MittSchnitt z'dritt

Die Wuche dreiht sich alles um Entscheidige rund um d Bruefswahl und um d Usbildig. Mir redet aber au über de ahfangendi Herbst und die demit verbundeni Marronizit.

Mir sind zrugg us de Summerpause, juhuii! Zum erste Mal hed mer eus nöd nur uf radiocalanda.ch sondern au uf rso.ch ghöört. Es isch einiges neu, aber mir sind immerno di Gliiche.

Ih de letschte Sendig vo de erste Staffle sind alli drü Hosts nomal debi. Mir rätsled über Bündner Dialektwörter, rekapituliered eusi Highlights vo MittSchnitt z'dritt und gebed no en chline Usblick uf de kommendi Summer.

Die Wuche diskutiered und plaudered die drü vo MittSchnitt z'dritt über d Zuekunft vo eusere Gsellschaft und inwiefern Lüge moralisch vertrettbar sind. Ih de zweitletschte Sendig chunnt sogar na chli EM-Stimmig uf, aber nöd für alli.

D'Lisa und de Moritz startet ideal erholt id Sendig und verzelled was sie glücklich macht, was sie a sich würed ändere und wie sie zu Spontanität stönd. De Moritz stellt au no ganz kniffligi entwerder/oder-Frage - au zum diheii beantworte ;)

In eusere 10. Sendig redet eusi Hosts über es richtigs Radiothema nämlich Musig! Hend sie en Lieblingsmusigrichtig? Was isch eigentlich e Quätschkomode? Und isch euch schomal ufgfalle wie viel "T"s MittSchnitt z'dritt hed?

Das mal gids en chli längere Wucherückblick. Wie mir zum Betrüge inere Beziehig stönd, was en Zingge und wer de Emilio isch, verzellemer i dere Folg.

Die Wuche hend d Lisa und de Moritz leider ohni d Caro "mitgschnitte". Trotzdem hend sie über viel spannendi Theme wie soziali Umfelder oder Meinigsüsserig gredet. Was für Lebens-Updates die zwei suscht no hend erfahret ihr in dere Folg.

Endlich wieder vollzählig bi MittSchnitt z'dritt und trotzdem z'vierte im Studio. Hüt hemmer de Lukas z'Bsuech ghaa wo eus Bad Ragartz vorgstellt hed. Mir hend viel über Kunst gredet und philosophiert, aber au einiges Neus glernt.

Die Wuche fehlt d Lisa, was eus aber nöd devo abhaltet trotzdem sogar z vierte im Studio z si. Wer genau z Gast isch, erfahret ihr i dere Folg. Mir hend über Hobbies, d Verallgemeinerig i de Gsellschaft und no vieles meh gredet.

MittSchnitt z'dritt hüt leider nume zweite z'ghöre und denn au grad no mit dene beide Stimme, wo am ähnlichste töned, de Lisa und de Caro. Sie verzelled vo ihrem Bsuech binere Musikshow, wie sie ihres Studenteläbe chli in Griff wennd becho und gebed euch zwei tolli Znachtrezept mit uf de Weg.

Obwohl d Caro das Mal nöd debii gsii isch, sind d Lisa und de Moritz nöd elei im Studio gsii. Di ehemalige Hosts vo Radio Calanda sind uf Bsuech gsii und hend mit ihne über alles mögliche philosophiert.

D Caro und d Lisa hend für e Wuche d Schwiiz inklusive Moritz hinter sich glah und sind ab uf Belgie. Was sie dööt so alles erlebt und glernt hend erfahreder i dere Folg.

Die Folg reded eusi Hosts nöd nur über s Lebe in Chur, sondern lerned au viel über Traditione us anderne Länder.

D Caro, d Lisa und de Moritz hend ihri ersti Sendig uf Radio Calanda erfolgrich überstande. Sie stelled sich nöd nur vor, mer bechunnt au en erste Iiblick i ihri Format Mo-mente der Philosophie, Caro's Good to know und s Dialektwort vo de Wuche.