Radiomi aallakaatitassiat, KNR

Nuummi Nipilersornermik Ilinniarfimmi ilinniartitsisoq Hansinnguaq Lennert album-imik erinnanik arfineq pingasunik imalimmik saqqummersitsisoq aallakaatitsivitsinni pulaartoralugu ilisaritipparput. Aallakaatitassiortoq Arqaluk Brandt Johansen

Telegrammit siulliup nassiunneqarneranit ukiut 100-it qaangiupput. Qanga nalunaarasuartaateqarnerup oqaluttuassartaanit pisarsimasut, atuakkamit " TELE 75 Oqaluttuatsialaat"-neersut tusassavagut. Uanilu Preben Thanep allagai atuarpagut. Aallakaatitassiortoq: Maliinannguaq Marcussen-Mølgaard.

Qanga nalunaarasuartaateqarnerup oqaluttuassartaanit pisarsimatut, atuakkamit Tele 75-imiittut tusarfigaagut. Uanilu Fritz fenckerip aamma Hans Lyngellu allagai atuarpagut. Aallakaatitassiortoq Maliinannguaq Marcussen-Mølgaard.

Qanga nalunaarasuartaateqarnerup oqaluttuassartaanit pisarsimatut, atuakkamit Tele 75-imiittut tusarfigaagut. Uanilu radioqarfimmi pisortamut nuliaasimasup, kigutilerisuusimasullu Valborg Albrechtsenip oqaluttuai tusarlutigit. Aallakaatitassiortoq: Maliinannguaq Marcussen-Mølgaard.

Kangujartipparput Nuummiu Hans B. Noahsen. Ukiorpassuit nipilersortartuunera, ilaquttanilu piliartortanerat, ukiumilu sisoraatinik sangusaartartuniinnera tikillattaallugit oqaloqatigaarput, tusarusutaanik appilallaattaarluta. Aallakaatitassiortoq: Jørgen M. Benjaminsen

Aasaanerani sumiiffinni assigiiinnngitsuni pisut pisussallu sammilllugit tusagassiat - aamma aasaanerani nalaatat pillugit isummersortitsinerit imaralugit aallakaatitaq. Aaqqissuisoq Frederik Lund.

Qassimiuni 1941-mi inunngortup Karoline Poulsenip nunatta pissarititaanik atorluaasarnera, pillattaartarsimaneri, misigisaalu tupinnartut sammivagut. Aallakaatitassiortoq Maliinannguaq Marcussen-Mølgaard

Ozzy Osbourne nipilersoriaatsimi sakkortunerusumi heavy metal-imi sunniuteqarnerpaat ilagisimasaat 22. juli 2025 76'nik ukioqarluni toqusoq nipilersoqatigiit Black Sabbath nipilersugaanik, namminerlu kisimiilluni saqqummersittarsimasaanik atuisoq tusallattaajutigalugu sammilaassuarput. Aallakaatitassiamik suliarinnittoq: Arqaluk Brandt Johansen

Inuunermi ataasiaannarani annatsitaasututut pisoqarfiani assigiinngitsunik oqaluttuassalik Moortaaraq Petersen, Ilulissat, aallakaatitami oqaluasaartipparput. Aallakaatitamik suliarinnittoq Arqaluk Brandt Johansen

2025-imi julip qiteqqunnerani Qeqertarsuarmi silami pisut assigiinngitsut alakkarterpagut. Meeqqat arsaattarfimmi assigiinngitsunik sammisaqartinneqartut, silamilu sanalukkanik tuniniaasut oqaloqatigaagut. Aallakaatitassiortoq Maliinannguaq Marcussen-Mølgaard

Aasami pinngortamiilluni nuannillaraasoq. 2025-imi Qeqertarsuarmi kuussuup eqqaa pisuttuarfigaarput aammalu Qeqertarsuup kangiani asimi aliannaarsaartut alakkarterlugit. Aallakaatitassiortoq Maliinannguaq Marcussen-Mølgaard

Qallunaat nunaanni isikkerisutut ilinniarsimasoq uani aallakaatitassiami oqaloqatigineqarpoq, ilaatigut ilinniarnermi sammineqartartut itisilerlugit eqqartorneqarlutik. Aallakaatitassiortoq: Pilunnguaq Jørgensen

Uani aallakaatitassiami kalaallit meerartaanni sulisoq Esther Arens peqatigalugu meeqqat inuusuttullu pisinnaatitaaffii, aammalu najorteeqartarneq pillugu eqqartueqatigineqarpoq. Aallakaatitassiortoq: Pilunnguaq Jørgensen

Nipilersortarnerit pillugit eqqaamasalersaartitsinermi aallakaatitap siuliani Simon Olsen-ip aamma Jokum Lennert-ip oqaluttuartinneqarnerat nangillugu aallakaatitaq. Aaqqissuisuuvoq Frederik Lund.

Nipilersornerit pillugit eqqaamasalersaartitsilluni aallakaatitat immikkoortuisa aqqaneq aappaanni oqaluttuartut tassaapput Simon Olsen aamma Jokum Lennert. Aaqqissuisoq Frederik Lund.

Aasap ullui nunatsinni sumiiffinni assinngiinnngitsuni qanoq atorneqarpat? Inuit ilaat aasaanerani suliarisartakkaminnik suliaqarput - ilaat sulinngiffeqarlutik angalaarput. Inuit sumiiffinni assigiinngisuniittut oqaloqatigalugit aallakaatitamik aaqqissuisuuvoq Frederik Lund.

Aasarpoq - juuli qiteqqutereerpoq. Aasaq manna sumiiffiit ilaanni pisussat pisartullu tusagassiorfigalugit aallakaatitaq. Aaqqissuisoq Frederik Lund.

Unnersiutiginnilluni nipilersortartoq erinarsortartorlu Maniitsormiut erinarsoqatigiit, nipilersuuserlutik erinnanik unnersiutiginninneq aallaavigalugu atuisartut nuannerineqarluartut Jens Gustav Ilanilu peqataasartutoqanngortoq Peter Levisen 2018 immiussaasumi oqaloqatigineqarpoq erinarsoqatigiittut angalasarnerat aallaavigalugu. Aaqqissuisoq: Arqaluk Brandt Johansen.

Umiarsuit takornariartaatit arlalissuit takornarianik 43.000-inik angallassisut nunatsinnut massakkuminngaanniit tikerassapput. Takornarialerisut ulluni makkunani ulappupput, naak sila pitsaajuaannanngikkaluartoq uniffiginagu suliuarput. Taakku ilaat Kunngu Sørensen Gabriel Nuummi naapipparput, suliaalu pillugit oqaloqatigalutigu. Aallakaatitassiortoq Thora Monrad Hansen.

Kammaata Qaqortukasimmik taasarsimasaa, -qaamasuummat; Jakob II Egede, sammilaarparput, suliaanillu appilaartarluta, ernera organi Ammooraq Egede peqatigalugu. Aallakaatitassiortoq Jørgen M. Benjaminsen

Nukannguaq Berglund Danmarkimi arlariinnik oqaaseqartuunerup atorluarneqarsinnaanera specialiliaralugu naammassissutigaa. Ilinniagaa aammalu qaratsakkut suliaritereernerup kinguneri pillugit killiffissiorneqarpoq. Aallakaatitassiortoq: Andrea Christiansen

Aallakaatitassiortoq Thora Monrad Hansen

Avanersuarmi Savissivimmiit, tunumi Ittoqqortoormiiniit aamma Kuummiiniit kiisalu Uummannap sulluani Ikerasammiit tusagaqassaagut, erinnamik tusarusutaannik appittarluta. Aallakatitassiortoq Jørgen M. Benjaminsen

Ukioq 2025-mi GUX-mi qaffasinnerpaamik 12,48-mik angusaqarluni ilinniarnertuunngortoq Nivi Møller Hansen meeqqat atuarfianiit ilinniarnertuunngorniarnerminilu aqqusaartakkani aporfiit tunniutiinnangajattarnerit qaangertarsimasanili oqaluttuarai. Arnaa Alice Møller aamma oqaloqatigineqarpoq. Aallakaatitassiortuuvoq Salomine Tobiassen

Meeraanerminiilli umiartornermik soqutigisalik George Stagemilu ilinniartuusimasoq -massakkullu nunarput angallavigalugu sulisoq Nahome Møller Bech oqaloqatigineqarpoq. Aallakaatitassiortoq: Pilunnguaq Jørgensen