SBS Samoan - SBS Samoan

Ua a'afia ai feso'ota'iga i le telefoni, imeli ma le 'upega tafa'ilagi a le faitau miliona o tagata i Ausetalia na faalagolago i 'au'aunaga a OPTUS.

Na saunoa le minisita o loo gafa ma le kamupani vaalele le Samoa Airways, Leatinu'u Wayne Fong, o loo feutaga'i ma le kamupani le Fiji Airways se maliega e faatau ai e le Samoa Airways nofoa i faigamalaga a le Fiji Airways. Na saunoa foi le minisita e le toe faatauina se vaalele tele a le Samoa Airways ona e le fia auai le faigamalo i ni pisinisi e gau.

Ua amata le osofa'iga i lau'ele'ele a le vaega'au a Isara'elu i le Gaza mau lipotia mai le to'atele o tagata ua maliliu. E tusa ai ma se faamatalaga maio le matagaluega o le soifua maloloina i le Gaza ua 'ova i le 8,500 tagata ua maliliu, o le 'ova i le 3,500 o i latou o tamaiti.

Ua fautuaina e se komiti faa-palemene na iloiloina teuteuga o le tulafono o faigapalota, le toe fo'i o nisi itumalo i le fa'a-alaalafaga e aloa'ia ai o latou so'otaga faaleaganu'u e pei o Sale'aula ma Salamumu. Ua fautuaina ai fo'i le tolu o itumalo palota i Apia - Sasa'e, Ogatotonu ma Sisifo.

O se faalavelave na tupu ina ua sa'e le va'a na alu ai se faiva taga palolo a ni taulele'a o Poutasi Falealili, na maliu ai Toetu Aoina ma e le'i toe maua lona tino maliu. Faafofoga i le ripoti a Galuemalemana Autagavaia mai Apia.

Ripoti a Galumalemana Autagavaia mai Apia.

Ua tatala aloa'ia le maota mo galuega atina'e a le afio'aga o Lauli'i, o se tasi o vaega o fuafuaga mamao o loo fa'aaogaina iai le $miliona mai le malo.

Se talanoaga a le ta'ita'ifono o le Lakapi Liki Samoa, Fiu Ponifasio Vasa, ma le sui o le SBS Samoan i Apia, Galumalemana Autagavaia Tipi Autagavaia.

Na auai le Susuga i le faafeagaiga o le Ekalesia Faapotopotoga Kerisiano Samoa, Rev. Uelese Mulitalo, i se fonotaga ma le PALM, le pulega o galuega faavaitaimi mo tagata Pasefika i Ausetalia nei, ma na faailoa ai se avanoa faapitoa mo tagata faigaluega faavaitaimi e aumai ai aiga ma fanau e aumau faatasi i Ausetalia i le taimi o galue ai se tagata. E mafai ai fo'i e le to'alua o lea tagata ona fai...

Se talanoaga ma le alii Samoa o Andrew Sua ua lima nei tausaga o aumau ma galue i Uluru, ae ua 'ova atu i le 20 tausaga o aumau i le Northern Territory ma galulue faatasi ma tagata muamua.

Na faia i le vaiaso nei le sauniga e suaina ai le 'ele'ele o se fanua o le malo Samoa i Taumeasina ua faasino e fausia ai se ofisa o le faigamalo teritori i Amerika Samoa.

I le mae'a ai o le fono tele a le Ekalesia a Iesu Keriso o le 'Au Pa'ia o Aso e Gata ai na faia i Utah i Amerika, na faai'ugafonoina ai le fausia o seisi Malumalu Sa o le Ekalesia i Samoa. O loo faamoemoe e fausia lea malumalu i Savai'i.

Ua faaalia e le Susuga i le faafeagaiga o le Ekalesia Faapotopotoga Kerisiano Samoa i Alice Springs, Rev Uelese Mulitalo, lona lagolagoina o le mau i le Ioe mo se Leo o Tagata Muamua i le palemene. Peita'i o loo tuleia e nisi o tagata muamua, e pei o le sui o le Senate Jacinta Price ma Warren Mundine, le mau e te'ena se leo o tagata muamua.

Peita'i e o'o mai i le aso nei, e le'i maua e leoleo ma saisaia le ta'avale ma le na aveina le ta'avale na maliu ai Tu'u'au. Faafofoga i le ripoti a Galumalemana mai Apia.

Toe 7 tausaga atoa le 200 tausaga o le tala'iga Kerisiano i Samoa. Peita'i o loo molimauina pea le faia e nisi o nu'u ma alaalafaga o faiga faanu'upo e pei o se faasalaga na saisai ai ma amo se tama matua o se nu'u i Savai'i i lalo o le faatonuga mai le pulega o le nu'u.

Ua faamalamalamaina e le Komiti o tulafono faavae o loo malaga i nu'u ma alaalafaga nisi o vaega o le tulafono o suafa matai i Samoa. E aofia ai le tatau i soo se tagata e nofo i se suafa matai ona auai i le aso ma le nofoaga e faia ai le saofa'i o lona suafa matai, ae le o le tapaina ma inu ai seisi tagata e fai ma ona sui.

Na saunoa le sui o le FAST, La'auli Leuatea Polata'ivao Schmidt, e ui o se tulaga lelei le umia e le faigamalo a le FAST o le 2/3 o nofoa i le palemene o Samoa, ae ua tatau ona faagata ai, ae faamaopoopo isi sui e faavaeina se itu-agai malosi o le palemene o Samoa.

Ua toe molimauina i Samoa le faia e le fono a ali'i ma faipule o se nu'u o se faatonuga e faasalaina ai se tagata i faiga faanu'upo. Se talanoaga a le sui o le SBS i Apia ma le faatonu o mata'upu i faamasinoga i le Tulafono o Nu'u 1990 ma le malosi o le pule faaletulafono a ali'i ma faipule o se nu'u e faia ai ni faasalaga saua ma faatasina ai se tagatanu'u Samoa.

Ua iloa i ni su'esu'ega a'afiaga i le fanau mai le tele o le taimi e alu i feso'ota'iga social media - i luga o telefoni, iPad, laptops ma isi auala. E le gata i a'afiaga i le tino ona o le le toe lava o se faamalosi tino, ae faapena i amioga.

O le a saisaia ma loka i le falepuipui e le toe tatalaina le teine tausi ma'i Peretania, Lucy Letby, lea na faamaonia ona moliaga i le fasioti tagata. O Letby na galue i se falema'i i Chester i Egelani, na ia fasiotia ai ni pepe se to'a 7 - 5 tama ae to'a 2 teine - i auala e aofia ai le tui o pepe i le vaila'au le insulin lea e fa'aoga i togafitiga o le suka.

Ua aumaia se fautuaga a le Komisi suesue i le tulafono o faigapalota i Samoa i se alafua ma faata'ita'iga mai isi palemene o le Pasefika, e fua iai le aofa'i o sui o le palemene ma le aofa'i o itumalo palota i le palemene o Samoa i le lumana'i.

Se talanoaga ma le minisita o le matagaluega o tina ma tama'ita'i, atina'e o afio'aga ma aga feso'ota'i, le Afioga Leota Laki Lamositele Sio, i le 12 masina muamua o le poloketi a le malo Samoa, lea ua ofoina ai le ta'i miliona tala mo itumalo palota uma i Samoa.

Ua aumaia i fautuaga a le Komisi na iloiloina le tulafono faigapalota ma mata'upu na tula'i mai i faigapalota na te'a nei, le tatau ona faatulafonoina se Sa i se faigamalo tausi (caretaker government) ona tapenaina ma faatulaga se tala i le tupe o le malo Samoa.

O se faamanuiaga faaopoopo mo tagata Samoa o loo galulue faavaitaimi i Ausetalia le faaputuga tupe o le supa (superannuation) o loo faamalosia ona tipi mai totogi ma fai sao iai kamupani o galuega.

Ua le lagolagoina e se komisi na su'esu'eina le mata'upu i le aia a tagata Samoa i atunu'u i fafo e palota ai i faigapalota mo le palemene o le malo tuto'atasi o Samoa. Ua aumaia la latou fautuaga e leai se suiga o le tulafono o faigapalota mai le tulaga o iai nei. A fia palota se tagata Samoa o loo aumau i fafo, e tatau ona malaga atu i le atunu'u, resitara i le lola a lona itumalo ma lafo ai san...