كوبايتين قهوة - Kobayten Ahwa

فى حلقة انهاردة هريدي و خالد شربوا قهوة مع رولا امبابي, صاحبة قناة "رولاز دياري" على يوتيوب, المن خلالها بساعد الناس العندهم ارق او بيعانوا من التوتر انهم يناموا عن طريق حاجة اسمها "اي اس ام ار"..فا ايه هو  ده؟ و يتعمل ازاي؟ و يتسمع فين؟؟ كل ده و اكتر فى حلقة انهاردة من البودكاست

هريدي الفترة حاسس بشوية ضغط نفسي و شايف ان قفل فيسبوك و انستاجرام بتوعه هو شكل من اشكال الديتوكس..ولا هل ده هروب؟ و بيجاوب على السؤال ده خالد و بيشرح ايه هو الديتوكس الحقيقى نفسيا و جسديا كل ده و اكتر فى حلقة انهاردة من البودكاست

حلقة انهاردة اول و ان شاء الله مش اخر حلقة كروس اوفر ما بين بودكاستوكوا المفضل دائما "كوبايتين قهوة" و بودكاستكوا المفضل الجديد "كفاية بقى" بقى و الصراحة مش عارفين ايه المميز فى حلقة انهاردة عشان عملنهالكوا قبل كدة كتير..علاء الشيخ تقريبا اكتر واحد طلع فى كوبايتين قهوة بعد خالد و هريدى..بس حبينا نطلع القطط الفطسانة فى بعض نقول لبعض كفاية بقى على شوية حاجات كدة

فى حلقة الاسبوع ده شربنا قهوة مع صديقنا اللدود من كوالا ساندوتش دكتور محمد فاروق، و صديقنا الجديد دكتور اشرف بخيت مؤسس "او سيفن ثرابي" ، واحدة من انجح منصات العلاج النفسي اونلاين اتكلمنا كلام كتير عن الصحة النفسية و اهميتها، فا ادخلوا عالحلقة عشان تسمعوه

فى حلقة انهاردة بنوجه رسالة لكل حد مش شايف نفسه كفاية, او كافي لمواجهة الحياة بحلوها و مرها و مشاكلها و قرفها و بنقوله/بنقولها ان انتوا كفاية غير كده بندي شوية افكار لعلاء الشيخ على مواضيع ممكن يقول عليها كفاية بقى فى البودكاست بتاعه الاسمه كفاية بقى

فى حلقة انهاردة من البودكاست استضفنا صديقنا كريم ياسر فى قعدة مطولة، و اتكلمنا معاه فيها عن مواضيع كتير جدا، اهمهم انك ازاي تبقى ضد القابليه للكسر.. حضروا كوباية قهوة كبيرة و تعالوا اقعدوا معانا

!!بالرغم انهم ملتصقون, بس خالد وهريدى شخصيتهم مختلفة, واحد انطوائي و التاني فاتحها عالبحري يا تري انهو شخصية احسن فى التعامل مع المجتمع؟ و ازاي نوازن بين الشخصيتين؟

هريدى نقل القاهرة و عمل شيفت كارير..و خالد عايش بس عشان يشتغل يا ترى البودكاست هيكمل ازاي؟؟ ده الهتعرفوه فى حلقة انهاردة من بودكاستكم المفضل دائما..#كوبايتين_قهوة

بعد ما هريدي عمل حلقة مع اخوه محمود بطل مصر فى السنوكر، خالد قال اشمعني وجاب اخوه عمرو ديوان، واحد من احسن فنانين الجرافيتي فى مصر اذا مكانش افضلهم اسمعوا مشواره الفني فى حلقة انهارده

سألنا ٣ أسئلة فى حلقة انهارده، لو أنت ما كنتش أنت، كنت أنت حتبقى ايه؟ ومين؟ وهل أنت راضي عن الشخص اللي أنت هو دلوقتي؟ هتعرفوا إجابات الأسئلة دي فى حلقة مليانة قلش وعشوائية وغوغائية مع حبايبنا علاء الشيخ وهاشم المصري

فى حلقة انهارده لخصنالكوا حلقة حلقة من الـ٣٠ حلقة اللي عملناهم فى ٢٠٢٠.. لكن قبل ما نعمل كده يا ترى كانت ايه الاحداث الاتسلط عليها الضوء فى حياة خالد وهريدى؟؟

بما انها حلقة اخر السنة..و احنا خلاص فيصنا من ٢٠٢٠، فا طلبنا من زمايلنا و حبايبنا على بوديو انهم يعملوا الحلقة دي بدالنا...كل سنة و هما و انتوا طيبين و ٢٠٢١ تبقى ارحم شوية

تخيلوا لو "كوبايتين قهوة" من غير خالد ديوان؟ أو "أبيض وأسود" من غير أحمد حسن؟ فى حلقة انهاردة حققنالكوا الخيالات ديه ودمجنا البودكاستين عشان نطلعلكوا حلقة من الضحك المبرح. بنقدملكوا "كوبايتين اسود" مع أحمد الهريدى وبدر نور

قبل ما نسجل الحلقة جالنا خبر وفاة الروائي العظيم د/نبيل فاروق رحمه الله، الخلى جيل كامل يتعلق بمصر و نمى عنده حب الوطن من خلال سلسلة رجل المستحيل و غيرها من القصص و الروايات، بندعيله بالرحمه و المغفرة و ربنا يجازيه عننا خير بقدر ما خلانا نقرا.... و سألنا بعض "لو قصة حياتك اتحولت رواية، هتبقى عامله ازاي" اجابة السؤال ده و اكتر فى حلقة انهاردة من البودكاست

صراع الأهلي و الزمالك صراع أبدي، وهو أمتع الصراعات فى الكرة المصرية. يا تري ازاي ابتدي حب جمهور الفريقين لنواديهم؟ وامتي يبقى الصراع بره الملعب بين الجماهير لذيذ ومقبول وامتى بيزيد عن الحد لدرجة الكره والتعصب والعنصرية؟ كل ده هنناقشه وأكتر فى واحدة من ألذ حلقاتنا

شكراً جدا لكل الناس اللي بعتتلنا محاولتها للبودكاست، منهم البنفس طريقة كوبايتين قهوة ومنهم اللي فكرته جديدة ويا ريت تفضلوا تبعتولنا عشان ان شاء الله حنثبت حلقة انتوا تعملوها بنفسكوا، ما هو مش حنفضل نعملكوا القهوة وانتوا تشربوها عالجاهز على طول 😂

وما زالت معاناة هريدى مستمرة إن خالد مش متاح للبودكاست ومش لاقيله بديل، بس الحل عندكوا انتوا، وده اللي هتسمعوا فى البودكاست انهارده

رجعنالكوا تانى بعد ما فوتنا الأسبوع الفات من غير حلقة... وعشان ظروف قهرية خالد بيضرب كرسي فى الكلوب وميطلعش الحلقة دي، فا هريدى يتصرف ويجبلكوا أخوه الصغير اللي صادف إنه يكون بطل مصر والعرب فى رياضة السنوكر

احنا فى كوبايتين قهوة مبنحبش نمشي أو نتكلم على تريندز أو خناقات وما أكترها اليومين دول.. بس استوقفتنا ظاهرة ومش حتتكرر غير بعد كتير قوي ممكن تلخص كل حاجة احنا عايزين نقولها فى حلقة انهاردة، وهو بطل اليو اف سي خبيب نورماجوميدوف

فى حلقة انهارده حقيقى ملقناش حاجة نقولها، كنا هنننزل حلقة قديمة ومنزلنهاش، بصينا بصه على بوديو، ومن الاخر عايزينكوا تيجوا تشربوا معانا قهوة.. ازاي؟ هتعرفوا لما تسمعوا الحلقة كلها

فى حلقة الأسبوع ده من البودكاست كريم بركات بياخد هريدى وخالد فى رحلة، من مصر لكندا لمصر تاني، ومن هندسة طيران لمحل صغير صاحبته عجوزة اسمها هيلين لنهاية المطاف  "the apothecary egypt" حضر لنفسك كوباية قهوة وانضم معانا فى الرحلة

فى حلقة انهاردة مكناش مجرد بودكاست وبس، لكن كنا بمثابة ملاذ أمن لأي راجل متجوز عايز يتنفس سيكا، ويهرب من الواقع ويطلع كده شوية حاجات جواه، اللي هتسمعوها من خلال ضيوفنا من اللوران جانج علاء الشيخ، هاشم المصرى أحمد مصباح، اللي بينضموا لخالد فى حسد هريدي على سنجلته وحياة العزاب الهلهي بتاعته

من ٢٠٠٥ و هما لازقين فى بعض، مش مفهوم ده حصل ازاي و فين وامتي، بس اهو حصل، واترتب على التجميه ده حاجات غيرت العالم بجد... زي المواطن المصرى، ذا كوميدي بانش وبودكاست كوبايتين قهوة اسمعوا فى حلقة انهاردة خالد وهريدي وعلاء الشيخ بيستعيدوا ذكريات ال١٥ سنة الفاتوا و بيغيروا موضوع الحلقة تماما زي ما غيروا العالم كده بظبط

حلقة انهاردة مع موهبة فذة وظاهرة صعبة التكرار، فنان حقيقى قدر انه يثبت نفسه فى مجاله ويتميز فيه.. حنتكلم انهاردة عن مشواره من اسكندرية لنيويورك لكاليفورنيا، من مصمم اعلانات لرسام فى  Dreamworks و Warner Brothers ضيفنا هو الفنان المصري أحمد جمال عبد الغني، عيبه الوحيد انه اخو جيمي مقدم كوالا ساندويتش بودكاست

فى حياة عالكواكب التانية؟ كائنات فضائية بتزور الارض؟ طب هما بيتجوزوا ازاي؟ بيعملوا افراح زينا؟؟ هل خالد و هريدي كانوا شاربين حاجة غير القهوة فى الحلقة دي؟ كل ده هتعرفوه فى حلقة انهاردة من كوبايتين قهوة