Todos os podcast | Pensando en ti

Pasear pola praia un día de sol; durmir a sesta á sombra dun castiñeiro; degustar o noso prato favorito... Son actividades que nos proporcionan satisfacción e que constitúen pequenos praceres dos que falamos no programa.

O programa está dedicado aos obxectivos incumpridos. Preguntámoslles aos oíntes que plans deixaron a medias nas súas vidas e por que. Ademáis falamos da conciliacion familiar, de como se apaña a xente para compatibilizar o traballo co coidado dos fillos.

Os pilotos de avión están en pé de guerra por un suposto plan para reducir a tripulación dos aparellos introducindo máis intelixencia artificial. Preguntámoslles ao nosos oíntes se eles voarían tranquilos sabendo que o copiloto do seu avión é un aparello de IA. Ademáis buscamos bos cantantes entre a nosa audiencia.

A cantante Sabela é a convidada especial do programa. Traenos as súas cancións, fálanos dos seus proxectos e tamén dun aspecto da súa infancia que lle deixou unha profunda pegada. Sabela criouse cunha "familia adoptiva". Iso lévanos a pedirlle aos oíntes que nos conten se tamén eles teñen vivencias da infancia que os marcaran para sempre.

Falan os solteiros e solteiras e cóntannos se vivir sen parella foi a súa elección; se tiveron presións para casar; se son felices vivindo sós... Tamén preguntamos se alguén se sentiu discriminado por ser galego; se recibiu burlas polo seu acento, se se sentiu sinalado cando estaba na emigración....

Os oíntes fálannos da súa actividade laboral. Cóntannos se para eles o traballo é unha obriga penosa ou un verdadeiro "choio". Dinnos se están queimados e desexando xubilárense ou se gozan do tempo que pasan traballando. Ademáis Pepe Capelán fálanos do "San Lázaro" que temos ás portas .

"A vida dáche sorpresas" dicía a canción. Neste programa os oíntes describen sorpresas que recibiron, sorpresas que eles deron, sorpresas que estropearon ou sorpresas que finxiron.

Isi cóntanos as súas experiencias con animais e os oíntes aportan historias de convivencia con animais exóticos, de encontros con serpes, anécdotas que teñen como protagonista algún becho...

Os nosos oíntes fachendean do seu, desas cousas que cultivan ou fan eles mesmos e que non cambiarían por ningunha outra. Cóntannos se as comparten cos veciños ou as venden. Ademáis preguntámonos ata onde chega a solidariedade dos galegos.

As autoridades europeas anímannos a preparar na nosa casa un Kit de supervivencia polo que puidese pasar. É unha boa idea ou unha esaxeración? que cres que debería conter?. Son preguntas ás que responden os oíntes, que tamén nos falan dos sacrificios que fixeron na súa vida e avalían se pagaron a pena.

Moitos dos nosos oíntes exhiben sen pudor o moi orgullosos que están dos seus fillos. Explícannos as súas razóns. Ademáis, os que traballan na rúa cóntannos como levan os dias de chuvia.

Isi ten unha listaxe coas cousas que o fan feliz. No programa saberemos se coinciden cos motivos que provocan ledicia nos oíntes. Ademáis veremos os "efectos" da primavera na nosa audiencia.

O programa está dedicado a homenaxear a tódolos pais. Os oíntes cóntannos historias sobre os seus pais ou explícannos por que queren adquirir esa condición. Tamén homenaxeamos a Pepes e Pepas e preguntámoslles por que lles puxeron ese nome.

Visítanos no estudo Pepe de Moaña, que nos vai contar o naufraxio que viviu cando traballaba no mar. Outros oíntes cóntanos como é a súa relación co mar. Pepe Capelán abre para nos o libro "Galicia de lenda"

Os oíntes cóntannos que fixeron co seu primeiro soldo; se o gastaron "a correr"; se o meteron na hucha; se llo entregaron á familia; se se permitiron unb capricho. Ademáis, Raquel pide consello para plantar un camelio co que a agasallaron

O programa vai de sono e de soños. Falamos dos que durmen moito e dos que non poden durmir; dos que botan a sesta en pixama e dos que pechan un pouco os ollos no sofá; dos que soñan e do que significan eses soños...

Pasaron cinco anos dende que a pandemia do Covid nos obrigara a recluirnos nas nosas casas. Os oíntes cóntannos o que lembran daqueles días, as súas sensacións, se continuaban traballando, se sufriron secuelas...

O goberno impulsa unha lei que ten coma obxectivo reducir o consumo de bebidas alcólicas entre os menores de idade. Que opinan desta iniciativa os nosos oíntes. Tamén poñemos sobre a mesa outro tema de actualidade, as dificultades para facer obras na casa pola falta de man de obra e o aumento dos prezos. Ademáis, Pepe Capelán "fai terapia" no programa.