Driesestig

‘n Chinese man het sy nuwe sweefskerm getoets, toe skep die wind hom tot 8 500 meter bo seevlak!

Die dertienjarige Judi Hattingh het onlangs 'n Kanna-toekenning gekry as Beste Nuweling by 2025 se KKNK. Haidee Muller-Isaacs het ingeloer by haar skool in Durbanville, waar sy met die talentvolle tiener en haar ouers, Jacus en Lina, gesels het.

Ivor Cleary vertel vir Martelize Brink van ‘n Reach for a Dream se Chad le Clos-ervaring, en Pantoffeldag.

Dr. Margaretha le Roux praat oor jou oë wat met die tyd verander, en nuwe lense wat jy kan laat inplant.

Ouers in Japan moet voortaan by geboorteregistrasie ‘n fonetiese spelling saam met die gewone spelling van ‘n naam voorlê aan die plaaslike owerheid. As die twee nie klop nie, moet daar ‘n ander naam gekies word.

Dit kan hoe sleg in ’n land gaan, maar in ‘n pretpark sal jy altyd skaterlag hoor, want wat is nou lekkerder as om spookasem te eet en die verskillende ritte te geniet? Mariska Spoormaker het hoogtevrees, maar sy het verkies om op die Groot Wiel met die Pretoriusse te gesels, want hulle vier generasies in die pretparkbedryf het hulle al na groot hoogtes geneem.

Marthie Nel Hauptfleisch praat oor die rol van kinderliedjies in opvoeding.

Harvard Sakeskool het ‘n professor wat wêreldbekend is vir haar werk op die gebied van eerlikheid en etiese gedrag, se ampstermyn opgeskort weens oneerlikheid. Sy het data gemanipuleer om haar hipoteses te ondersteun.

Lelanie Badenhorst vertel vir Martelize Brink van die lewe in die Bahamas, die see, die sand en ‘n fees van vrugte in seisoen.

Andries Keyser se passie vir treine het 'n obsessie geword, en toe bou hy eiehandig 'n indrukwekkende treinspoor met brûe en tonnels en die mooiste lokomotiewe in 'n park net buite Stellenbosch. Een van sy stoomlokomotiewe is na sy ma Doreen vernoem. Haidee Muller-Isaacs en haar gesin het gaan treintjie ry.

Arbeidsterapeut Lize Brönn praat oor die belangrikheid van speel vir opvoedkunde en terapie.

Daar is ‘n bygeloof dat ‘n renjaer ‘n koei moet melk om die Indy 500 te kan wen. Voor die afgelope naweek se wedren het Pato O’Ward al twee keer tweede gekom, maar het nog nie die koei gemelk nie. Ná Vrydag se melkery het hy ‘n vierde plek gekry...

Daar is ongeveer 270 000 motspesies in die wêreld. In Suidelike Afrika is daar meer as 20 000. Hermann Staude, ‘n ingenieur met ‘n belangstelling in motnavorsing, en medeskrywer van MOTHS OF SOUTHERN AFRICA AND THEIR CATERPILLARS, vertel vir Johan Rademan meer van motte en sy navorsing.

Johan Crous vertel vir Martelize Brink van sy en sy vrou, Carmen, se ontmoeting in Duitsland in 1975. Hy is Afrikaans, sy is van Chili en haar moedertaal is Spaans. Dinge het in Duits gebeur.

‘n New Yorkse plaaslike TV-nuusaanbieder het haar drie uur lange oggendskof begin, twee ure nadat haar water gebreek het. Sy het werk verkies bo wag by die hospitaal!

Vir meer as 150 jaar het die getroue Lister-enjin plaaspompe laat werk en die ligte laat skyn, maar nou word sommige van dié staatmakers as skroot verkoop. Die Suid-Afrikaanse Federasie van Veteraan-trekker-en-enjin-klubs doen hulle bes om die belangstelling in Listers behoue te laat bly, al moet ’n Lister oopgesny word, het Mariska Spoormaker gevind.

Kos-en kultuurhistorikus Hetta van Deventer-Terblanche praat oor die verskil tussen boullion en aftreksel as geurmiddel.

Politiek in die Verre Ooste is sensitief. Japan se Minister van Landbou het bedank omdat hy gesê het hy koop nie rys nie, hy kry dit verniet. In Suid-Korea kan jy nie koffie bestel met ‘n naam wat dieselfde is as dié van ‘n presidensiële kandidaat nie. Dis te polities van aard.

Christoff van Wyk vertel vir Martelize Brink van ‘n fynbostema Legostel wat hy ontwerp het. As dit genoeg stemme kry, mag Lego oorweeg om dit te vervaardig.

Haidee Muller-Isaacs gesels met oudsendeling Susan Murray oor haar werk in die Noord-Kaap, Malawi en Zimbabwe saam met haar man. Hulle gesels ook oor die staptogte wat haar uiteindelik gehelp het om haar man se dood te kon verwerk.

Dr. Ria Smit praat oor koffie as ‘n kuur. Jy kan dit drink vir sy voordele, maar ook aan jou vel aanwend.

Vir die 2028 Olimpiese Spele in Los Angeles word daar beplan om lugtaxi’s beskikbaar te hê. Dit vlieg soos ’n helikopter, en kan tot vier passasiers op ‘n slag vervoer.

Gesoute joernalis Johann Maarman vertel vir Haidee Muller-Isaacs van sy grootwordjare as een van elf kinders in die Swartland. Sy huiswerker-ma het groot drome vir hom gekoester, en sy pa was ongeletterd. Vandag is Johann adjunkredakteur van Die Burger.

‘n Kat is by ‘n gevangenis in Puerto Rico gevang met pakkies dagga en heroïen wat aan dit vasgemaak is.

Beatrice Grobler vertel van die lewe in Motherwell, Noord-Lanarkshire, Skotland.