Sons occitans

Es estils mès jamaicans de raggamuffin, eth dub, o uns auti coma er ska, an un ampli espaci musicau en món sonor occitan. Grops com es Faboulous Trobadors, Mauresca Fracàs Dub, Massilia Sound System o es Goulamas'k, son es puntaus d'aguest nau pòdcast des Sons Occitans.

Quini son quauqui des esturments musicaus mès tradicionaus de sonoritat occitana? Era bramauèra, es caramères, flabutes, vriolons, es violes d'arròda, eca. Voletz escotar eth sòn son? Les entenem en aguest pòdcast especiau de sonoritat instrumentau.

Ac descorbim damb es Lou Daufin. De formacions musicaus enes Valades Occitanes n'i a fòrça. Totun, un des grops damb mès peada occitana que son es Lou Daufin, eth gop insígnia dera occitania mès aupina. En aguest pòdcast que mos centraram en aguest coneishut grop musicau.

"Aqueres montanhes", eth "Se canta", qu'ei era cançon d'amor per excelléncia en Occitania. Totun que n'auem fòrça mès, sustòt restacades ath noviatge e ath maridatge. Descorbim un pialèr de cançons d'amor, desamor e der hestejament occitan. Mos i acompanhes?

En aguest nau pòdcast descorbiram quauques cançons occitanes de cunhèra, breçaiòles o arrepervèris entàs mainatges e mainades. Quines son es cançon que s'an mantengut ath long deth temps tàs mès petitonhs dera casa? Les escotam?

Quauqui grops o cantautors occitans canten cançons catalanes, mès existissen es grops e cantaires catalans que canten a Occitania o ara Val d'Aran? Ne descorbim quauqu'uns en aguest nau pòdcast des Sons Occitans.

Tostem es comparacions son lèjes, mès se ia a un artiste conceptuau e deconstroctor dera musica occitana que poderiem díder que aqueth ei Joan Francés Tisnèr. Artista polifacetic e conceptuau que non vos deisharà indiferents en cap des sues cançons, creacions e espectacles.

Quini son es classics occitans? N'auem? Coneishetz Jusèp Cantaloba e es sòns "Cants d'Auvernha"? Sabetz que tanben Victòria dels Àngels les cantèc? Non vos perdesquetz aguest pòdcast de classics occitans.

Quines son es cançons que parlen deth maridatge occitan? Coma eren es musiques enes nòces occitanes? E ena Val d'Aran? Totes es hemnes se volien maridar? Mès que, tanben auem era cançon deth "praube mau maridat". Se volien maridar o non es gojates occitanes? Ac desnisham en un nau pòdcast des Sons Occitans! Mos i acompanhes?

Què vos diden es nòms de Claudi Marti, Patric, Mans de Breish, Joan Pau Verdier, Daniel Daumàs, e de mès artistes e cantautors actuaus coma Joanda? Existís era "Nòva Cançon" occitana? Quan apareishèc aguest moviment? Qui siguèren quauqui des sòns pionèrs? Ac descorbim en un nau pòdcast des Sons Occitans.

Com ei que li'n diden era cançon des catars? "A, E, I, O ,U" son es vocaus, mès tanben son era tornada dera cançon de "Lo Boièr". Diden qu'aguesta ei era cançon des catars, e que ad darrèr des vocaus s'i amague quauque messatge. Tanben la poderiem classar en ua cançon de mestièrs. En aguest "Sons occitans" escotaram quauques versions restacades ad aguesta cançon.

Se i a un grop pro coneishut en tot er espaci occitan qu'aguesti son Los de Nadau, es Nadau. Cançons coma de "Cap tà Immortèla" que ja ei lèu un imne o er "Adius ara Val d'Aran", coneishuda per toti es aranesi, ja formen part dera cultura musicau de diuèrses generacions. Aué dedicam aguest Sons Occitans ath fenomèn musicau des Nadau.

Coneishetz es cançons occitanes deth Nadau? Quines son es pastorales? Auem plan extenses recopilacions musicaus arremassades e escrites per folcloristes e caperans deth sègle XVII. Voletz cantar damb nosati? Te portam un petit tastet dedicat as cançons de Nadau en aguest nau pòdcast en aranés.

Plan segur que coneishetz fòrça cançons araneses mès enlà deth nòste Imne. Quines son es cançon populares d'Aran? Dilhèu eth "Non plores, Tonet"? "Era oelhèra"? "Era morisca"? "Es esclòps"? Ac descorbim en aguest nau pòdcast dedicat as cançons populares dera Val d'Aran. Mos i acompanhatz?

Ebé òc! qu'auem rap, neo rap, hip hop, beat box e totes es sues formes e derivades en lengua nòsta. Ua musica que non nèish sonque enes ciutats mès granes. Desnisham què reciten es nomentadi "trobadors contemporanèus" en un nau pòdcast des Sons Occitans.

Des Pirenèus, en tot passar pes Lanes, eth bascoat e en arribant enes Valades o ena madeisha Marsèlha, trobam un pialèr de grops polifonics que demòstren qu'aguest auviatge sonor occitan ei un des mès rics de tota Euròpa.

Era figura de Joan Petit existíc en siègle XVI en Roèrgue, un moment istoric occitan mercat pes susmautes populares e er hame. Aguesta cançon infantila en Catalonha e Occitania non ei tant beròia quan sabem tota era sua istòria. Mos acompanhes en aguest nau capitol des "Sons occitans"?

Coneishetz es cançons numeriques d'Occitania? Nau gojates a Castelnau, en Bordèu que i a nau damas, nau sacs de hormend, en travesant nau lanas, eca. Coma ei que eth numèro quate desapareish deth cant? Ac desnisham en un nau pòdcast des Sons Occitans.

Des trobairitz ara actualitat, escotaram quauques votzes femenines occitanes. Existís era Nòva Cançon? Sense desbrembar es origines des nòstes musicaires per exelléncia, es trobairitz, mos apropam un sinhau mès as nòsti tempsi e tanben as inicis deth reviscolament culturau en lengua nòsta!

Com ei que en Occitania trobam tantes formacions musicaus de duòs? Ei un ahèr sonque caracteristic d'ací? O ei que damb ua flabuta e un acordeon n'i a pro tà dançar? Dilhèu ei mès facil portar d'un lòc a un aute un pifre o un vriolon que un piano? Esturments que se junhen entà hèr-la a petar!

Ei eth Se Canta er imne mès versionat de tota Occitania? Era cançon deth Se Canta e es Montanhes Araneses son çò de madeish? Quin ei er imne Provençau? Quin ei er imne mès versionat? Ac desnisham a pòc a pòc en aguest prumèr pòdcast des Sons Occitans.