suid-Afrikaanse Oorlogmuseum in Bloemfontein. Dané Swanepoel, die museum se kommunikasiebeampte, vertel vir Mariska Spoormaker hoe die museum tot stand gekom het.

Dr. Petre Prins praat oor die platinumgroepmetale van ses, waarvan rodium die duurste is.

Justus Visagie praat oor die wanopvattings oor elektriese voertuie.

Geloofsgroepe in Indië is gekant teen Zumba-klasse wat in 14 000 openbare skole aangebied word as deel van die staat, Kerala, se veldtog teen dwelms.

Benna Carrol vertel van haar belewenis van Krakaw in Pole, waar sy al agt jaar woon.

Robyn van de Rhede is een van die jongste skoolhoofde om 'n splinternuwe skool te open op die ouderdom van 35 jaar. By die Nasionale Onderwystoekennings word sy toe ook aangewys as die provinsiale wenner vir die beste hoërskoolonderwyseres. Haidee Muller-Isaacs het by haar 'n draai by haar gemaak.

Dr. Jan Botha vertel van die Nasionale voëlskou in Bloemfontein waar daar meer as ‘n 1 500 kouvoëls te sien is.

‘n Amerikaanse paartjie het na ‘n tornado gejaag om met dít in die agtergrond verloof te raak. Hulle is albei stormjagters.

Veearts dr. Ingrid de Wet praat oor die versorging van honde en katte se pels - van skeer en borsel tot sjampoe.

Om sy toekenning as groenste munisipaliteit in die Oos-Kaap te vier, het die Kouga-munisipaliteit besluit om erkenning te gee aan belangrike groen rolspelers in die onderskeie gemeenskappe. Mariska Spoormaker het ná die funksie gepraat met Christa Venter, bestuurder omgewingsake en herwinning van die Kouga-munisipaliteit.

Ina Goosen vertel vir Johan Rademan hoe Landbouweekblad se Hoekie vir Eensames gesorg het dat sy en Willem ontmoet het.

By Fujairah in die Verenigde Arabiese Emirate is daar ‘n installasie op ‘n deel van die hoofweg, wat maak dat jy ‘n stuk van Beethoven se negende simfonie speel as jy oor die rubberstroke ry.